Obufa N̄kpọutom Ndin̄wam Mme owo Ẹkpep Mme N̄kpọ Oro Abasi Oyomde
“MMEMMEM, in̄wan̄în̄wan̄, ye inem inem usụn̄ nneme esie oyosion̄o mme n̄kpọ oro ẹkponde ẹkan se ẹkedoride enyịn ẹdi. Ẹwet mme ibuotikọ esie ke mmemmem ye inem inem usụn̄ oro edidemerede owo ekededi oro enyenede esịt akpanikọ onyụn̄ anamde ndụn̄ọde ndidọhọ, ‘Abasi odu ke otu mbufo ke akpanikọ.’” (1 Corinth 14:25) Ntre ke kiet ke otu Mme Ntiense Jehovah otode Thailand eketịn̄ ke ini eketịn̄de n̄kpọ aban̄a obufa ediye uduot ekpri n̄wed oro, Nso ke Abasi Oyom Oto Nnyịn? Watch Tower Society okosio enye ke Mme Mbono District “Mme Isụn̄utom Emem Abasi” ke 1996/97.
Ẹtịm ọyọhọ ediye uduot ekpri n̄wed emi enyenede page 32 mi nte un̄wam ukpep Bible. Enye eneme mme akpan ukpepn̄kpọ Bible. Mme ikọ esie ẹdi mmemmem ye mbio mbio, ẹtịn̄de in̄wan̄în̄wan̄ se Abasi oyomde oto nnyịn. Ikpenyeneke ndidi ọkpọsọn̄ n̄kpọ ndin̄wan̄a andikot. Didie ke afo ekeme ndinịm ukpepn̄kpọ Bible ke obufa ediye uduot ekpri n̄wed emi?
Kama mme mbụme. Mme mbụme ẹdu ke ntọn̄ọ ukpepn̄kpọ kiet kiet. Ke utịt mbụme kiet kiet, afo oyokụt nọmba ikpehe ekikere ẹmi ẹkụtde mme ibọrọ ke idiọn̄ọ ubak ọfiọn̄. Ẹkeme ndida mme mbụme ẹmi nte n̄kpọ un̄wam ndinam mbemiso ndụn̄ọde ye nte n̄kpọ edifiak ndụn̄ọde se ẹkpepde. Ke uwụtn̄kpọ, ke ntọn̄ọ ntọn̄ọ ukpepn̄kpọ Bible, afo emekeme ndibụp eyen ukpepn̄kpọ mme mbụme n̄kop se enye etịn̄de. Utu ke ndinen̄ede mme ibọrọ oro mînenke ke ndondo oro, afo emekeme ndika iso ke ukpepn̄kpọ. Ke utịt ukpepn̄kpọ oro, afo emekeme ndifiak n̄kobụp mme mbụme man ese m̀mê eyen ukpepn̄kpọ eyekeme ndibọrọ mmọ nte ekemde ye Bible.
Se mme itien̄wed Abasi. Ke ukpepn̄kpọ kiet kiet, se itienede mbio mbio utịn̄ikọ akpanikọ Bible ẹdi mme itien̄wed Abasi oro ẹnọde nsọn̄ọ. Sia ẹsiakde-siak ata ediwak itien̄wed Abasi ẹsịn, owo mîkotke-kot, edi akpan n̄kpọ nte ẹsịn udọn̄ ẹnọ eyen ukpepn̄kpọ ndikụbọde mme itien̄wed ke Bible esie n̄kot. Oyom enye okot onyụn̄ etie ekere Ikọ Abasi mbemiso enye ekeme ndida enye nsịn ke edinam ke uwem esie.—Joshua 1:8.
Neme ban̄a mme ndise. N̄wed emi ọyọhọ ye mme ndise ye mme mbuwed—ẹwakde ẹbe 50 ke ofụri ofụri. Ẹdọn̄ mmọemi idịghe n̄kukụre man eye owo ke enyịn edi n̄ko nte mme un̄wam efen efen ndida nnọ ukpep. Ke uwụtn̄kpọ, mme akpatre ukpepn̄kpọ iba (kiet ke page kiet, ke mme page oro ẹsakde iso ẹse kiet eken) ẹnyene ibuotikọ ẹdọhọde “Ndin̄wam Mbon En̄wen Ẹnam Uduak Abasi” ye “Ubiere Fo Ndinam N̄kpọ Abasi.” Mme ndise ẹmi ẹdude ke page iba oro ẹwụt idaha n̄kọri eke spirit eke ukem owo oro, owụtde enye nte ọnọde ikọ ntiense ido nneme, abuanade ke utom eke ufọk ke ufọk, anamde uyakidem, ndien ke akpatre anade baptism. Ke ndidụri ntịn̄enyịn eyen ukpepn̄kpọ n̄ka mme ndise ẹmi, afo an̄wam enye ndikụt mme usio-ukot oro oyomde ẹnam ke ndinam n̄kpọ Abasi.
Nso edieke owo oro enyenede udọn̄ mîkemeke ndikot n̄wed ọfọn m̀mê mîkemeke-keme ndikot n̄wed? N̄ka ke anam obufa ediye uduot ekpri n̄wed emi odu ke kaset ke ediwak usem. Kaset emi esịne uwetn̄kpọ ediye uduot ekpri n̄wed emi ọkọrọ ye ediwak itien̄wed Abasi oro ẹsiakde ẹdọn̄. Ẹkot enye ke usụn̄ etienede mi: Ẹkot akpa mbụme, ekem ẹkot ikpehe ekikere (m̀mê mme ikpehe ekikere) oro ọbọrọde enye, ọkọrọ ye ndusụk itien̄wed Abasi oro ẹsiakde ẹdọn̄. Ekem ẹkot udiana mbụme, uwetn̄kpọ ye mme itien̄wed Abasi oro ẹbọrọde enye ẹtiene, ye ntre ntre. Eyen ukpepn̄kpọ ekeme ndikpan̄ utọn̄ nnọ kaset nte enye etịmde idem ọnọ ukpepn̄kpọ. Ẹkeme ndikama kaset emi n̄ko ke ini ẹnịmde ukpepn̄kpọ.
Mbon oro ẹkedụkde mbono ẹma ẹnyene ọkpọsọn̄ udọn̄ ndikama obufa ediye uduot ekpri n̄wed emi ke utom ukwọrọikọ mmọ. Ke uwụtn̄kpọ, usen ifan̄ kpọt ke ẹma ẹkebọ ediye uduot ekpri n̄wed emi, mme asiakusụn̄ iba (mme ọkwọrọikọ ofụri ini) ẹtode United States ẹma ẹkpọn̄ enye ẹnọ ebe ye n̄wan ẹdide n̄kparawa ẹmi mmọ ẹkesiwahade ẹkese. Ke ini ebe ye n̄wan oro ẹkesede se isịnede, ukpepn̄kpọ oro “Mme Edinam Ẹmi Abasi Asuade” ama omụm ntịn̄enyịn mmọ. N̄kaiferi oro ọkọdọhọ ete: “Ẹma ẹkpep mi kpukpru ini ete ke Abasi ikemeke-keme ndisua n̄kpọ—enye amama kpukpru n̄kpọ. Enyeemi ke nyom ndibem iso n̄kot.” Ke ini mme asiakusụn̄ iba oro ẹkefiakde ẹka ke urua oro eketienede, n̄kaiferi oro ama ọdọhọ ete: “Ami mma n̄kot obufa ediye uduot ekpri n̄wed oro. Edi ata ọkpọsọn̄ n̄kpọ ndinam kpukpru n̄kpọ oro akpanade inam. Jehovah inemke esịt ye nnyịn—nnyịn idịghe mme ọdọ ndọ. Edi nnyịn imanam ubiere. Nnyịn imanam ndutịm ndidian ndọ ke Friday efen.” Ke ẹfatde ebe ye n̄wan oro, mmọ ẹma ẹdian do ẹte: “Nnyịn imeseme ke ndiketre ndinyene ukpepn̄kpọ ofụri ini, edi emi obiomode nnyịn akamba mbiomo.”
Ke kpukpru usụn̄, da obufa ediye uduot ekpri n̄wed Oyom nam n̄kpọ. Enye edi eti n̄kpọutom ndin̄wam mbon efen ẹkpep mme n̄kpọ oro Abasi oyomde.
[Mme ndise ke page 17]
Didie ke afo edida obufa ediye uduot ekpri n̄wed emi anam n̄kpọ?