Tịm Nneme Unọ Magazine eke Idemfo
1 Nnyịn imowụt esịtekọm ke mme magazine Enyọn̄-Ukpeme ye Awake! kaban̄a mme ekemini ye esịne-ifiọk ibuotikọ mmọ, emi ẹsinemede kpukpru n̄kpọ ọtọn̄ọde ke n̄kpọ aban̄ade ererimbot tutu osịm “nditụn̄ọ n̄kpọ Abasi.” (1 Cor. 2:10) Kpukpru nnyịn imesiti ediwak mbufa ye mme n̄kpọ ẹbọpde-bọp oro isikotde ke mme magazine ẹmi, emi Jehovah akade iso ada ndiyarade akpanikọ. (N̄ke 4:18) Nnyịn iyom ndinyene ifiopesịt ndisuan mmọ ntatara ntatara adan̄a nte ikekeme.
2 Dụn̄ọde Efakutom Mbufo: Nso orụk owo ẹdụn̄ọ ke n̄kann̄kụk mbufo? Edieke uwem mmọ etiede itọk itọk, afo emekeme nditịm nneme oro edide ibio ibio onyụn̄ otụkde akpan n̄kpọ. Edieke ẹnyenede efakutom oro mme owo mîtiehe itọk itọk, afo emekeme nditịn̄ n̄kpọ awak. Edieke ekese mme enyeneufọk ẹsinamde utom ke uwemeyo, afo emekeme nditịm n̄kụt unen ndiwaha ufọk mmọ ke utịt utịt uwemeyo m̀mê ke ntọn̄ọ ntọn̄ọ mbubịteyo. Afo emekeme ndisobo ndusụk owo ke uwemeyo ebe ke unọ ikọ ntiense efak m̀mê edinam utom to ke ufọkurua sịm ufọkurua. Ndusụk asuanetop ẹsinyene nti utịp ebe ke ndika mbịne mme owo ke ido nneme ke mme itie ubon moto ye mme itie unyam aranuwat.
3 Mehe ye Mme Magazine: Kot nsiondi kiet kiet ke ndondo oro ọbọde enye. Mek mme ibuotikọ oro ekerede ke eyedemede udọn̄ mme owo ke efakutom mbufo. Mme ibuot nneme ewe ẹbehe mmọ? Yom akpan n̄kpọ emi afo edikemede ndikot nto ke ibuotikọ emi afo odiomide ndinọ. Kere ban̄a mbụme emi afo ekemede ndibụp man edemede udọn̄. Sat ekemini itien̄wed Abasi emi edikotde ọnọ enyeneufọk edieke enyenede ifet ndinam ntre. Kere ban̄a nte ekemede ndisịn itiat idakisọn̄ nnọ mfiakn̄ka.
4 Tịm Mme Ntọn̄ọikọ Fo: Tịm mek mme ikọ ẹmi afo odiomide ndida nditịn̄ owo emi afo edide nnyụn̄ ntọn̄ọ nneme. Ndusụk owo ẹkụt unen ke mme ntọn̄ọikọ ẹmi: “Mma n̄kot inem inem ibuotikọ ke magazine emi, nnyụn̄ nyom ndibuana enye ye mbon en̄wen.” Ediwak owo ẹsitọn̄ọ ye mbụme oro owụkde ntịn̄enyịn ke mme akpan n̄kpọ ndida nnyene nneme oro mmọ ẹkediomide ndikama. Ke uwụtn̄kpọ:
5 Edieke owụtde ibuotikọ oro aban̄ade nte ubiatibet awakde, afo emekeme ndibụp ete:
◼ “Nso ke ediyom man nnyịn ikeme ndide idap ke okoneyo ye unana edikop ndịk nte ke ẹyewo m̀mê ẹyenam nnyịn ibak?” Nam an̄wan̄a nte ke imọ imenyene ndusụk ntọt kaban̄a usọbọ ke mfịna emi. Usọbọ emi ke mîbịghike eyetre kpukpru orụk mfịna n̄kaowo eken n̄ko. Kụbọde ka n̄kpọ ke magazine oro ọnọde utọ idotenyịn emi nyụn̄ sịn udọn̄ nọ owo oro nditobo magazine emi ke isua kiet ke etịbe oro ẹsitobode. Ke ini afiakde aka, afo emekeme ndidụri ntịn̄enyịn enyeneufọk aka ibuot 1 ke n̄wed Ifiọk.
6 Ke ini owụtde ibuotikọ aban̄ade uwem ubon, afo emekeme ndidọhọ ntem:
◼ “Edi ata n̄kpọ-ata ọnọ ata ediwak ete ye eka ndibọk ubon mfịn. Ẹmewet ediwak n̄wed ke ibuot nneme emi, edi idem nta mme ekpep n̄kpọ inyịmeke ye kiet eken. Nte odu owo emi ekemede ndinọ ndausụn̄ oro ẹkemede ndiberi edem?” Buana akpan utịn̄ikọ otode magazine emi owụtde ọniọn̄ ọniọn̄ item oro odude ke Bible. Dọhọ otobo magazine. Edieke owo mînyịmeke editobo, nọ mme idem magazine ke etịbe oro ẹsinọde. Ke ini anamde mfiakn̄ka, neme mme ekikere N̄wed Abasi kaban̄a edibọk nditọ oro ẹnemede ke n̄wed Ifiọk, page 145-148.
7 Ke ndiwụt ibuotikọ aban̄ade mfịna n̄kaowo, afo emekeme ndidọhọ:
◼ “Ediwak owo ẹkop mfịghe ke ntak mfịghe mfịghe ini emi nnyịn idude uwem. Ndi afo ekere ke Abasi okoyom nnyịn idu uwem ke usụn̄ emi?” Wụt ibuotikọ oro owụtde nte ẹkemede ndiyọ mme mfịna m̀mê oro ọnọde mme ntak ẹmi ikpasakde iso ise ini iso oro editịmede esịt mîdidụhe. Ekem dọhọ ẹtobo magazine. Edieke owo mîbọhọ editobo oro, nọ mme magazine ke etịbe oro ẹsinọde. Ke mfiakn̄ka fo en̄wen, neme ndise ye uwetn̄kpọ ndise ke page 4-5 ke n̄wed Ifiọk, ndien ekem be nnennen dụk ukpepn̄kpọ Bible.
8 Kpụhọde Da Ekekem ye Enyeneufọk: Afo eyesobo mme owo ẹnyenede nsio nsio udọn̄ ye idaha ke uwem. Tịm akpan nneme oro afo ekemede ndikpụhọde ada ekekem ye enyeneufọk kiet kiet. Ben̄e idem ke nte ekemede ndikpụhọ se afo etịn̄de ekekem ye erenowo, n̄wan, akani owo, m̀mê uyen. N̄kpọsọn̄ ibet idụhe kaban̄a se ẹnyenede nditịn̄. Tịn̄ se ededi oro afo ekemede oro onyụn̄ ọnọde utịp. Nte ededi, nyene ifiopesịt, tịn̄ ikọ to esịt, nyụn̄ di eti andikpan̄ utọn̄. Mbon oro “ẹnyenede esịt akpanikọ” ẹyekụt esịt akpanikọ fo ẹnyụn̄ ẹnam n̄kpọ ẹban̄a nte ọfọnde.—Utom 13:48, NW.
9 Ẹn̄wam Kiet Eken: Ebede ke ndibuana mme ekikere ye kiet eken, nnyịn ikpep mbufa usụn̄ ndinyene nneme idem nnyịn. Ndikpep nneme nnyịn ọtọkiet anam nnyịn inyene ifiọk ye uko. (N̄ke 27:17) Edieke afo odomode se oyomde nditịn̄ ese, afo eyetịm enyene ifụre ke enyịnusụn̄. Edi akpan n̄kpọ ete ye eka ndida ini n̄n̄wam nditọ mmọ ẹtịm idem, ndikpan̄ utọn̄ ke adan̄aemi ẹkpepde nneme mmọ, ẹnyụn̄ ẹnọ mme ekikere kaban̄a edinam n̄kọri. Mbufa owo ẹkeme ndibọ ufọn ke ndinam utom ye mme asuanetop ẹmi ẹnyenede mbufiọk.
10 Nditịm nneme unọ magazine inyeneke ndidi ọkpọsọn̄ n̄kpọ. Enye n̄kukụre edi edinyene akpan n̄kpọ ke ekikere nditịn̄ ndien ekem etịn̄ enye ke usụn̄ oro edemerede udọn̄. Otode edinam usio-ukot ye mbemiso ekikere, afo emekeme nditịm inem inem nneme oro ẹdinọde eti n̄kpan̄utọn̄.
11 Edisuan magazine edi kiet ke otu akpan usụn̄ oro idade isuan etop Obio Ubọn̄ ke ofụri ererimbot. Edieke afo ekemede ndiyak Enyọn̄-Ukpeme ye Awake! nsịn ke ubọk mme owo ẹmi ẹnyenede esịt akpanikọ, mme magazine ẹkeme nditịn̄ ikọ ke idem mmọ. Ti ufọn mmọ kpukpru ini ye nte etop mmọ ekemede ndinyan̄a uwem. Utọ edinam ‘eti n̄kpọ ye edifọn ido ye owo’ emi enem Jehovah esịt etieti.—Heb. 13:16.