Nte Afo ke Anam Utom ye Uduak?
1 Jehovah edi Abasi uduak. (Isa. 55:10, 11) Ẹteme nnyịn ẹte ikpebe enye. (Eph. 5:1) Emi ke akpanikọ ekpenyene ndidi ntre ke usụn̄ emi inamde utom ukwọrọikọ nnyịn. Ntre mbụme oro odot: “Nte afo ke anam utom ye uduak?”
2 Afo ndikwọrọ ikọ to ke enyịnusụn̄ sịm enyịnusụn̄, ndinọ ikọ ntiense ido nneme, ye ndisuan mme n̄wed kpukpru ẹdi ubak utom ukwọrọikọ oro enyenede uduak. Edi ti ete ke utom nnyịn ibuanake edikwọrọ ikọ kpọt edi abuana n̄ko edinam mbet. (Matt. 28:19, 20) Ke ima ikọtọ n̄kpasịp akpanikọ Obio Ubọn̄, oyom nnyịn ifiak ika ikọduọk mmọn̄ inyụn̄ inọ ukpeme ofụri ini nte nnyịn iberide edem ke Jehovah ndinọ n̄kọri. (1 Cor. 3:6) Oyom nnyịn isịn ifịk ndinam mme mfiakn̄ka ndinyụn̄ ntọn̄ọ mme ukpepn̄kpọ Bible.
3 Tat Utom Ukwọrọikọ Fo: Inemesịt esidu kpukpru ini ke ini afiakde ese se akanamde ke utom onyụn̄ ọdọhọde idemfo ete: “Mma n̄kụre se n̄kọtọn̄ọde ndinam.” Nte ẹwetde ke 2 Timothy 4:5, Paul akakpak ete: “Nam utom fo ma.” Oro esịne editat mme ukeme fo ke ndifiak n̄ka mbịne kpukpru udọn̄ okokụtde. Diomi akpan ini ndinam mme mfiakn̄ka ke ndutịm utom fo eke urua ke urua. Nam n̄kpọ bịne utịtmbuba eke edidomo nditọn̄ọ mme ukpepn̄kpọ Bible ye mbon oro ẹmade edinen ido. Emi ekpenyene ndidi uduak fo ke ini abuanade ke utom ukwọrọikọ.
4 Bụp mme asuanetop nte eketiede mmọ ke idem ke ini mmọ ẹkekụtde nditọ ukpepn̄kpọ Bible mmọ ẹnade baptism ke mbono. Mmọ ẹma ẹdat esịt, eyedi ẹma ẹdat esịt ukem nte mme owo oro ẹkenade baptism. Mmọ ẹma ẹyọhọ akwa uduak! Owo kiet emi esinamde mbet ekesịn enye ke usụn̄ emi: “Edinam mme mbet ọwọrọ edinyene mme anditoro Jehovah efen efen. Enye ọwọrọ uwem ọnọ mbon oro ẹnyịmede akpanikọ. N̄kam mmama ndikpep mbon en̄wen akpanikọ—enye edi ata inem n̄kpọ! . . . Ediwak mbon ẹmi ẹdide ẹdima Jehovah ẹmekabade ẹdi mme ata ufan mi.”
5 Kere ban̄a ndikeme ndin̄wam owo akabade edi asan̄autom Jehovah oro ayakde idem ọnọ! Nso ntak idatesịt! Utọ mbun̄wụm oro esisụn̄ọ oto ndinam utom ye uduak ke utom ukwọrọikọ.—Col. 4:17.