Ẹka Iso Ẹkwọrọ Ikọ
1 Ndiọkeyo edi emi. En̄wan mbio obio, mme ekọn̄ ekpụk, mme oto-obot afanikọn̄, ye mme enyene-ndịk n̄kpọntịbe eken ẹdi ọsọ n̄kpọ. Ubonowo ẹyom eti mbụk idahaemi ẹkan nte akanam ẹyomde. Nte ededi, ata ediwak owo inyeneke udọn̄ ke n̄kpọ eke spirit. Ke ndusụk ebiet, ekeme ndisọn̄ ndikụt mme owo ke ufọk onyụn̄ enen̄ede ọsọn̄ ndikụt mbon oro ẹdikpan̄de utọn̄ inọ nnyịn m̀mê oro ẹyomde ndikpep Bible. Kpa ye oro, oyom nnyịn ika iso ikwọrọ eti mbụk Obio Ubọn̄ Abasi oro ẹma ẹkewụk.—Matt. 24:14.
2 Ima Oro Amade Mme Owo: Ukwọrọikọ nnyịn ọsọn̄ọ owụt ima oro Jehovah amade mme owo. ‘Enye iyomke owo ndomokiet atak edi oyom kpukpru owo ẹkabade esịt.’ (2 Pet. 3:9; Ezek. 33:11) Ntem, nte Jesus ọkọdọhọde, Abasi okowụk ete ke “ẹnyene ndibem iso n̄kwọrọ eti mbụk ke kpukpru idụt.” (Mark 13:10) Abasi ekpe mme owo ete ẹwọn̄ọde ẹbịne imọ ẹnyụn̄ ẹbọhọ ikpe emi ẹdibiomde ererimbot Satan ke ini iso. (Joel 2:28, 29, 32; Zeph. 2:2, 3) Nte nnyịn inemke esịt ke Jehovah ndiyak nnyịn itiene inyene ifet emi?—1 Tim. 1:12, 13.
3 Ntọt ofụri ererimbot owụt ke isua utom 2004, ke ẹbaharede ukem ukem ke kpukpru ọfiọn̄, ẹma ẹnịm ukpepn̄kpọ Bible 6,085,387, ndien n̄ko ke ẹbaharede ukem ukem mbufa mbet 5,000 ẹkena baptism kpukpru urua! Ẹkekụt ndusụk mbufa mbon emi ẹkeyakde idem ẹnọ mi sia Jehovah ọkọdiọn̄de ifịk oro mme asuanetop ẹkekade iso ẹsịn ndinyene nneme ye kpukpru owo ke efakutom mmọ. Nso idatesịt ke emi ada ọsọk mme esop ntem, ndien nso akwa ifet ke nnyịn inyene ntem ndidi nsan̄autom Abasi ke utom unyan̄a uwem emi!—1 Cor. 3:5, 6, 9.
4 Nditoro Enyịn̄ Abasi: Nnyịn ika iso ikwọrọ ikọ man itoro Jehovah an̄wan̄wa inyụn̄ inam enyịn̄ esie asana ke iso ofụri ubonowo. (Heb. 13:15) Satan otụn ‘ofụri isọn̄’ usụn̄ onyụn̄ anam mmọ ẹnịm ke Abasi inyeneke odudu ndikọk mme mfịna ubonowo, nte ke enye ikereke iban̄a ufen oro mme owo ẹbọde, mîdịghe nte ke enye ikam idụhe. (Edi. 12:9) Nnyịn imesida ukwọrọikọ nnyịn ikwọrọ akpanikọ aban̄ade akwa Ete nnyịn eke heaven. Nnyịn ikpakam ika iso nditoro enyịn̄ esie—ke emi ye ke nsinsi.—Ps. 145:1, 2.