Nte Nnyịn Idianade Kiet

IDỤT Israel ẹkedi ikọt Jehovah Abasi ke isua 1,500. Mmọ ẹkenyụn̄ ẹkere enyịn̄ ẹdian enye. Ekem Jehovah ama ọwọn̄ọde ese mme idụt en̄wen onyụn̄ osio mme owo do anam ẹkere enyịn̄ ẹdian enye. (Utom 15:14) Mbon oro ẹkerede enyịn̄ ẹdian Jehovah mi ẹdidi mme ntiense esie. Kpukpru mmọ ẹyediana kiet ẹkpono Abasi nte nditọeka inamke n̄kpọ m̀mê mmọ ẹto m̀mọ̀n̄. Nso ke ẹdinam man ẹnyene utọ mbon emi? Jesus ama ọnọ mbet esie utom emi edin̄wamde mmọ ẹnam emi. Enye ọkọdọhọ mmọ ete: “Ẹka ẹkenam mme owo ke kpukpru idụt ẹdi mbet mi, ẹnịm mmọ baptism ke enyịn̄ Ete ye Eyen ye edisana spirit, ẹkpep mmọ ẹnam kpukpru n̄kpọ eke n̄ketemede mbufo.”—Matt. 28:19, 20.

² Ke ini ayakde idem ọnọ Jehovah onyụn̄ anade baptism, amakabade edi mbet Jesus Christ. Afo esịne ke otu ikọt Abasi emi ẹdianade kiet nte ata nditọeka ke ofụri ererimbot, emi mîyakke idụt, ekpụk, m̀mê se mmọ ẹnyenede anam ubahade odu ke otu mmọ. (Ps. 133:1) Emi anam fi ama onyụn̄ okpono nditọeka fo emi ke esop. Ekeme ndidi ndusụk mmọ itoho edem mbufo, ndusụk ẹdi mfia, ndusụk mbubịt, ndusụk ẹma ẹka n̄wed, ndusụk ikakaha. Mîkpedịghe esop Abasi, ekeme ndidi ukpûmaha ndisan̄a n̄kpere ndusụk mmọ. Edi ima emi odude ke esop Abasi anam fi ada kpukpru mmọ nte nditọeka. Ukemeke ndikụt utọ ima emi ke otu mbon en̄wen, ekpededi mmọ ẹdi ufan, ubọkn̄ka, ẹsika ukem ufọkabasi, mîdịghe ẹto ufọk kiet.—Mark 10:29, 30; Col. 3:14; 1 Pet. 1:22.

IKỌT ABASI ẸKPỤHỌ NTE ẸKEREDE N̄KPỌ

³ Edieke ọsọn̄de ndusụk owo nditre asari, ana mmọ ẹti se ikan̄wamde mme Christian emi ẹkedide mme Jew ẹtre ndisari mbon idụt en̄wen. Mbemiso Jehovah ọkọdọn̄de Peter aka ufọk akwa owoekọn̄ Rome emi ekekerede Cornelius, Jehovah ama anam enye ọdiọn̄ọ utọ utom emi imọ iyomde ndidọn̄ enye.—Utom, ib. 10.

⁴ Abasi ama owụt Peter nsio nsio unam ke n̄kukụt. Kpa ye oro ibet mme Jew okokotde mme unam emi ndedehe unam, Abasi ama ọdọhọ Peter owot mmọ ata. Edi Peter ikenyịmeke. Ntre, Abasi ama etie ke heaven ọdọhọ enye ete: “Tre ndikot n̄kpọ emi Abasi ama akanam asana edidehe.” (Utom 10:15) Mîkpekedịghe n̄kukụt emi Abasi okowụtde Peter mi, nnyịn ikereke ke Peter okpokodụk ufọk Cornelius. Abasi akada n̄kukụt emi etịm enye idem. Ntre, Peter ama adaha aka se Abasi ọkọdọn̄de enye. Ke enye ama ekesịm ufọk Cornelius, enye ama ọdọhọ kpukpru owo do ete: “Mbufo ẹmetịm ẹfiọk nte ke ibet inyịmeke owo Jew adian idem m̀mê asan̄a ekpere owo orụk efen; edi Abasi owụt mi ete n̄kûdọhọ ke baba owo kiet asabade m̀mê edehe. Oro anam mi ndi ye unana mfan̄a, ke ini ẹkedọn̄de ẹdikot mi.” (Utom 10:28, 29) Ke enye ama eketịn̄ ikọ emi ama, Jehovah ama anam n̄kpọ emi okowụtde ke Cornelius ye mbonufọk esie ẹdidi ikọt imọ.

⁵ Saul eyen Tarsus ekedi Pharisee emi akakade n̄wed etieti, edi akana enye osụhọde idem onyụn̄ adian idem ye mbon emi enye mîkadaha nte n̄kpọ. Mmọ ẹkekam ẹteme enye nte enye akpanamde utom Abasi. (Utom 4:13; Gal. 1:13-20; Phil. 3:4-11) Ke ini Sergius Paulus, Dionysius, Damaris, Philemon, Onesimus, ye mme owo ntre ẹkekopde eti mbụk ẹnyụn̄ ẹkabarede ẹdi mbet Jesus Christ, nnyịn idiọn̄ọke nte eketiede mmọ ke idem, edi imenịm ke mmọ ẹma ẹsụhọde idem ẹdiana kiet ye nditọete mmọ ẹkpono Abasi.—Utom 13:6-12; 17:22, 33, 34; Philem. 8-20.

SE IKPANAMDE MAN IKA ISO IDIANA KIET

⁶ Imenịm ke ima emi afo okokụtde ke esop Jehovah akanam fi ama Jehovah onyụn̄ odụk esop esie. Ekenenem fi ndikụt nte mme owo ẹnyenede utọ ima emi Jesus Christ ọkọdọhọde ke enye ke ẹdida idiọn̄ọ ata mbet imọ. Enye ọkọdọhọ ete: “Ami mmọnọ mbufo obufa ewụhọ, nte mbufo ẹma kiet eken; kpa nte n̄kamade mbufo, nte mbufo n̄ko ẹma kiet eken. Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:34, 35) Ke ini ọkọdiọn̄ọde ke kpukpru ikọt Abasi ke ofụri ererimbot ẹma kiet eken nte nditọete ẹmade ke esop mbufo, emi ama anam enen̄ede ama Jehovah ye esop esie. Bible ọdọhọ ke Jehovah Abasi ayanam mme owo ẹdiana kiet ẹkpono imọ ke emem. Afo emetiene okụt nte prọfesi emi osude.—Mic. 4:1-5.

⁷ Edieke itiede ikere nsio nsio n̄kpọ emi ẹtọde ubahade ke ererimbot emi, anie ekpekere ke mme owo emi “ẹtode kpukpru idụt ye esien ye obio ye usem” ẹkeme ndidiana kiet ntem? (Edi. 7:9) N̄kọ emesikụt nte mbon emi ẹkerede ke enyịn atara mmimọ ẹsidade mbon emi ẹmade ido eset? Ekeme ndidi emesikụt n̄ko nte ido ukpono anamde mbon emi ẹtode idụt kiet ẹn̄wana n̄kpa n̄kpa ye kiet eken. Se inen̄erede inam mme owo ẹkûdiana kiet ke ererimbot emi edi mmọ ndikere ke idụt mmimọ ọfọn akan idụt en̄wen. Tie kere nte mme imọ owo ẹsinamde n̄kpọ ye mme ubuene, ye nsio nsio n̄kpọ eken emi ẹtọde ubahade ke ererimbot emi. Ekem, se nte ikọt Abasi ẹtiede ke emem, ẹmade kiet eken, ẹdianade kiet, inamke n̄kpọ m̀mê mmọ ẹto m̀mọ̀n̄ m̀mê ẹdi imọ owo m̀mê ubuene, m̀mê ẹdi mme ọdiọn̄ọ-n̄wed m̀mê idịghe, m̀mê edi mbubịt m̀mê mfia. Utọ edidianakiet emi edi ata utịben̄kpọ! Ndi ukereke ke Abasi kpọt ekeme ndinam utọ utịben̄kpọ emi?—Zech. 4:6.

⁸ Se itịbede ke otu ikọt Abasi edi oro. Ke ama akayak idem ọnọ Abasi, ana baptism, onyụn̄ edi Ntiense Jehovah, ẹbat fi ẹsịn ke otu emi. Imọdiọn̄ọ ke amadia ufọn esop emi, ntre tiene nam n̄kpọ man emem ye ima aka iso odu ke esop Abasi. Se Paul eketịn̄de ke Galatia 6:10 ayan̄wam fi anam emi. Enye ọkọdọhọ ete: “Adan̄a nte inyenede ifet, ẹyak nnyịn inam se ifọnde inọ kpukpru owo, edi akpan akpan mmọ emi ẹbuanade n̄kpọ ye nnyịn ke mbuọtidem.” Item efen emi esin̄wamde nnyịn edi emi: “Ẹkûnam baba n̄kpọ kiet ke ndomoidem m̀mê ke n̄kụtidem, edi ẹda nsụhọdeidem ẹbat ẹte mbon en̄wen ẹfọn ẹkan mbufo, ẹkûse ẹban̄a mbubehe mbufo kpọt, edi ẹse ẹban̄a mbubehe mbon en̄wen n̄ko.” (Phil. 2:3, 4) Edieke idade kpukpru nditọete nnyịn nte Jehovah adade mmọ, inyụn̄ itrede ndise ndudue mmọ kpukpru ini, iyaka iso idu ke emem ye mmọ.—Eph. 4:23, 24.

ẸKERE ẸBAN̄A KIET EKEN

⁹ Uwụtn̄kpọ kiet emi apostle Paul ọkọnọde owụt nte nditọete ẹsidianade kiet ẹnam n̄kpọ ke esop ẹnyụn̄ ẹkerede ẹban̄a kiet eken. (1 Cor. 12:14-26) Kpa ye oro nnyịn idude ke nsio nsio idụt, se iwọrọde nditọete nnyịn ke idụt ekededi esifịna kpukpru nnyịn. Ke uwụtn̄kpọ, esifịna nnyịn etieti ke ini ikopde nte ẹkọbọde nditọete nnyịn ke ndusụk idụt. Esinyụn̄ afịna nnyin n̄ko ke ini ikopde nte n̄kpọ ọsọn̄de ye nditọete nnyịn ke ndusụk idụt, m̀mê ke ini oto-obot afanikọn̄ m̀mê ekọn̄ m̀mê mme mfịna en̄wen ke obio abiatde inyene mmọ, kpukpru nnyịn imesiyom usụn̄ nte ikpadade Ikọ Abasi idọn̄ mmọ esịt, inyụn̄ inọ se ededi oro inyenede ẹsọk mmọ.—2 Cor. 1:8-11.

¹⁰ Ana kpukpru nnyịn isisịn nditọete nnyịn ke akam kpukpru usen. Idomo emi ndusụk nditọete nnyịn ẹsobode ke usen ke usen imemke. Imesikop se iwọrọde ndusụk mmọ, edi enyene mbon emi nnyịn mîsikopke, utọ nte mbon emi ẹyọde ukọbọ ke itieutom m̀mê ke ufọk. (Matt. 10:35, 36; 1 Thess. 2:14) Kpukpru emi ẹsifịna nnyịn sia idide nditọeka. (1 Pet. 5:9) Ndusụk nditọete nnyịn ẹsịn idem ofụri ofụri ẹnam utom Jehovah, ẹda usụn̄ ke esop ye ke utom ukwọrọikọ. Mbon eken ẹnọ ndausụn̄ ke kpukpru se ikọt Abasi ẹnamde ke ofụri ererimbot. Mbọk yak isisịn kpukpru mmọ ke akam, ọkpọkọm emi edi n̄kukụre se ikemede ndinam nnọ mmọ. Emi oyowụt ke imenen̄ede ima mmọ inyụn̄ ikere iban̄a mmọ.—Eph. 1:16; 1 Thess. 1:2, 3; 5:25.

¹¹ Afanikọn̄ etịbe ke ubọk ke ubọk ke mme akpatre usen emi. Ntre ana iben̄e idem ndin̄wam kiet eken ini ekededi emi etịbede. Ke ini unyekisọn̄, ukwọ m̀mê n̄kpọ ntre etịbede, esiyom ediwak owo ẹka ẹken̄wam nditọete mîdịghe ẹnọ ediwak okụk ye mme n̄kpọ en̄wen man ẹda ẹken̄wam mmọ. Mme Christian eyo mme apostle ẹkenyụn̄ ẹnam ntre. Nditọete ke Antioch ẹma ẹti ikọ Ọbọn̄ nnyịn Jesus ke Utom 20:35, ẹnyụn̄ ẹnọ n̄kpọ ẹsọk nditọete mmọ ke Judea. (Utom 11:27-30) Ekem apostle Paul ama ọdọhọ nditọete ke Corinth ete ẹtiene ẹnọ n̄kpọ ẹda ẹsọk nditọete mmọ. Kpukpru n̄kpọ akasan̄a ke nde ke nde. (2 Cor. 9:1-15) Mfịn, ke ini afanikọn̄ esịmde nditọete nnyịn, nnyịn imesisọp ikan̄wam mmọ. Ẹsinyụn̄ ẹnam ndutịm n̄ko ke esop Abasi man ẹda n̄kpọ ẹsọk mmọ.

JEHOVAH ETỊM NNYỊN IDEM MAN INAM UDUAK ESIE

¹² Jehovah etịm ikọt esie idem ke ofụri ererimbot man ẹnam uduak esie. Idahaemi, Jehovah oyom ẹkwọrọ eti mbụk Obio Ubọn̄ esie ke ofụri ererimbot nte ntiense ẹnọ kpukpru mme idụt. (Matt. 24:14) Nte isụk inamde utom emi, Jehovah oyom nnyịn idu uwem nte enye oyomde. (1 Pet. 1:14-16) Ana inyịme ndisụhọde idem nnọ kiet eken inyụn̄ idian ubọk inam ẹka iso ẹkwọrọ eti mbụk. (Eph. 5:21) Idahaemi ke ikpenen̄ede ibem iso iyom Obio Ubọn̄ Abasi, utu ke ndibem iso nyom ndinam uduak idem nnyịn. (Matt. 6:33) Edieke itide emi nte isụk idianade kiet ikwọrọ eti mbụk Obio Ubọn̄ Abasi, esịt ayadat nnyịn, Abasi oyonyụn̄ ọdiọn̄ nnyịn ke nsinsi.

¹³ Jehovah osio nnyịn Mme Ntiense esie ke okpụk idiọk ererimbot emi enịm san̄asan̄a man isịn ifịk inam n̄kpọ esie. (Titus 2:14) Nte ituakde ibuot inọ Jehovah anam nnyịn ikpụhọde ye mbon en̄wen. Nnyịn idiana ye nditọete nnyịn ke ofụri ererimbot inam emi, isem edisana usem, inyụn̄ inam se nnyịn ikpepde. Jehovah ama ananam Zephaniah ewet emi enịm. Enye ekewet ete: “Nyanam mme owo ẹkpụhọ ẹsem edisana usem, man kpukpru mmọ ẹseme ẹkot enyịn̄ Jehovah, man ẹnam n̄kpọ esie ke esịt kiet.”—Zeph. 3:9.

¹⁴ Jehovah ama anam Zephaniah ewet n̄kpọ en̄wen emi owụtde ke ikọt Abasi ẹyediana kiet ke eyo nnyịn. Enye ekewet ete: “Amaedi nsụhọ Israel, mmọ idinamke baba ukwan̄ido kiet, idisụhu nsu, owo idinyụn̄ ikwe edeme abian̄a ke inua mmọ; koro mmọ ẹyedia n̄kpọ ẹnyụn̄ ẹnyanade ẹna, ndien ididụhe owo eke edinamde mmọ ẹdịghe.” (Zeph. 3:13) Se inamde ikeme ndidiana kiet ntem nnam utom Abasi edi sia Ikọ Abasi an̄wan̄a nnyịn, imonyụn̄ inyịme ndikabade esịt ndu uwem nte Jehovah ọdọhọde. Nnyịn imanam n̄kpọ emi mme owo ẹkerede ke ikemeke-keme nditịbe. Nnyịn idi san̄asan̄a ikọt Abasi Ibom, emi inọde enye ubọn̄ ke ofụri isọn̄.—Mic. 2:12.