Ndi Amayak Mfịna Emen Fi Emen?

NSO ke akaduak ke ini edem? Ekeme ndidi enyene mme n̄kpọ emi afo okoyomde ndinam, utọ nte ndidọ ndọ, ndikpep utom, m̀mê ndinam n̄kpọ emi ekenen̄erede ọdọn̄ fi. Edi uwem isitiehe nte ikekerede. N̄kpọ oro nnyịn mîkodorike enyịn ekeme nditọ uwem nnyịn ntịmede. Se ikọwọrọde Anja, Delina, ye Gregory edi oro.

• Anja, emi odụn̄de ke Germany, ọkọdọn̄ọ udọn̄ọ kansa ọtọn̄ọde ke ini enye edide isua 21, ndien idahaemi enye isiwọrọke an̄wa aba.

• Delina, emi odụn̄de ke United States, ọdọn̄ọ udọn̄ọ esịp emi ẹkotde dystonia. Udọn̄ọ emi esinam owo nte ndisi. N̄ko, nditọeka esie ita ẹnyene mfịna ke ibuot, ndien enye esise mmọ enyịn.

• Gregory, emi odụn̄de ke Canada, ọdọn̄ọ udọn̄ọ emi esinamde esịt etetịmede owo kpukpru ini.

Okposụkedi n̄kpọ etiede ntem ye Anja, Delina, ye Gregory, mmọ iyakke mfịna mmọ emen mmọ emen. Nso in̄wam mmọ?

Bible ọdọhọ ete: “Nte idem emem fi ke usen nnanenyịn? Odudu fo oyosụhọde.” (Mme N̄ke 24:10) Ọwọrọ etiene nte nnyịn isede mfịna nnyịn. Mbon emi ẹsikerede ke n̄kpọ ọdiọk mmimọ akaha isikemeke ndiyọ mfịna mmọ. Edi mbon emi mîyakke mfịna emen mmọ emen ẹsikeme ndiyọ sia mmọ ẹnịm ke mfịna mmimọ ididịghe ke nsinsi.

Ẹyak ise nte ndinam se isụk itịn̄de emi akan̄wamde Anja, Delina, ye Gregory.