Ke Ubet Ufọk Enyọn̄

EDI okoneyo Thursday idahaemi ke usen iba ẹbede. Jesus ye mme apostle esie 12 ẹdi mi ke akwa ubet ufọk enyọn̄ emi ndidia udia Passover. Owo oro afo okụtde nte ọkpọn̄de edi Judas Is·carʹi·ot. Enye aka ndisian mme oku usụn̄ nte mmọ ẹkemede ndimụm Jesus.

Usen kiet kpọt ke mbemiso, Judas ama etiene mmọ okobụp: ‘Nso ke mbufo ẹdinọ mi edieke n̄n̄wamde mbufo ẹmụm Jesus?’ Mmọ ẹma ẹbọrọ: ‘Okụk silver edịp ye duop.’ Ntre Judas aka ndisịm mme owo emi man enye ekeme ndida mmọ mbịne Jesus. Nte oro idịghe n̄kpọ ndịk?

Udia Passover okụre. Edi Jesus afiak ọtọn̄ọ ata akpan udia efen. Enye ayak ebok uyo kiet ọnọ mme apostle esie onyụn̄ ọdọhọ: ‘Ẹta enye, koro emi ọwọrọ idem mi oro ẹdinọde ke ntak mbufo.’ Ndien enye ọnọ mmọ akrasi wine kiet onyụn̄ ọdọhọ: ‘Ẹn̄wọn̄ enye, koro emi ọwọrọ iyịp mi, oro ẹdiduọkde ke ntak mbufo.’ Bible okot emi ‘Udia Mbubreyo Ọbọn̄.’

Mbon Israel ẹkedia Passover nditi mmọ ini oro angel Abasi ekebede ọkpọn̄ mme ufọk mmọ ke Egypt, edi okowot mme akpan ke ufọk mbon Egypt. Edi idahaemi, Jesus oyom mme anditiene enye eti enye, ye nte enye ọkọnọde uwem esie ke ntak mmọ. Ndien ntak edi oro enye ọdọhọde mmọ ẹkaiso ẹnam usọrọ akpan udia emi kpukpru isua.

Ke ẹma ẹkedia Udia Mbubreyo Ọbọn̄ ẹma, Jesus ọdọhọ mme apostle esie ẹnyene uko ẹnyụn̄ ẹsọn̄ọ ẹda ke mbuọtidem. Ke utịt, mmọ ẹkwọ ikwọ ẹnọ Abasi ndien ẹnyọn̄. Eyo otịm okụt ke emi, ekeme ndidi ebe ufọt okoneyo. Yak nnyịn ise ebiet mmọ ẹkade.