Nte Ẹkenyan̄ade Nsek Moses

SESE ekpri nsek eyen atuade, onyụn̄ omụmde nuenubọk n̄wan oro. Emi edi Moses. Nte ọmọfiok owo oro ediye n̄wan oro edide? Enye edi eyen edidem Egypt, eyenan̄wan Pharʹaoh.

Eka Moses ama odịp nsek eyen esie tutu enye osịm ọfiọn̄ ita, koro enye ikoyomke mbon Egypt ẹwot enye. Edi enye ama ọfiọk ke ẹkeme ndikụt Moses, ntre, ntem ke enye akanam ndinyan̄a enye.

Enye ama ada akpasa kiet esịri enye nte mmọn̄ mikemeke ndidụk. Ndien enye emen Moses esịn, onyụn̄ onịm akpasa oro ke nnyan mbiet ke Akpa Nile. Ekedọhọ Mirʹi·am, eyeneka Moses an̄wan ada ekpeme ndikụt se iditịbede.

Ibịghike eyenan̄wan Pharʹaoh ama edi Akpa Nile ndiyere mmọn̄. Enye ọsọp okụt akpasa oro ke otu mbiet. Enye okot kiet ke otu ifụn iban esie ete: ‘Ka kemen akpasa oko sọk mi.’ Ke eyen edidem ọkụbọrede akpasa oro, nso ediye nsek eyen ke enye okokụt ntem! Ekpri Moses ke akatua, ndien eyen edidem emi ama atua enye mbọm. Enye ikoyomke ẹwot enye.

Ndien Mirʹi·am ama edi, oro afo okụtde ke ndise emi. Mirʹi·am ama obụp eyen Pharʹaoh an̄wan: ‘Nte mmekeme ndikot n̄wan Israel edikama nsek eyen emi ọnọ fi?’

Eyen edidem oro ama ọdọhọ, ‘Mbọk kot.’

Ntre Mirʹi·am ọkọsọp efehe ndisian eka esie. Ke ini eka Moses osịmde, eyen edidem oro ete: ‘Men nsek eyen emi bọk nọ mi, ndien nyekpe fi.’

Ntre, eka Moses ekekpeme eyen esie. Ekem, ke Moses ama okokpon ekem, enye ama ada enye ọsọk eyenan̄wan Pharʹaoh emi akadade enye nte eyen esie. Ntre ke Moses ekedikọri ke ufọk Pharʹaoh.