Akpatre Eti Edidem Israel

JOSIAH edi isua itiaita kpọt ke akabarede edidem esien iba eke usụk Israel. Emi abak akaha owo ndidi edidem. Ntre ke mbemiso n̄kani owo ẹn̄wam enye ndikara idụt oro.

Ke Jo·siʹah ama ekedi edidem ke isua itiaba enye ọtọn̄ọ ndiyom Jehovah. Enye etiene uwụtn̄kpọ nti ndidem nte David, Je·hoshʹa·phat ye Hez·e·kiʹah. Do, ke enye osụk edide ekpri akparawa, Jo·siʹah anam n̄kpọ uko.

Ke anyan ini, ekese nditọ Israel ẹtịm ẹdiọk. Mmọ ẹkpono mme nsunsu abasi. Mmọ ẹnuhọ ẹnọ mme ndem. Ntre Jo·siʹah ye ikọt esie ẹwọrọ ẹtọn̄ọ ndision̄o nsunsu utuak ibuot mfep ke isọn̄. Emi edi akamba utom koro ediwak owo ẹkponode mme nsunsu abasi. Afo emekeme ndikụt Jo·siʹah ye ikọt esie ẹnuakde mme ndem mi.

Ke oro ebede, Jo·siʹah onịm owo ita ndise mban̄a edidiọn̄ temple. Ẹbọ mme owo okụk ẹnọ mbon emi ndikpe nnọ utom oro ẹnamde. Ke mmọ ẹnamde utom ke temple, Hil·kiʹah akwa oku okụt ata akpan n̄kpọ do. Edi ukem n̄wed ibet emi Jehovah akanamde Moses ewet ata anyan ini ko. Enye ama osop ediwak isua.

Ẹda n̄wed emi ẹsọk Jo·siʹah, ndien enye ete ẹkot ẹnọ imọ. Nte enye okopde, Jo·siʹah ekeme ndikụt nte mme owo inịmke ibet Jehovah. Enye otịm ọfụhọ aban̄a emi, ntre enye awai mme ọfọn̄ esie, nte afo ekemede ndikụt mi. Enye ete: ‘Jehovah ayat esịt ye nnyịn, koro mme ete nnyịn mikonịmke mme ibet ewetde ke n̄wed emi.’

Jo·siʹah owụk Hil·kiʹah akwa oku oyom se Jehovah oyomde ndinam ye mmọ. Hil·kiʹah etiene n̄wan oro Hulʹdah, emi edide prọfet an̄wan okobụp enye. Enye ọnọ enye ẹtop emi oto Jehovah ndida nsọk Jo·siʹah: ‘Jerusalem ye kpukpru mme owo ẹyebọ ufen koro mmọ ẹkponode mme nsunsu abasi ndien isọn̄ ọyọhọ ye idiọk. Edi koro afo, Jo·siʹah anamde eti, ufen emi ididịghe tutu afo akpa.’