Ibuot 28

Didie ke N̄keme Ndibọhọ Idan̄ Ukemuduot?

“Ke ini n̄kedide n̄kpọ nte isua 13 esịm 19, ama esidọn̄ mi ndinam idan̄ ye ekemmọ erenowo. Ke esịt mi, mma mfiọk ke utọ udọn̄ oro ikọfọnke.”—Olef.

“Mma ntịm eyenan̄wan kiet emi ekedide ufan mi inua ini kiet m̀mê ikaba. Sia nsụk mmade irenowo, mmesikere m̀mê edidi nnam idan̄ ye irenowo nnam ye iban.”—Sarah.

MFỊN, mme owo isidịpke-dịp inua ke ini ẹtịn̄de ẹban̄a idan̄ ukemuduot nte ẹkesidịpde ediwak isua ko ke edem. Ndien edieke edededei ọdọhọ ke imọ imaha edinam emi, etie nte ediwak owo ẹyenen̄ede ẹsua ẹnọ fi. Amy emi edide isua 16 ọdọhọ ete: “Eyenan̄wan kiet ọkọdọhọ mi ke anaedi nsasua mbon emi ẹtode ebiet en̄wen, sia mmemaha mme adan̄ ukemuduot!”

Edu nnam-se-mmade emi edide ọsọ n̄kpọ mfịn anam ediwak uyen ẹnam idan̄ ukemuduot. Becky emi edide isua 15 ọdọhọ ete: “Ediwak nditọiban ke ufọkn̄wed nnyịn ẹdọhọ ke imesinam idan̄ ye ekemmọ iban, ndusụk ẹte ke esidi inam ye irenowo inam ye iban, mîdịghe ke ikpama nditabi mbiba nse.” Eyenan̄wan en̄wen emi ekerede Christa, emi edide isua 18, ọdọhọ ke edi ntre n̄ko ke ufọkn̄wed mmimọ. Enye ọdọhọ ete: “Nditọiban iba ke ubet ukpepn̄kpọ nnyịn ẹma ẹdọhọ mi ndinam idan̄ ye mmimọ. Kiet ke otu mmọ ama ewet n̄wed ọnọ mi ete m̀mê n̄kpama ndifiọk nte etiede ndinam ima ye ekemmọ an̄wan.”

Sia ẹtịn̄de ẹban̄a idan̄ ukemuduot ke eferife ntem, afo emekeme ndikere: ‘Ndi idan̄ ukemuduot enen̄ede ọdiọk? Nso ke n̄kpanam edieke ọdọn̄de mi ndinam idan̄ ye ekemmọ erenowo m̀mê ekemmọ an̄wan? Ndi oro ọwọrọ ke ndi adan̄ ukemuduot?’

Abasi Ese Didie Idan̄ Ukemuduot?

Mfịn, ediwak owo—idem mme ọkwọrọ ederi—ẹsinam etie nte ke idan̄ ukemuduot idiọkke. Kpa ye oro, Bible kpa Ikọ Abasi, asian nnyịn in̄wan̄-in̄wan̄ ke Jehovah Abasi okobot n̄wan ye erenowo, ye nte ke enye okoyom n̄wan ye ebe kpọt ẹnyene ebuana idan̄. (Genesis 1:27, 28; 2:24) An̄wan̄a ndien ntak emi Bible obiomde idan̄ ukemuduot ikpe.—Rome 1:26, 27.

Ndusụk owo ẹkeme ndidọhọ ke Ikọ Abasi edi n̄kpọ eset. Edi afo ekere ke nso isinam mmọ ẹsọsọp ẹdọhọ ntre? Okûdi edi sia se Bible etịn̄de atuahade ye ekikere mmọ? Ediwak owo ẹsịn Ikọ Abasi n̄kukụre sia se enye ekpepde atuahade ye se mmọ ẹyomde ndinịm ke akpanikọ. Ndidọhọ ke Ikọ Abasi edi n̄kpọ eset idịghe eti ekikere, ndien ikpanaha nnyịn inyene utọ ekikere oro!

Edi nso edieke edide esidọn̄ fi ndinam idan̄ ye erenowo nte afo m̀mê n̄wan nte afo? Ndi oro ọwọrọ ke afo edi adan̄ ukemuduot? Baba. Ti ke afo osụk odu ke “ini nsehe uyen,” kpa ini emi idem ekemede ndidaha fi ini ekededi. (1 Corinth 7:36) Edieke edide esidọn̄ fi ndusụk ini ndinam idan̄ ye erenowo nte afo m̀mê n̄wan nte afo, fiọk ete ke oro iwọrọke ke edi adan̄ ukemuduot. Utọ udọn̄ oro isiwakke ndibịghi. Edi inaha etiene anam idan̄ ukemuduot. Didie ke ekeme ndibọhọ?

Sịn n̄kpọ emi ke akam. Ukem nte David, ben̄e Jehovah ete: “O Abasi, dụn̄ọde mi nyụn̄ fiọk esịt mi. Domo mi se, nyụn̄ fiọk ekikere mi, nyụn̄ se m̀mê idiọk ekikere odu mi ke esịt, ndien da mi san̄a ke nsinsi usụn̄.” (Psalm 139:23, 24) Jehovah ekeme ndisọn̄ọ fi idem ke ndinọ fi emem emi “akande kpukpru ekikere.” Emem emi ‘eyekpeme fi esịt ye ekikere’ onyụn̄ ọnọ fi “odudu eke ebede ukeme owo” mbak udunam idiọkn̄kpọ oro ọdọn̄de fi.—Philippi 4:6, 7; 2 Corinth 4:7.

Kere nti n̄kpọ. (Philippi 4:8) Kot Bible kpukpru usen. Kûkere ke enye ikemeke ndin̄wam fi anam nti n̄kpọ. (Mme Hebrew 4:12) Akparawa kiet emi ekerede Jason ọdọhọ ete: “Bible—esịnede utọ itien̄wed nte 1 Corinth 6:9, 10 ye Ephesus 5:3—an̄wam mi etieti. Mmesikot mme itien̄wed emi ini ekededi oro ndiọi udọn̄ ẹtọn̄ọde ndidụk mi esịt.”

Kûse ndise idan̄, nyụn̄ sọn se ededi oro esịnde udọn̄ ọnọ idan̄ ukemuduot. (Colossae 3:5) Kûnam n̄kpọ ekededi oro ekemede ndidemede fi udọn̄ idan̄. Emi esịne ndise idan̄, ndusụk edinam TV ye fim, ye idem mme magazine oro ẹwụtde usịnen̄kpọ eyomfịn ye nte ẹsịn̄erede idem, emi ẹsiwụtde mme ọwọrọiso owo emi ẹsịnede n̄kpọ oro mînen̄ekede ifụk mmọ. Domo ndikere nti n̄kpọ utu ke ndikere ndiọi n̄kpọ oro ẹdụkde fi esịt. Uyen kiet ọdọhọ ete: “Ini ekededi oro ọdọn̄de mi ndinam idan̄ ye erenowo nte ami, mmesitie n̄kere mme itien̄wed Bible oro mmade n̄kan.”

Edi ndusụk owo ẹsidọhọ ke ufọn idụhe ndinam kpukpru oro, ke akpana ‘ada idemfo nte okụtde’ onyụn̄ ‘anam orụk idan̄ ekededi oro ọdọn̄de fi.’ Edi Bible ọdọhọ ke emekeme ndikan utọ udọn̄ oro! Ke uwụtn̄kpọ, enye asian nnyịn ke ndusụk mme Christian eyo mme apostle emi ẹkedide mme adan̄ ukemuduot ẹma ẹkpụhọde. (1 Corinth 6:9-11) Afo n̄ko emekeme ndikpụhọde—idem ọkpọkọm ndiọi udọn̄ emi ẹdu fi ke ekikere kpọt.

Nso ke akpanam edieke osụk ọdọn̄de fi ndinam idan̄ ye erenowo nte afo m̀mê n̄wan nte afo? Kûyak idem unọ udọn̄ emi! Jehovah ọdọhọ ke idan̄ ukemuduot ifọnke. Ntem, owo oro an̄wanade ndikan udọn̄ edinam idan̄ ye erenowo nte enye m̀mê n̄wan nte enye osụk ekeme ndimek n̄kpọ kiet—nditre ndinam orụk idan̄ emi.

Ke uwụtn̄kpọ: Owo ekeme ndidi “owo ifụtesịt.” (Mme N̄ke 29:22) Ekeme ndidi enye ama esisọp iyatesịt ke ini edem. Edi ke ama ekedikpep Bible, enye edifiọk ke oyom ifara ke idem. Ndi emi ọwọrọ ke tutu amama esịt idiyatde enye aba? Baba. Sia enye ọfiọkde se Bible etịn̄de aban̄a ibụmede ibụmede iyatesịt, enye eyenen̄ede esịn ukeme mbak edibụmede ayat esịt.

Kpa ntre n̄ko ke edi ye owo emi esinyenede udọn̄ ndinam idan̄ ye erenowo nte enye m̀mê n̄wan nte enye, edi emi ekpepde idahaemi se Bible etịn̄de aban̄a idan̄ ukemuduot. Enye ekeme ndinyene udọn̄ emi ke ini ke ini. Edi edieke owo esede idan̄ ukemuduot nte Jehovah esede, enye idiyakke idem inọ idiọk udọn̄ emi.

Kûyak Idem Emem Fi!

Edieke an̄wanade nditre udọn̄ edinam idan̄ ye erenowo nte afo m̀mê n̄wan nte afo, ekeme nditie fi ke idem nte eketiede akparawa kiet emi ọkọdọhọde: “Mmodomo ndisio ekikere mfep ke n̄kpọ emi. Mmọbọn̄ akam nte Jehovah an̄wam mi. Mmesikot Bible. Mmesikop mme utịn̄ikọ emi ẹban̄ade idan̄ ukemuduot. Edi mfiọkke se n̄kpanamde aba.”

Edieke esitiede fi n̄ko ntre ke idem, oro ọwọrọ ke se inade fi ke iso idịghe ifia ubọk kiet. Udûkemeke nditre mmemmem mmemmem. Edi owo ekededi oro oyomde ndinem Abasi esịt ana odu uwem nte Abasi oyomde okûnyụn̄ etiene anam oburobụt edinam, idem okposụkedi oro edisọn̄de enye. Kûdedei ufre ke Abasi ọfiọk ukeme oro afo esịnde ndinam se inende ye nte ke enye esitua mbon oro ẹnamde n̄kpọ esie mbọm.a (1 John 3:19, 20) Ke ini enịmde Ibet Abasi, enye ọyọdiọn̄ fi. Ke nditịm ntịn̄, “akwa udori odu” ke ndinịm Ibet Abasi. (Psalm 19:11) Idem idahaemi, afo oyokop inem uwem ke ererimbot emi ọyọhọde ye afanikọn̄ mi.

Ntre buọt idem ye Abasi, nyụn̄ n̄wana ye idiọk udọn̄. (Galatia 6:9) Domo ‘ndisua se idiọkde’ nyụn̄ ‘yịre ke se ifọnde.’ (Rome 12:9) Edieke esịnde ukeme, idiọk udọn̄ oro ekeme ndisụhọde nte ini akade. Se ikam ifọnde ikan edi ke edieke etrede idan̄ ukemuduot, afo eyenyene idotenyịn edidu uwem ke nsinsi ke edinen obufa ererimbot Abasi.

[Ikọ Idakisọn̄]

AKPAN ITIE N̄WED ABASI

“Domo mi se, nyụn̄ fiọk ekikere mi, nyụn̄ se m̀mê idiọk ekikere odu mi ke esịt.”​—Psalm 139:23, 24.

ITEM

Man ọfiọk nnennen usụn̄ oro erenowo ekpesede idemesie, kpebe Jesus. (1 Peter 2:21) Enye ama enịm mfọnmma uwụtn̄kpọ ke nte erenowo akpadade odudu esie anam n̄kpọ ke sụn̄sụn̄ ido.

NDI AMA ỌFIỌK . . . ?

Okposụkedi emi mûkemeke ndibiere ofụri ofụri se ididọn̄de fi, emekeme ndibiere se edinamde. Emekeme ndibiere ke udunamke idiọkn̄kpọ oro ọdọn̄de fi.

SE NDINAMDE

Edieke owo obụpde mi ntak emi Bible akpande idan̄ ukemuduot, se ndibọrọde enye edi ․․․․․

Edieke owo ọdọhọde ke se Bible etịn̄de aban̄a idan̄ ukemuduot iwụtke eti ibuot, se ndibọrọde enye edi ․․․․․

Se ndibụpde ete m̀mê eka mi mban̄a n̄kpọ emi edi ․․․․․

AFO EKERE DIDIE?

● Ntak emi Abasi asuade idan̄ ukemuduot?

● Nso ye nso ke akpanam mbak owo editap fi etiene anam idan̄ ukemuduot?

● Ndi ndisua idan̄ ukemuduot nte Abasi asuade ọwọrọ ke asasua mme adan̄ ukemuduot?

[Se ẹwetde ke ikpọ abisi ke page 236]

“Idiọk ekikere oro mbon ererimbot ẹnyenede ẹban̄a idan̄ ama etịmede mi, ikonyụn̄ iyakke mfiọk m̀mê ndi adan̄ ukemuduot m̀mê ndịghe. Idahaemi, n̄kpekpeme idem ye n̄kpọ ekededi m̀mê owo ekededi oro esịnde udọn̄ ọnọ idan̄ ukemuduot.”​—Anna

[Ndise ke page 233]

Ana kpukpru uyen ẹmek n̄kpọ kiet—edide nditiene mbon ererimbot nnyene idiọk ekikere nte ke owo ekeme ndinam idan̄ nte amama m̀mê ndidu uwem nte Ikọ Abasi etemede