Ibuot 8

Didie ke N̄keme Ndinyene Nti Ufan?

“Ke ini esịt ayatde mi, mmesiyom owo emi n̄kpetịn̄de nnọ. Ke ini mfụhọde, mmesiyom owo emi ọkpọdọn̄de mi esịt. Ke ini esịt onyụn̄ enemde mi, mmesiyom owo emi ekpetienede mi adara. N̄kere ke ana owo enyene ufan.”—Brittany.

ẸSIDỌHỌ ke n̄kpri nditọ ẹsiyom mbon mbre, ke adan̄aemi n̄kparawa m̀mê n̄kaiferi ẹsiyomde mme ufan. Didie ke ufan okpụhọde ye owo mbre?

Owo mbre fo edi owo emi esibrede mbre ntre.

Ufan fo edi owo emi amade se afo amade.

Ke adianade do, Bible ọdọhọ ke “ata ufan amama ufan kpukpru ini, onyụn̄ edi eyeneka emi amanade ọnọ ini nnanenyịn.” (Mme N̄ke 17:17) Orụk ufan emi ẹtịn̄de ẹban̄a do akan enye oro afo ekenyenede ke an̄wambre ke ini ekedide eyenọwọn̄.

Se idude: Nte okponde owo, afo omoyom mme ufan emi

1. Ẹnyenede nti edu

2. Ẹdade nti edumbet ẹdu uwem

3. Ẹn̄wamde fi anam nti n̄kpọ

Mbụme: Didie ke afo ekeme ndikụt mme ufan oro ẹtiede ntre? Yak idụn̄ọde mme n̄kpọ emi kiet kiet.

Orụk Ufan Emi Okpoyomde #1 Mme Ufan Emi Ẹnyenede Nti Edu

Se akpanade ọfiọk. Idịghe kpukpru mbon oro ẹdọhọde ke idi ufan ẹsidi ata ufan. Bible akam ọdọhọ ke “odu mme nsan̄a emi ẹbiatde kiet eken.” (Mme N̄ke 18:24) Emekeme ndikere ke oro ikemeke nditịbe. Edi kere ise: Ndi akanam enyene owo emi akanamde nte idi ufan fo sia ekekerede ke iyadia ufọn ito fi? Nso kaban̄a inua-okot ufan emi esimade ndiban̄a fi ke edem m̀mê nditịn̄ ikọ mbiat fi? Utọ n̄kpọ oro ekeme ndinam etre ndibuọt idem ye owo oro.a Ti ete ke ibat ufan oro afo enyenede ikam idịghe akpan n̄kpọ nte orụk owo oro mmọ ẹdide.

Se akpanamde. Mek mbon oro ẹnyenede mme edu oro odotde ẹkpebe nte ufan fo.

“Kpukpru owo ẹsitịn̄ nti ikọ ẹban̄a ufan mi Fiona. Nyom mme owo ẹtiene ẹtịn̄ nti ikọ ẹban̄a mi n̄ko. Nyom nditie nte enye. Ido esie eye mi etieti.”—Yvette emi edide isua 17.

Nam emi ise.

1. Kot Galatia 5:22, 23.

2. Bụp idemfo, ‘Ndi mme ufan mi ẹnyene mme edu emi ẹsịnede ke “mbun̄wụm spirit”?’

3. Wet enyịn̄ mme n̄kpet n̄kpet ufan fo ke idak emi. Ekem, wet edu mmọ kiet kiet dian enyịn̄ mmọ.

Enyịn̄ Edu

․․․․․ ․․․․․

Ekikere oro ẹnọde: Edieke edide ndiọi edu mmọ kpọt ke afo eti, ọkpọfọn ọtọn̄ọ ndiyom mme ufan oro ẹnyenede nti edu.

Orụk Ufan Emi Okpoyomde #2 Mme Ufan Emi Ẹdade Nti Edumbet Ẹdu Uwem

Se akpanade ọfiọk. Edieke oyomde ufan ke mbrenyịn, udunyeneke eti ufan. Bible ọdọhọ ete: “Ọyọdiọk ye owo eke odụkde nsan̄a ye mme ndisịme.” (Mme N̄ke 13:20) “Mme ndisịme” oro ẹtịn̄de mi idịghe mbon oro mîsibehe udomo m̀mê mbon oro mîfiọkke n̄wed. Utu ke oro, mmọ ẹdi mbon oro ẹsịnde nti item ẹnyụn̄ ẹdude oburobụt uwem. Idịghe utọ ufan oro ke afo oyom!

Se akpanamde. Kûnam ufan ye owo ekededi oro okụtde, edi sasat mbon oro adade anam ufan. (Psalm 26:4) Nte ededi, oro iwọrọke ke ana asari owo. Ndisasat mme ufan fo nte ẹtịn̄de mi ọwọrọ ke emekeme ndikụt “ukpụhọde ke ufọt edinen owo ye idiọkowo, ye ke ufọt owo emi anamde n̄kpọ Abasi ye owo emi mînamke n̄kpọ esie.”—Malachi 3:18.

“Esịt enem mi sia ete ye eka mi ẹma ẹn̄wam mi nnyene nti ufan, oro edi, mme uke mi oro ẹnen̄erede ẹma ndinam n̄kpọ Abasi.”—Christopher emi edide isua 13.

Bọrọ mme mbụme oro ẹtienede mi:

Ke ini ndude ye mme ufan mi, ndi idem esinyek mi ke mmọ ẹyedomo ndinyịk mi nnam se mfiọkde ke ifọnke?

□ Ih

□ Ihih

Ndi mmesimen̄e ndiwụt ete ye eka mi mme ufan mi sia n̄kerede ke mmọ idinyịmeke nnam ufan ye mmọ?

□ Ih

□ Ihih

Ekikere oro ẹnọde: Edieke ọkọbọrọde ih ke mbụme iba oro ẹbụpde ke enyọn̄ emi, yom mme ufan oro ẹtienede mme edumbet N̄wed Abasi—mbon oro ẹnịmde nti uwụtn̄kpọ ke ndidu uwem nte mme Christian.

Orụk Ufan Emi Okpoyomde #3 Mme Ufan Emi Ẹdin̄wamde Fi Anam Nti N̄kpọ

Se akpanade ọfiọk. Bible ọdọhọ ete: “Idiọk nsan̄a ababiat eti ido.” (1 Corinth 15:33) Uyen kiet emi ekerede Lauren ọdọhọ ete: “Adan̄a nte nnamde se mme nsan̄a ufọkn̄wed mi ẹdọhọde nnam, mmọ ẹsima mi. Sia n̄kesikopde ndobo, mma mbiere nditiene nnam se mmọ ẹnamde man mmọ ẹma mi.” Lauren ama edikụt ke edieke owo esinamde se mbon en̄wen ẹdọhọde enye anam, ke owo oro editie nte nsa emi mme andibre ẹnụkde ẹka ebiet ekededi oro mmọ ẹmade. Idịghe utọ ufan oro ke afo oyom.

Se akpanamde. Tre nsan̄a ye mbon oro ẹyịrede fi ẹte etiene odu uwem nte mmimọ. Edieke anamde oro, ekeme ndidi mme ufan fo idiwakke aba. Nte ededi, esịt eyenem fi, oyonyụn̄ enyene ifet ndinam nti ufan—mme ufan oro ẹdin̄wamde fi anam nti n̄kpọ.—Rome 12:2.

“Clint emi edide ata ufan mi ọdiọn̄ọ idem onyụn̄ esikere aban̄a mbon en̄wen, ndien enye esinen̄ede esịn udọn̄ ọnọ mi.”—Jason emi edide isua 21.

Bụp idemfo mme mbụme oro ẹtienede mi:

Ndi mmesikpụhọ nte nsịnede ọfọn̄, nte ntịn̄de ikọ, mîdịghe ndi mmesinam n̄kpọ ke usụn̄ oro mîfọnke man nnem mme ufan mi esịt?

□ Ih

□ Ihih

Ndi mmesika mme itie oro mîfọnke, oro mmen̄kpakaha ke mîkpedịghe mme ufan mi?

□ Ih

□ Ihih

Ekikere oro ẹnọde: Edieke ọbọrọde ih ke mbụme iba oro ẹsụk ẹbụpde mi, ka bịne ete ye eka fo, mîdịghe ka bịne owo en̄wen emi ọkọride ẹsịm ọyọhọ idaha man enye ọnọ fi item. Edieke afo edide kiet ke otu Mme Ntiense Jehovah, emekeme ndika mbịne ebiowo n̄kọdọhọ enye ke ikpama enye an̄wam imọ imek nti ufan oro ẹdin̄wamde imọ inam nti n̄kpọ.

KOT N̄KPỌ EFEN EFEN BAN̄A IBUOTIKỌ EMI KE IBUOT 9 KE ỌYỌHỌ EBOHO 2

[Ikọ Idakisọn̄]

AKPAN ITIE N̄WED ABASI

“Odu ufan emi adianade owo akan eyeneka.”​—Mme N̄ke 18:24.

ITEM

Da ndinen edumbet du uwem, ndien mbon oro ẹdomode nditiene nnam ntre ẹyedian idem ye afo. Mbufo ẹyekabade ẹdi ata ufan!

NDI AMA ỌFIỌK . . . ?

Abasi inamke asari, edi enye esisasat mbon oro enye enyịmede ẹdi ‘esen ke tent esie.’—Psalm 15:1-5.

SE NDINAMDE

Se ndinamde man nnyene nti ufan edi ․․․․․

Ndusụk mbon oro ẹsọn̄ọde mi, oro n̄kpamade nditịm mmehe ẹdi ․․․․․

Se ndibụpde ete ye eka mi mban̄a n̄kpọ emi edi ․․․․․

AFO EKERE DIDIE?

● Mme edu ewe ke afo ekpenen̄ede oyom ufan fo enyene, ndien ntak?

● Mme edu ewe ke oyom okpụhọde man edi eti ufan?

[Se ẹwetde ke ikpọ abisi ke page 60]

“Ke ini ete ye eka mi ẹkedọhọde ntre ndụk ye ndusụk ufan mi, n̄kekere ke mmọ ẹdi n̄kukụre mbon oro n̄kemede ndidụk nsan̄a. Edi item ete ye eka mi ama ọfọn; ke enyịn ama akan̄wan̄a mi, mma ndikụt ke ediwak nti ufan ẹdu.”​—Cole

[Ekebe ke page 61]

Domo Mme Ekikere Oro Ẹnọde Mi Se

Nyene nneme ye ete ye eka fo ban̄a orụk ufan emi ekpenyenede. Bụp mmọ orụk ufan oro mmọ ẹkenyenede ke ini mmọ ẹkedade nte afo. Ndi mmọ ẹsitua n̄kpọfiọk ẹban̄a mbon oro mmọ ẹkedụkde nsan̄a? Edieke edide ntre, ntak-a? Dọhọ mmọ ẹsian fi nte afo ekpefepde ndusụk mfịna oro mmọ ẹkesobode.

Men mme ufan fo kowụt ete ye eka fo. Edieke emen̄ede ndinam emi, bụp idemfo ete, ‘Ntak emi mmen̄ede?’ Ndi enyene se mme ufan fo ẹsinamde oro ọfiọkde ke ete ye eka fo idimaha? Edieke edide ntre, ekeme ndidi oyoyom enen̄ede asat mbon oro emekde nte mme ufan fo.

Nen̄ede kpan̄ utọn̄. Wụt ke emekere aban̄a mme ufan fo ye mme n̄kpọ oro ẹfịnade mmọ.—Philippi 2:4.

Fen nọ. Kûyom mme ufan fo ẹfọn ẹma. “Kpukpru nnyịn idedue ediwak ini.”—James 3:2.

Kûyom ndisidu kpukpru ini ye ufan fo. Ufọn idụhe ndiyịre ufan fo ke idem n̄kaha. Nti ufan ẹyedu ye afo ke ini oro oyomde mmọ.—Ecclesiastes 4:9, 10.

[Ndise ke page 63]

Edieke anamde se mbon en̄wen ẹmade man mmọ ẹma fi, ọwọrọ afo etie nte nsa emi mme andibre ẹnụkde ẹka ebiet eke mmọ ẹmama

Ibuot 9

Didie ke N̄keme Ndikan Idomo?

Iyọhọke kan̄a minit duop tọn̄ọ Karen ekedisịm itie usọrọ, ndien enye okụt nte n̄kparawa iba ẹkamade ikpọ ẹkpat ẹdụk ẹdi. Enye ọfiọk se idọn̄ọde ke ekpat oro. Enye ama okop ke inọ utọn̄ nte n̄kparawa oro ẹdọhọde ke “ẹyen̄wọn̄ n̄kpọ eti eti” ke itie usọrọ oro.

Etise, Karen okop uyo owo emi enye ọdiọn̄ọde ke edem esie. “Edisana Mary, adada ntre anam nso?” Karen ọwọn̄ọde iso okụt Jessica ufan esie akamade ekpeme beer iba oro mîbịghike ẹkefahade. Jessica anyan ekpeme kiet ọnọ Karen onyụn̄ ọdọhọ enye ete, “Bọ do, kûdọhọ ke emekpri akaha nditiene ndia uwem.”

Karen oyom ndisịn. Edi imemke utom ndisịn nte enye ekekerede. Jessica edi ufan esie, ndien Karen iyomke ndinam enye ekere ke imọ idi . . . “Edisana Mary” nte Jessica okokotde enye. Idem n̄kpọ, n̄kọ Jessica idiọkke nte nditọiban eken. Ntem, edieke enye ọn̄wọn̄de mmịn, nso idiọk ke ami nditiene n̄n̄wọn̄? Karen ekere ke esịt esie ete, ‘N̄kọ beer kpọt ke edi. Owo idọhọke nda ọkpọsọn̄ ibọk m̀mê nnam idan̄.’

MME uyen ẹsisobo nsio nsio idomo. Mme idomo emi ẹsiwak ndito owo isio uduot. Ramon emi edide isua 17 ọdọhọ ete: “Nditọiban ke ufọkn̄wed nnyịn ẹsiyịre owo ẹkakaha. Mmọ ẹsima nditụk erenowo ẹnyụn̄ ẹkama enyịn ẹse m̀mê enye ayayak mmimọ ika anyan ikan oro. Mmọ isinyịmeke nditre idem edieke ọdọhọde mmọ ẹtre!” Deanna emi edide isua 17 n̄ko ama okụt ke se ẹtịn̄de emi edi akpanikọ. Enye ọdọhọ ete: “Akparawa kiet ama asan̄a edi edidori mi ubọk ke afara. Mma nnen̄ede ntọ enye ubọk oro nnyụn̄ ndọhọ enye nte: ‘Nso mbre idi oro? Ndiọn̄ọke fi akanam!’”

Afo n̄ko emekeme ndisobo idomo, ndien ekeme nditie fi nte idomo emi idisụhọkede ubọk. Uyịre uyịre idomo etie nte owo ndiyịre n̄kọn̄ usụn̄ ufọk fo okposụkedi mûmaha ndiberede. Ndi omosobo idomo akan nte ekekerede? Ke uwụtn̄kpọ, ndi ẹsidomo fi mîdịghe ndi esidọn̄ fi ndinam ekededi ke otu mme n̄kpọ oro ẹsiakde mi?

□ Edin̄wọn̄ sika

□ Edise ndise idan̄

□ Edin̄wọn̄ ọkpọsọn̄ mmịn

□ Edinam idan̄

□ Edida n̄kpọsọn̄ ibọk

□ N̄kpọ en̄wen ․․․․․

Edieke esịnde idiọn̄ọ emi ✔ ekpere ekededi ke otu n̄kpọ oro ẹsiakde ke enyọn̄ emi, kûkere ke imọ idikemeke ndidi Christian. Afo emekeme ndikpep ndikara ndiọi udọn̄ nnyụn̄ n̄kan idomo. Didie ke akpanam oro? Ọfọn ọdiọn̄ọ se isinamde owo anam idiọkn̄kpọ. Kere ban̄a n̄kpọ ita.

1. Unana mfọnmma. Esidọn̄ kpukpru mme anana-mfọnmma owo ndinam idiọkn̄kpọ. Idem owo nte apostle Paul, emi ekedide Christian oro ọkọride esịm ọyọhọ idaha, ama etịn̄ in̄wan̄-in̄wan̄ ete: “Ke ini nyomde ndinam se inende, se idiọkde odu ye ami.” (Rome 7:21) Ke ini ke ini, “se idọn̄de obụkidem ye se idọn̄de enyịn” akam ekeme ndifịna ata eti owo. (1 John 2:16) Edi ndika iso ntie n̄kere nte akpanamde idiọkn̄kpọ oro ọdọn̄de fi edikam ananam enen̄ede ọsọn̄ fi ndikan idomo, koro Bible ọdọhọ ete: “Ke ini udọn̄ emi oyomode, aman idiọkn̄kpọ.”—James 1:15.

2. Mme n̄kpọ etabi. Idomo ẹkakan fi ẹkụk. Trudy ọdọhọ ete: “Ke ufọkn̄wed ye ke itieutom, mme owo ẹsineme nneme ẹban̄a idan̄ kpukpru ini. Ke TV ye ke fim, ẹsinam enye etie nte eti n̄kpọ, nte n̄kpọ emi enemde etieti. Owo isiwakke ndiwụt ndiọi utịp esie!” Se iketịbede inọ Trudy ke idemesie ama anam enye ọfiọk adan̄a nte udọn̄ edikpebe ubọkn̄ka ye ndutịm usuanetop ẹnyenede odudu. Enye eti se iketịbede ete: “Ke ini n̄kedide isua 16, ami ye akparawa kiet ikekere ke imenen̄ede ima idem nnyịn. Eka mi ama odụri mi utọn̄ ke edieke mmen̄kpemeke idem ye akparawa oro, ke nyoyomo. Ama anam mi ndịk ndikop nte eka mi etịn̄de utọ ikọ oro ye ami! Edi ke ọfiọn̄ iba ẹma ẹkebe, mma nyomo.”

3. “Mme udọn̄ ini uyen.” (2 Timothy 2:22) Udọn̄ ini uyen ekeme ndisịne udọn̄ ekededi oro n̄kparawa owo ẹsinyenede, utọ nte ndiyom mbon en̄wen ẹma mmọ m̀mê ndiyom mbon en̄wen ẹda mmọ nte ikpọ owo. Mme udọn̄ oro idiọkke, edi edieke owo mîkpemeke idem, mmọ ẹkeme ndinam enen̄ede ọsọn̄ ndikan idomo. Ke uwụtn̄kpọ, edieke oyomde ndinam mme owo ẹda fi nte akwa owo, oro ekeme ndinam fi ọkpọn̄ nti ido oro ẹkekpepde fi ke ufọk. Se Steve akanamde edi oro ke ini enye ekedide isua 17. Enye ọdọhọ ete, “Mma nsọn̄ ibuot ye ete ye eka mi nnyụn̄ nnam kpukpru n̄kpọ oro mmọ ẹkedọhọde n̄kûnam—n̄kanam kpukpru emi esisịt ini ke mma n̄kana baptism.”

Nte Akpakande Idomo

Imọfiọk ke mme n̄kpọ oro ẹtịn̄de ke enyọn̄ emi ẹnyene odudu etieti. Kpa ye oro, afo emekeme ndikan idomo. Didie ke ekeme ndinam oro?

● Akpa kan̄a, diọn̄ọ idomo oro esinen̄erede ọsọn̄ fi ndikan. (Eyedi emesesịn idiọn̄ọ ekpere kiet ke otu mme idomo oro ẹkesiakde ke page 65.)

● Ekem bụp idemfo ete, ‘Ini ewe ke nsisobo idomo emi?’ Sịn idiọn̄ọ emi ✔ kpere kiet ke otu mme ini oro ẹwụtde ke idak emi:

□ Ke ini ndude ke ufọkn̄wed

□ Ke ini ndude ikpọn̄

□ Ke ini ndude ke itieutom

□ Ini en̄wen ․․․․․

Ndidiọn̄ọ ini emi ekemede ndisobo idomo ekeme ndin̄wam fi efep enye ofụri ofụri. Ke uwụtn̄kpọ, kere ban̄a se iketịbede inọ Karen ke ntọn̄ọ ntọn̄ọ ibuotikọ emi. Nso ikpakanam Karen ọfiọk ke imekeme ndisobo idomo ke itie usọrọ oro imọ iyomde ndika?

․․․․․

Didie ke enye ekpekefep idomo oro ofụri ofụri?

․․․․․

● Ke emi ama ọkọfiọk idomo oro esinen̄erede ọsọn̄ fi ndikan onyụn̄ ọfiọk ini emi ekemede ndisobo enye, afo emeben̄e idem ndinam n̄kpọ man akan idomo oro. Se ekpebemde iso anam ekpedi ndiyom usụn̄ nte akpanamde idomo oro osụhọde ubọk m̀mê nte ekpefepde enye ofụri ofụri. Wet se akpanamde ke idak emi.

․․․․․

(Mme uwụtn̄kpọ: Edieke edide emesiwak ndisobo ye nditọ ufọkn̄wed mbufo emi ẹsidọhọde fi etiene mmimọ ọn̄wọn̄ sika ke n̄wed ama akasuana, emekeme ndisan̄a usụn̄ en̄wen nnyọn̄ mbak udusobo mmọ. Edieke edide ẹsiwak ndinọ ndise idan̄ ẹsọk fi ke Intanet okposụkedi emi mûyomke, emekeme ndisịn ndutịm kọmputa oro edinamde kọmputa fo etre ndibọ etop nto owo oro esinọde fi orụk etop oro onyụn̄ etre ndibọ nto mme ikpehe Intanet eken oro ẹsinọde utọ etop oro. N̄ko-n̄ko, ekeme ndiyom enen̄ede etịn̄ enyịn ke ini emekde mme ikọ oro adade oyom n̄kpọ ke Intanet.)

Nte ededi, udukemeke ndifep kpukpru idomo. Ebebịghi awawara, akamba idomo eyesịm fi—eyedi ke ini emi mûdorike enyịn. Nso ke ekeme ndinam mban̄a oro?

Du ke Mben̄eidem

Jesus ama ọsọsọp asua ọnọ Satan ke ini Satan okodomode enye. (Mark 1:13) Ntak-a? Koro Jesus ama ọfọfiọk owo emi enye adade ọnọ. Enye ama ebebiere ndikop uyo nnọ Ete esie kpukpru ini. (John 8:28, 29) Enye ikanamke mbubru ke ini enye ọkọdọhọde ete: “N̄koto heaven nsụhọde ndi, idịghe man ndinam uduak idemmi, edi man ndinam uduak enye emi ọkọdọn̄de mi.”—John 6:38.

Ke ufan̄ oro ẹnịmde ke page oro etienede, wet ntak iba oro afo ọkpọbiọn̄ọde idomo oro esiwakde ndisobo ye n̄kpọ iba emi akpanamde man an̄wam fi akan idomo oro.

Ntak emi afo ọkpọbiọn̄ọde idomo:

1 ․․․․․

2 ․․․․․

Mme n̄kpọ oro afo edinamde man an̄wam fi akan idomo oro:

1 ․․․․․

2 ․․․․․

Ti ete ke edieke ayakde idem ọnọ idomo, ke omodụk ufụn ọnọ mme udọn̄ fo. (Titus 3:3) Ntak emi akpayakde mme udọn̄ fo ẹkara fi? Wụt ke omokpon ekem ndikara mme udọn̄ fo utu ke ndiyak mmọ ẹkara fi. (Colossae 3:5) N̄ko, bọn̄ akam man ekeme ndika iso nnam ntre.—Matthew 6:13.a

KOT N̄KPỌ EFEN EFEN BAN̄A IBUOTIKỌ EMI KE IBUOT 15 KE ỌYỌHỌ EBOHO 2

[Ikọ Idakisọn̄]

AKPAN ITIE N̄WED ABASI

“Abasi edi anam-akpanikọ, idinyụn̄ iyakke ẹdomo mbufo ẹbe se mbufo ẹkemede ndiyọ, edi enye oyosio usụn̄ ubọhọ ọnọ mbufo ke ini idomo man mbufo ẹkeme ndiyọ enye.”—1 Corinth 10:13.

ITEM

Da ikpehe emi ẹkotde “Peer-Pressure Planner” (Se Ndinamde ke Ini Mme Uke Mi Ẹyomde Nnam Se Mîfọnke) oro odude ke page 132 ye 133 ke Mme Mbụme Oro N̄kparawa Owo Ẹbụpde—Mme Ibọrọ Oro Ẹnyenede Ufọn, Eboho 2, tịm se editịn̄de ke ini owo odomode ndinụk fi anam idiọkn̄kpọ.

NDI AMA ỌFIỌK . . . ?

Abasi ama ebem iso etịn̄ ke Jesus ayanam akpanikọ, edi oro iwọrọke ke Jesus eketie nte owo ukwak emi mme andibot ẹbierede kpukpru se enye edinamde. Utu ke oro, Jesus ama enyene ifụre ndimek se enye edinamde. Enye ekemek ndinam akpanikọ—idịghe nte ke ẹma ẹbebem iso ẹbiere se enye edinamde. Emi edi kiet ke otu ntak oro enye ekesibọn̄de akam ifịk ifịk ke ini idomo.—Mme Hebrew 5:7.

SE NDINAMDE

Man n̄keme ndinen̄ede mbiọn̄ọ idomo, se ndinamde edi ․․․․․

Mme owo, ebiet, ye idaha oro anade mfep ẹdi ․․․․․

Se ndibụpde ete ye eka mi mban̄a n̄kpọ emi edi ․․․․․

AFO EKERE DIDIE?

● Ndi ẹkeme ndidomo mfọnmma owo? —Genesis 6:1-3; John 8:44.

● Ke ini akande idomo, didie ke mbon en̄wen ẹbọ ufọn ẹto edinam akpanikọ fo? —Mme N̄ke 27:11; 1 Timothy 4:12.

[Se ẹwetde ke ikpọ abisi ke page 68]

“Se in̄wamde mi n̄kan idomo edi ndifiọk ke Owo emi okopde odudu akan ke ofụri ekondo odu ye ami ye nte ke mmekeme ndiben̄e enye an̄wam mi ini ekededi!”​—Christopher

[Ekebe/​Ndise ke page 67]

Nam N̄kpọ Emi Se Ise

Men ekanem mbakara m̀mê se ẹkotde compass nịm nyụn̄ nam ubọk esie ese edem edere. Ndien, men maknet nịm kpere ekanem mbakara oro. Nso itịbe? Ubọk esie esịk ọkpọn̄ nnennen itie oro enye okpodude, ediwọn̄ọde ese maknet oro.

Ubieresịt fo etie nte ekanem mbakara oro. Edieke etịmde ọnọ enye ukpep, enye ọyọnọ fi nnennen ndausụn̄ onyụn̄ an̄wam fi anam nti ubiere. Edi idiọk nsan̄a etie nte maknet emi esidụride n̄kpọ ada; enye ekeme nditịmede fi tutu ukemeke aba ndifiọk se ifọnde ye se idiọkde. Nso ke ekpep oto emi? Domo ndifep mme owo ye mme idaha oro ẹkemede ndinam fi etre ndinam se inende.—Mme N̄ke 13:20.

[Ndise ke page 69]

Edieke ayakde idem ọnọ idomo, omodụk ufụn ọnọ mme udọn̄ fo