Nte Ẹtịmde Ẹnyụn̄ Ẹdade Esop Abasi Usụn̄

KE AKPA leta oro apostle Paul ekewetde ọnọ ẹsọk mbon Corinth, enye ama etịn̄ akpan n̄kpọ kiet aban̄a Abasi. Enye ọkọdọhọ ete: “Abasi idịghe Abasi ndutịme, edi edi Abasi emem.” Ekem enye ama etịn̄ nte mbono esop ekpetiede, ete: “Ẹyak kpukpru n̄kpọ ẹda itie ke ido nte eyede ye ke ndutịm.”—1 Cor. 14:33, 40.

² Ke ntọn̄ọ ntọn̄ọ leta oro, apostle Paul ama ọnọ esop Corinth item ke ntak utọk oro okodude ke esop mmọ. Enye ama ọdọhọ mmọ “ẹnyene ikọ inua kiet” ẹnyụn̄ “ẹdiana kiet ke ekikere.” (1 Cor. 1:10, 11) Ekem enye ama ọnọ mmọ item aban̄a nsio nsio n̄kpọ oro akanamde ubahade odu ke esop mmọ. Enye ama ada esop odomo ye idem owo man owụt ke enen̄ede ọfọn ẹdiana kiet ẹnam n̄kpọ ke esop. Enye ama ọdọhọ kpukpru owo ete ẹnyene ima ẹnyụn̄ ẹkere ẹban̄a kiet eken ke esop, inamke n̄kpọ m̀mê mmọ ẹdi nso. (1 Cor. 12:12-26) Utọ edidianakiet emi owụt ke ẹketetịm esop emi.

³ Edi didie ke ẹketịm esop mme Christian? Anie eketịm? Esop oro eketie didie? Mmanie ke ẹkemek ẹte ẹse enyịn? Bible ọbọrọ kpukpru mbụme oro.—1 Cor. 4:6.

ABASI ETỊM ESOP ESIE

⁴ Ẹketọn̄ọ esop mme Christian ke usen Pentecost isua 33 eyo mme apostle. Nso ke idiọn̄ọ iban̄a esop mme Christian eyo oro? Abasi eketịm onyụn̄ ada esop oro usụn̄. Bible etịn̄ se iketịbede ke Jerusalem n̄kpọ nte isua 2,000 emi ekebede. Se iketịbede enen̄ede owụt ke Abasi ọkọtọn̄ọ esop mme Christian oro ẹyetde aran. (Utom 2:1-47) Bible okot esop emi ufọk emi Abasi ọbọpde, onyụn̄ okot mbon esop emi mbonufọk esie. (1 Cor. 3:9; Eph. 2:19) Ẹnam n̄kpọ ke esop mme Christian mfịn nte ẹkesinamde ke eyo mme apostle.

⁵ N̄kpọ nte mbet 120 ke ẹkeda ẹtọn̄ọ esop oro. Mmọ ẹkedi akpa mbon esop Christian emi ẹkedade edisana spirit ẹyet aran; emi ama osu se idude ke Joel 2:28, 29. (Utom 2:16-18) Kpa usen oro, n̄kpọ nte owo 3,000 ẹma ẹna baptism ẹnyụn̄ ẹtiene ẹdu ke esop emi Abasi adade spirit esie emek. Mmọ ẹma ẹnyịme se ẹkekwọrọde ẹnọ mmọ ẹban̄a Christ ẹnyụn̄ “ẹka iso ndisịn idem ke ukpepn̄kpọ mme apostle.” Ke oro ebede, “Jehovah [ama] aka iso ndida mbon oro ẹnyan̄ade ndian nnọ mmọ ke usen ke usen.”—Utom 2:41, 42, 47.

⁶ Mme owo ẹma ẹnen̄ede ẹwak ke esop Jerusalem tutu akwa oku mme Jew ọdọhọ ke mme mbet Jesus ẹda ukpepn̄kpọ mmọ ẹyọhọ Jerusalem. Ediwak oku mme Jew ẹma ẹkabade ẹdi mbet Jesus ẹnyụn̄ ẹtiene ẹdụk esop Jerusalem.—Utom 5:27, 28; 6:7.

⁷ Jesus ọkọdọhọ ete: “Mbufo ẹyetie ntiense ẹban̄a mi ke Jerusalem ye ke ofụri Judea ye Samaria tutu esịm ata utịt ikpehe isọn̄.” (Utom 1:8) Se Jesus eketịn̄de emi ama osu. Ke ẹma ẹkewot Stephen, ẹma ẹtọn̄ọ ndikọbọ mme mbet Jesus ke Jerusalem. Mme mbet oro ẹkedụn̄de do ẹma ẹsuana ẹyọhọ ofụri Judea ye Samaria. Ndien ebiet ekededi oro mmọ ẹkekade, mmọ ẹma ẹka iso ẹkwọrọ eti mbụk ẹnyụn̄ ẹnam ediwak owo ye mbon Samaria n̄ko ẹdi mbet Jesus Christ. (Utom 8:1-13) Nte ini akakade, ẹma ẹkwọrọ ikọ n̄ko ẹnọ mbon emi mîdịghe mme Jew. (Utom 10:1-48) Ndisịn idem ntem n̄kwọrọ ikọ ama anam ata ediwak owo ẹkabade ẹdi mbet Jesus, onyụn̄ anam ẹsiak mbufa esop ke mme ebiet en̄wen. Ntre, idịghe Jerusalem kpọt ke esop mme Christian okodu.—Utom 11:19-21; 14:21-23.

⁸ Nso ke ẹkenam man ẹkụt ẹte ke ẹtịm ẹnyụn̄ ẹda mme esop emi usụn̄ nte Abasi okoyomde? Spirit Abasi ama anam ẹmek mbiowo man ẹkpese ẹban̄a otuerọn̄ Abasi. Spirit emi ama anam Paul ye Barnabas ẹmek mbiowo ke mme esop oro mmọ ẹkekade ẹkese ke akpa isan̄ isụn̄utom mmọ. (Utom 14:23) Luke emi ekewetde Utom Mme Apostle etịn̄ aban̄a ini oro Paul okosobode ye mbiowo esop Ephesus. Paul ọkọdọhọ mmọ ete: “Ẹkpeme idem mbufo ye ofụri otuerọn̄, emi edisana spirit ekemekde mbufo ke otu mmọ nte mme esenyịn, ete ẹkpeme esop Abasi, emi enye ekedepde ke iyịp Eyen esie.” (Utom 20:17, 28) Mmọ ẹma ẹdot ndidi mbiowo sia mmọ ẹma ẹnam se N̄wed Abasi ọdọhọde owo anam mbemiso ẹmekde enye ebiowo. (1 Tim. 3:1-7) Ẹma ẹnọ Titus, emi ekesisan̄ade ntre ye Paul ọkwọrọ ikọ, odudu ndimek mbiowo ke mme esop ke Crete.—Titus 1:5.

⁹ Ẹma ẹsiak ediwak esop ke nsio nsio itie ke ererimbot, mme apostle ye mbiowo ke Jerusalem ẹkese enyịn ke kpukpru esop emi. Mmọ ẹkese ẹban̄a utom mme Christian ke ofụri ererimbot.

¹⁰ Ke ini apostle Paul ekewetde leta ọnọ ẹsọk esop ke Ephesus, enye ama ọdọhọ ke edieke mmọ ẹyakde spirit Abasi ada mmọ usụn̄, ke mmọ ẹyediana kiet ẹsụk ibuot ẹnọ Jesus Christ emi edide Ibuot esop. Paul ama ọdọhọ mme Christian do ete ẹsụhọde idem, ẹdiana kiet ke spirit, ẹnyụn̄ ẹdu ke emem ye kpukpru owo ke esop. (Eph. 4:1-6) Ekem enye ama etịn̄ se idude ke Psalm 68:18, onyụn̄ ọdọhọ ke emi aban̄a nte Jehovah ọnọde esop esie irenowo oro ẹdotde nte mme apostle, mme prọfet, mme ọkwọrọ eti mbụk, mme ekpemerọn̄, ye mme andikpep. Irenowo oro Jehovah ọkọnọde mmọ mi ẹma ẹsọn̄ọ ofụri esop idem man mmọ ẹnam n̄kpọ nte Abasi amade.—Eph. 4:7-16.

ẸNAM N̄KPỌ KE MME ESOP MFỊN NTE ẸKENAMDE KE EYO MME APOSTLE

¹¹ Mfịn, kpukpru esop Mme Ntiense Jehovah ẹnam n̄kpọ nte ẹkesinamde ke esop eyo mme apostle. Kpukpru esop Mme Ntiense Jehovah ke ofụri ererimbot ẹdiana kiet ẹnam n̄kpọ Abasi, ndien mbon oro Abasi adade spirit esie eyet aran ẹda mmọ usụn̄. (Zech. 8:23) Jesus Christ anam kpukpru emi ọnọ nnyịn sia enye ama ọn̄wọn̄wọn̄ọ ke iyodu ye mbet imọ oro ẹyetde aran “kpukpru usen tutu esịm akpatre ini editịm n̄kpọ emi.” Mme owo ke ẹbụn̄ọ ẹdụk esop Abasi ndien mbon oro ẹdụkde ẹdi mi ẹsinyịme eti mbụk Abasi emi ẹkwọrọde ẹnọ mmọ, ẹyak uwem mmọ ofụri ofụri ẹnọ Jehovah, ẹnyụn̄ ẹna baptism ẹkabade ẹdi mbet Jesus. (Matt. 28:19, 20; Mark 1:14; Utom 2:41) Mmọ ẹfiọk ke Jesus Christ, emi edide “eti ekpemerọn̄,” edi Ibuot ọnọ ofụri otuerọn̄ Abasi, emi esịnede mbon oro ẹyetde aran ye “mme erọn̄ en̄wen.” (John 10:14, 16; Eph. 1:22, 23) “Otuerọn̄ kiet” emi ẹka iso ẹdiana kiet sia mmọ ẹsụk ibuot ẹnọ Christ ẹnyụn̄ ẹtiene ndausụn̄ “ofụn emi anamde akpanikọ onyụn̄ enyenede ọniọn̄,” emi Christ emekde. Akpana kpukpru nnyịn ika iso ibuọt idem ye mbon oro ẹdade nnyịn usụn̄ mfịn.—Matt. 24:45.

MME N̄KA EMI IDADE INAM UTOM NNYỊN

¹² Ofụn emi anamde akpanikọ onyụn̄ enyenede ọniọn̄ asiak mme n̄ka emi ukara ẹnyịmede man enye ekeme ndikpep nnyịn Ikọ Abasi ke edikem ini. Emi n̄ko anam ikeme ndikwọrọ eti mbụk Obio Ubọn̄ Abasi ke ofụri ererimbot mbemiso utịt edide. Ẹsiak mme n̄ka emi ke nsio nsio idụt, edi kpukpru mmọ ẹdiana kiet ẹn̄wam nnyịn ika iso ikwọrọ eti mbụk ke ofụri ererimbot.

NTE ẸTỊMDE MME N̄KỌK ITIEUTOM NNYỊN

¹³ Ini ekededi oro ẹsiakde n̄kọk itieutom, ẹsimek mbiowo ita m̀mê akande oro ẹte ẹdi Kọmiti N̄kọk Itieutom. Kọmiti emi ẹsise ẹban̄a utom Mme Ntiense Jehovah ke ofụri idụt oro n̄kọk itieutom mmọ ẹsede enyịn. Ẹsimek owo kiet ke kọmiti oro ẹte edi anam-ndutịm Kọmiti N̄kọk Itieutom.

¹⁴ Ẹbahade kpukpru esop oro n̄kọk itieutom kiet kiet ẹsede ẹban̄a ẹdọn̄ ke mme circuit. Circuit kiet ekeme ndikpon n̄kan en̄wen. Ebiet emi mme esop ẹdude, usem emi mmọ ẹsemde, ye ibat esop emi n̄kọk itieutom ẹsede ẹban̄a ke ẹsida ẹbiere nte circuit kiet kiet edikponde iketre. Ẹsimek esenyịn circuit ẹte asan̄a ese mme esop ke circuit kiet kiet. N̄kọk itieutom ẹsinọ esenyịn circuit leta ke ini ke ini man ẹtịn̄ nte enye akpanamde utom esie.

¹⁵ Kpukpru esop ẹsitiene ndutịm oro ẹnamde ẹnọ nditọete ke ofụri ererimbot, ndien ndutịm emi esidi ke ufọn kpukpru owo. Mmọ ẹsinyịme ẹnyụn̄ ẹbere ye mbiowo oro ẹmekde ẹte ẹse ẹban̄a utom ke n̄kọk itieutom, ke circuit, ye ke esop. Se ofụn emi anamde akpanikọ onyụn̄ enyenede ọniọn̄ ọnọde mmọ ke mmọ ẹsikpep, ndien ofụn emi esino n̄kpo emi ke nnennen ini. Ofụn emi anamde akpanikọ mi enen̄ede osụk ibuot ọnọ Christ, etiene se Bible ekpepde, onyụn̄ ayak edisana spirit ada enye usụn̄. Ke ini kpukpru nnyịn idianade kiet inam utom Abasi, Abasi esidiọn̄ nnyịn nte ọkọdiọn̄de mme Christian eyo mme apostle. Bible ọdọhọ ke mme esop ini oro ẹma “ẹka iso ndisọn̄ọ nda ke mbuọtidem nnyụn̄ ntọt ke ibat ke usen ke usen.”—Utom 16:5.