Leta Otu Emi Ẹsede Ẹban̄a Utom Nnyịn
“Mbufo [ẹkpedi] mme andikpep.” (Heb. 5:12) Omokụt! Jehovah emi edide akakan Andikpep ke ofụri ekondo ọdọhọ nnyịn iditiene ikpep mme owo n̄kpọ man mmọ ẹdiọn̄ọ imọ. Edi ata akwa ukpono nditiene n̄kpep mme owo n̄kpọ mban̄a Jehovah, edide ikpep ke ubon, ke esop, m̀mê ke ini ikade ukwọrọikọ. Sia utom emi mîdịghe ifia ubọk kiet, idisan̄a didie ikeme ndinam enye ọfọn?
Se apostle Paul ekewetde ọnọ Timothy ayan̄wam nnyịn. Enye ọkọdọhọ Timothy ete: “Sịn idem ke edikot n̄wed nnọ owo, ye ke edinọ item ye ke edinọ owo ukpep. . . . Koro ke ndinam emi afo ayanyan̄a idemfo ye mmọ emi ẹkopde uyo fo.” (1 Tim. 4:13, 16) Ọwọrọ Jehovah ọnọ fi utom emi enye edidade inyan̄a fi ye mbon emi ẹnamde se afo ekpepde mmọ. Ntre, sịn idem kpep ndikot n̄wed ọfọn nyụn̄ kpep owo n̄kpọ ọfọn. N̄wed emi ayan̄wam fi. Se ndusụk se idọn̄ọde ke esịt.
Ẹwet itie N̄wed Abasi emi aban̄ade se ẹnemede ke ukpepn̄kpọ kiet kiet
Jehovah edi “Akwa Anditeme” nnyịn. (Isa. 30:20) Kpa ye oro n̄wed emi edinamde fi ọdiọn̄ọ ndikot n̄wed ọfọn nnyụn̄ n̄kpep owo n̄kpọ ọfọn, kûfre ke kpukpru se ikpepde mme owo oto Jehovah, ke enye esinyụn̄ anam mme owo ẹdi ẹdikpono enye. (John 6:44) Ntre, sibọn̄ akam ben̄e enye ọnọ fi edisana spirit esie. Da Ikọ esie kpep mme owo n̄kpọ. Nam mme owo ẹda Jehovah nte Andikpep mmọ, utu ke afo. N̄wam mmọ ẹnen̄ede ẹma Jehovah.
Jehovah ọdọhọ fi editiene ekpep mme owo akakan etop emi akanam ẹnọde mme owo. Imenịm ke ayanam ọfọn edieke eberide edem ke Abasi.—1 Pet. 4:11.
Enem nnyịn ndidiana ye afo n̄kpep mme owo Ikọ Abasi,
Otu Emi Ẹsede Ẹban̄a Utom Mme Ntiense Jehovah