Mbụme Oro Mme Andikot Ẹbụpde
Ntak Emi Mme Ntiense Jehovah Mîsidaha Cross Ikpono Abasi?
Mme Ntiense Jehovah ẹnen̄ede ẹnịm ke n̄kpa Jesus Christ ọnọ ufak oro anamde mbon oro ẹbuọtde idem ke Jesus ẹkeme ndinyene nsinsi uwem. (Matthew 20:28; John 3:16) Nte ededi, mmọ inịmke ke ẹkekọn̄ Jesus ke cross, nte emi ẹsiwakde ndiwụt ke ndise. Mmọ ẹnịm ke ẹkekọn̄ Jesus ke anyan eto oro owo mîdaha eto efen idori ibiọn̄.
Ẹketọn̄ọ ndikama cross ke Mesopotamia, ke isua tọsịn iba mbemiso Christ ekedide isọn̄. Ẹma ẹsikap mme cross ke itiat ke mme idụt Scandinavia ke ediwak isua ikie mbemiso Jesus ekedide edimana. Sven Tito Achen, eyen Denmark oro edide ewetmbụk eset ye ataifiọk ke mme n̄kpọ oro ẹban̄ade idiọn̄ọ, ekewet ke n̄wed oro Symbols Around Us ete ke mme okpono ndem emi ẹkesida cross “nte idiọn̄ọ mfọni . . . oro ekpemede owo, onyụn̄ anamde owo enyene mfọniso.” Ntak edi oro New Catholic Encyclopedia ọdọhọde ete: “Mbon oro mîkedịghe Christian ye mbon oro ẹkedude uwem mbemiso eyo mme Christian ẹma ẹsikama cross, ndien cross ekesida aban̄a ekondo m̀mê mme n̄kpọ-obot oro ẹdude ke ikpaenyọn̄.” Ntak emi ndien mme ufọkabasi ẹdade cross nte akpan edisana idiọn̄ọ mmọ?
W. E. Vine, eyen ukpepn̄kpọ Britain oro ẹnen̄erede ẹkpono, etịn̄ ikọ oro edisọn̄de ndusụk owo ndinịm ete: “Etisịm ufọt ufọt ọyọhọ isua ikie ita E.N. . . . ẹma ẹsiyak mme okpono ndem ẹdụk ufọkabasi . . . ndien ẹma ẹsinyụn̄ ẹyak mmọ ẹka iso ẹkama ata ediwak idiọn̄ọ ukpono ndem mmọ. Ini emi ke ufọkabasi ẹketọn̄ọ ndida abisi usem Greek ye Rome emi, Tau m̀mê T, . . . ndida nnọ cross.”—Se Vine’s Expository Dictionary of Old and New Testament Words.
Vine aka iso ọdọhọ ke ikọ oro “cross” ye “ẹdikọn̄ ke cross” ẹda ẹban̄a “anyan eto . . . oro owo mîdaha eto efen idori ibiọn̄, inyụn̄ ibietke cross oro ẹsikamade ke mme ufọkabasi.” Companion Bible oro Ufọkn̄wed Ntaifiọk Oxford osiode esịn ke uyo oro ete: “Uyarade odu nte ke . . . ẹkewot Ọbọn̄ ke anyan eto, idịghe ke eto oro ẹdoride ibiọn̄.” Ana in̄wan̄-in̄wan̄ nte ke mme ufọkabasi ẹkpep se mîsịneke ke Bible.
Achen, kpa ewetmbụk eset oro ikebemde iso itịn̄ iban̄a ọdọhọ ete: “Etie nte ke mme Christian oro ẹkedude ke isua ikie iba ke Jesus ama akakpa ikesikamake cross.” Enye aka iso ete ke akpa mme Christian ẹkeda cross nte “akpan idiọn̄ọ n̄kpa ye idiọkn̄kpọ, kpa nte mbon eyo emi ẹdade ukwak ubịghi owo ibuot m̀mê akpakaha ikan̄ ilektrik oro ẹsikamade ẹwot mme abiatibet.”
Se ededi oro ẹkedade ẹtụhọde ẹnyụn̄ ẹwot Jesus, se idide akpan n̄kpọ ikan edi nte ke mme Christian ikpenyeneke ndida utọ mbiet m̀mê idiọn̄ọ oro ntuak ibuot nnọ Abasi. Bible owụk ete: “Ẹfehe ẹkpọn̄ ukpono ndem.” (1 Corinth 10:14) Jesus ke idemesie ama etịn̄ se ẹdidade ẹdiọn̄ọ ata mme anditiene imọ. Enye ọkọdọhọ ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.”—John 13:35.
Ukem nte mme Christian eke akpa isua ikie, Mme Ntiense Jehovah ẹdomo nditiene Bible utu ke ido eset ke kpukpru se iban̄ade utuakibuot. (Rome 3:4; Colossae 2:8) Ntak edi oro mmọ mîsidaha cross ikpono Abasi.
[Ndise ke page 22]
Ndise okpono ndem edidem Assyria emi ọkọn̄ọde cross ke n̄kpọ nte isua 800 M.E.N.
[Ebiet Ẹdade Ndise Ẹto]
Photograph taken by courtesy of the British Museum