Nte Isan̄ade Ifiọk ke Abasi Enen̄ede Ekere Aban̄a Nnyịn
MME owo ẹmenen̄ede ẹkere ẹban̄a akpan mbụme emi ke ata ediwak isua: Edieke Abasi amade nnyịn, ntak emi mme owo ẹbọde ndutụhọ ntem? Anaedi afo emenịm ke edieke amade owo, ke udumaha owo oro ọbọ ufen, ndien edieke enye enyenede mfịna, afo oyodomo ndin̄wam enye. Sia edide ntre, ediwak owo ẹkere ke mme owo ndinen̄ede mbọ ndutụhọ ke ererimbot owụt ke Abasi ikereke iban̄a nnyịn. Mmọdo, ọfọn ibem iso ikere iban̄a mme n̄kpọ oro ẹwụtde ke Abasi enen̄ede ama nnyịn, oro edi, ke Abasi ekere aban̄a nnyịn.
Mme Edibotn̄kpọ Ẹwụt ke Abasi Ama Nnyịn
Jehovah Abasi edi “Enye emi akanamde enyọn̄ ye isọn̄ ye inyan̄ ye kpukpru n̄kpọ emi ẹdude ke mmọ.” (Utom 4:24) Ke ini inen̄erede ikere iban̄a mme n̄kpọ oro Jehovah okobotde, nnyịn iditreke-tre ndinịm ke enye ekere aban̄a nnyịn. Ke uwụtn̄kpọ, kere ban̄a mme n̄kpọ oro ẹsinamde fi okop inemesịt. Ndi amama ndinem udia? Jehovah ọkpọkọnọ orụk udia kiet kpọt man idia idu uwem. Edi utu ke ndinọ nnyịn orụk udia kiet, enye ama obot anana-ibat orụk udia oro ẹdinemde nnyịn. Kpasụk ntre, Jehovah ama obot ekese utịbe utịbe eto, flawa, ye ndiye ebiet man anam uwem enem nnyịn.
Kere n̄ko ban̄a nte ẹkebotde nnyịn. Edieke nnyịn mîkpenyeneke ukeme ndinam mbubru, ndikop inem ikwọ, ye ndise ndiye n̄kpọ, ikposụk idodu uwem, edi Abasi ọnọ nnyịn kpukpru emi, emi ẹnamde inen̄ede ikop inem uwem. Kere n̄ko ban̄a ufan oro anamde ye mme owo. Anie ke mîsinemke enye ndidu ye nti ufan m̀mê ke ini owo emi enye amade afatde enye? Ke akpanikọ, ukeme ndima ima edi enọ Abasi! Sia Abasi okobotde owo ye ukeme ndima ima, anaedi ima edi edu Abasi.
Bible Anam Nnyịn Ifiọk ke Abasi Ama Nnyịn
Bible ọdọhọ nnyịn ke Abasi edi ima. (1 John 4:8) Mme n̄kpọ oro enye okobotde ye Ikọ esie, kpa Bible, ẹwụt ke enye ama nnyịn. Ke uwụtn̄kpọ, Bible ọnọ nnyịn ndausụn̄ oro ekemede ndin̄wam nnyịn ikop nsọn̄idem, eteme nnyịn ete ifara ke idem, onyụn̄ eteme nnyịn ete ikûkpa mmịn, ikûnyụn̄ ima udia.—1 Corinth 6:9, 10.
Bible ọnọ nnyịn eti item aban̄a nte ikpodude uwem ye mbon en̄wen, eteme nnyịn ete ima kiet eken, inam n̄kpọ ye mmọ ukpono ukpono, uku uku, inyụn̄ ifọn ido ye mmọ. (Matthew 7:12) Enye akpan mme edinam ye mme edu oro ẹnamde mbon en̄wen ẹbọ ufen—utọ nte idiọkitọn̄, iban̄a, isịnenyịn, efịbe, ye uwotowo. Edieke kpukpru owo ẹkpedade nti item N̄wed Abasi emi ẹsịn ke edinam, mme owo ikpọbọhọ ufen ntem ke ofụri ererimbot.
Edi akakan n̄kpọ oro owụtde ke Abasi ama nnyịn edi emi enye ọkọnọde Jesus Eyen esie edifak ubonowo. John 3:16 ọdọhọ ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” Ntem, Jehovah ananam ndutịm man etre n̄kpa ye kpukpru orụk ndutụhọ ofụri ofụri.—1 John 3:8.
Ke akpanikọ, uyarade ẹdu barasuene ndiwụt ke Jehovah ama nnyịn. Do, an̄wan̄a ke inemke-nem enye ndikụt nte nnyịn ibọde ndutụhọ. Enye eyetre ndutụhọ. Ufọn idụhe ndikekere n̄kpọ emi—Bible asian nnyịn nnennen nnennen nte Abasi editrede ndutụhọ.
[Ndise ke page 4]
Ukeme ndima ima edi enọ Abasi ima