Mbụme Oro Mme Andikot Ẹbụpde . . .
Mme Ntiense Jehovah Ẹse Didie Mbuaha Mbuọtidem?
▪ World Christian Encyclopedia ọdọhọ ke n̄kpọ nte “ido ukpono 10,000 ẹdu ke ofụri ererimbot.” Sia en̄wan oro mmọ ẹn̄wanade ke otu idemmọ abiatde ekese n̄kpọ, ekikere edibuaha ọtọkiet ntuak ibuot anam ediwak mbon ido ukpono ẹnyene idotenyịn. Mmọ ẹnịm ke emi ekeme ndida emem ye edidianakiet ndi ke ererimbot emi mîdianake kiet mi.
Bible esịn udọn̄ ọnọ edidianakiet. Apostle Paul ekemen esop Christian odomo ye idem owo, emi ndido kiet kiet “[akpahade] adiana kiet onyụn̄ anam utom ọtọkiet.” (Ephesus 4:16) Kpasụk ntre, apostle Peter ama eteme ekemmọ mme andinịm ke akpanikọ ete: “Kpukpru mbufo ẹnyene ekikere kiet.”—1 Peter 3:8.
Akpa mme Christian ẹkedu uwem ke ererimbot oro ekenyenede ediwak ido edinam ye ediwak ido ukpono. Edi ke ini Paul ekewetde aban̄a nsio nsio ido ukpono ndibuaha kiet ntuak ibuot, enye ọkọdọhọ ete: “Nso udeme ke owo eke enịmde ke akpanikọ enyene ye owo eke mînịmke ke akpanikọ?” Ekem enye odụri mme Christian utọn̄ ete “ẹwọn̄ọ ke otu mmọ.” (2 Corinth 6:15, 17) Ana in̄wan̄-in̄wan̄ ke Paul akakpan mbuaha mbuọtidem. Ntak emi enye akakpande?
Enye ama anam an̄wan̄a ke owo emi edide ata Christian ndibuana kiet ntuak ibuot ye owo emi mîdịghe edi edidian idem utịn̄e utịn̄e, ndien ke idotke. (2 Corinth 6:14) Emi edibabiat mbuọtidem Christian. Eketie Paul ke idem nte esitiede ete oro ọfiọkde ke ndusụk nditọwọn̄ ke mbọhọ mmọ ẹdi ndiọi nditọwọn̄. Sia ete oro ekerede aban̄a eyen esie, enye ada ọniọn̄ ebiere mbon oro enye oyomde eyen esie ada ebre mbre. Ekeme ndidi owo idimaha ukpan oro. Edi eyen oro ndidian̄ade nsan̄a ye ndiọi nditọ oro eyekpeme enye mbak mmọ ẹdibiat enye. Kpasụk ntre, Paul ama ọfiọk ke mme Christian ndidian̄ade n̄kpọn̄ ido ukpono eken idiyakke mme Christian ẹkpebe ndiọi edinam mmọ.
Paul ekekpebe Jesus ke ini enye ọkọnọde item oro. Okposụkedi emi Jesus ekenịmde akakan uwụtn̄kpọ ke ndinam mme owo ẹtie ke emem ye kiet eken, enye ikabuanake ke mme edinam mbuaha mbuọtidem. Ediwak ido ukpono, utọ nte mme Pharisee ye mme Sadducee, ẹma ẹdu ke ini emi Jesus akanamde utom ukwọrọikọ ke isọn̄. Ke nditịm ntịn̄, mme ido ukpono emi ẹma ẹdiana kiet ẹbiọn̄ọ Jesus, tutu ẹdụk odu ndiwot enye. Edi Jesus ọkọdọhọ mme anditiene enye ‘ẹkpeme mbak ukpepn̄kpọ mme Pharisee ye mme Sadducee.’—Matthew 16:12.
Nso kaban̄a mfịn? Ndi Bible ndikpan mbuaha mbuọtidem ke enyenyene ufọn? Ih, ke enyenyene. Ntak edi ke mbuaha mbuọtidem ikemeke ndidian nsio nsio ido ukpono ọtọkiet ukem nte aran ye mmọn̄ oro ẹn̄wan̄ade ẹdọn̄ ke eso mîkemeke ndibuaha kiet. Ke uwụtn̄kpọ, ke ini mme owo ke nsio nsio ido ukpono ẹsobode ọtọkiet ẹbọn̄ akam ẹyom emem, ewe abasi ke mmọ ẹbọn̄ akam oro ẹnọ? Abasi-Ita-ke-Kiet mbon Christendom? Brahma mbon Hindu? Ndi Buddha? M̀mê owo en̄wen?
Prọfet Micah ama etịn̄ enịm ke mme owo emi ẹtode kpukpru idụt ẹyedọhọ “ke akpatre ini” ẹte: “Ẹdi, nnyịn idọk ke obot Jehovah, ye ke ufọk Abasi Jacob; ndien Enye ayada usụn̄ esie ekpep nnyịn, nnyịn iyonyụn̄ isan̄a ke ọkpọ-usụn̄ esie.” (Micah 4:1-4) Emi ayanam mmọ ẹnyene emem ẹnyụn̄ ẹdiana kiet ke ofụri ererimbot, idịghe ntak emi kpukpru ido ukpono ẹdianade kiet, edi ke ntak emi kpukpru owo ẹnyịmede ido ukpono akpanikọ kiet.
[Ndise ke page 27]
Mme andibuana ke ikpọ ido ukpono ererimbot ke mbono mbuaha mbuọtidem oro ẹkenịmde ke 2008
[Ebiet ẹdade n̄kpọ ẹto]
REUTERS/Andreas Manolis