1 Owo Ikemeke Ndifiọk Abasi—Ndi Emi Edi Akpanikọ?
Ekeme ndidi emesikop ẹdọhọde ẹte: “Usụn̄ Abasi in̄wan̄ake owo.”
“Ami n̄kemeke nditịm mfiọk . . . Ete ye Eyen ye Edisana Spirit.”—Se Catechism Ufok Abasi Catholic etịn̄de edi emi aban̄a Abasi-Ita-ke-Kiet emi ẹkpepde mfịn ke ediwak ufọkabasi.
Se Bible ekpepde: Jesus ọkọdọhọ ke mbon oro ẹkọde “ifiọk . . . ata Abasi kierakiet” ẹdinyene nsinsi uwem. (John 17:3) Edi nnyịn idisan̄a didie ikọ ifiọk emi edieke owo mîkemeke ndifiọk Abasi? Abasi idịbeke-dịbe, edi oyom kpukpru owo ẹfiọk imọ.—Jeremiah 31:34.
Emi iwọrọke ke imekeme ndifiọk kpukpru n̄kpọ mban̄a Abasi sia ekikere ye usụn̄ esie ẹkon̄ ẹkan eke nnyịn.—Ecclesiastes 3:11; Isaiah 55:8, 9.
Nte ndifiọk akpanikọ an̄wamde nnyịn: Edieke owo mîkemeke ndifiọk Abasi, ufọn ikpodụhe ndiyom ndifiọk enye. Edi Abasi ke idemesie anam nnyịn ikeme ndifiọk imọ inyụn̄ inam ufan ye enye. Abasi okokot Abraham “ufan mi.” Ndien Edidem David emi akakarade Israel ekewet ete: “Mmọ eke ẹbakde Jehovah ẹdi ata ufan esie.”—Isaiah 41:8; Psalm 25:14.
Ndi emekere ke owo ekeme ndinam ufan ye Abasi? Utom 17:27 ọdọhọ ke ‘Abasi iyomke usụn̄ ikpọn̄ nnyịn owo kiet kiet.’ Didie? Abasi ada Bible owụt se nnyịn ikpanamde man inen̄ede ifiọk imọ.a
Abasi asiak enyịn̄ esie ọnọ nnyịn, ete ke ikere Jehovah. (Isaiah 42:8) Enye ama anam ẹwet ke Bible nte imọ isinamde n̄kpọ ye mme owo man nnyịn ikpada oro ifiọk utọ Owo emi imọ idide. Abasi anam ifiọk n̄ko ke n̄kpọ esitụk imọ. Enye edi “Abasi mbọm ye mfọn, isọpke iyatesịt edi awak ima-mfọnido ye akpanikọ.” (Exodus 34:6) Se nnyịn inamde esitụk enye. Ke uwụtn̄kpọ, ke ini idụt Israel eset ẹkesọn̄de ibuot ye enye, ‘esịt ama ayat enye,’ edi esịt ama esidat enye ke ini ndusụk mmọ ẹkekopde uyo esie.—Psalm 78:40; Mme N̄ke 27:11.
[Ikọ Idakisọn̄]
a Edieke oyomde ndifiọk mme n̄kpọ efen oro Bible etịn̄de aban̄a Abasi, mbọk kot ibuot 1 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.
[Se ẹwetde ke ikpọ abisi ke page 4]
Edieke Abasi ekpedide Owo-Ita-ke-Kiet emi owo mîkemeke ndifiọk, nnyịn ikpasan̄a didie ifiọk enye?
[Ebiet Ẹdade Ndise Ẹto ke page 4]
The Trinity c.1500, Flemish School, (16th century) / H. Shickman Gallery, New York, USA / The Bridgeman Art Library International