Asari Ọyọyọhọ Ererimbot

KPA ye oro Jonathan akamanade ke America, ẹma ẹsisari enye ke ini eyenọwọn̄ sia ete ye eka esie ẹtode Korea. Ke enye ama okokpon owo, enye ama oyom ebiet emi owo mîdisarike enye ke ntak iso esie ye ebiet emi enye otode. Enye ekedi abiausọbọ ke obio kiet emi odude ke edem edere Alaska ke U.S.A., ndien ediwak mbon emi enye ọkọsọbọde idem ẹkenyene iso nditọ Korea nte enye. Emi ama anam enye ekere ke imesịm ebiet emi owo mîdisarike imọ aba.

Idotenyịn Jonathan ama akpa mfụhọ ke ini enye okosụk ọsọbọde n̄kaiferi emi edide isua 25 idem. N̄kaiferi emi ama osụhọ ke ini ẹkemende enye ẹdi ufọkibọk. Edi ke Jonathan ama akanam enye eset, enye ama osion̄o enyịn ese Jonathan, enen̄ede osụn̄i enye ndiwụt nte enye asuade mbon Korea eketre. N̄kpọ emi ama abiak Jonathan tutu anam enye okụt ke idụhe ebiet emi owo ekemede ndifehe mbọhọ asari ke ererimbot emi.

Se iketịbede inọ Jonathan owụt ke idụhe ebiet emi asari mîdụhe ke ererimbot emi. Ebiet ekededi emi mme owo ẹdude, ana asari etiene odu.

Mme owo ẹnen̄ede ẹsua asari, edi enye ke atatara nte ọnọk. M̀mê nso ikpanam enye etie ntre? Ekeme ndidi sia ediwak owo emi ẹsuade asari idiọn̄ọke ke mmimọ ke idem mmimọ imesinam asari. Okûdi afo emesitiene anam asari edi udiọn̄ọke? Ekere didie?

EKERE DIDIE?

Edide imenyịme m̀mê nnyịn inyịmeke, se idude edi nte ke nnyịn isisọpke ifiọk ke imesinam asari ke esịt nnyịn. Bible etịn̄ ntak ete: “Esịt abian̄a akan n̄kpọ efen ekededi.” (Jeremiah 17:9) Esịt ekeme ndibian̄a nnyịn anam ikere ke nnyịn inamke asari, edi ke imama kpukpru owo. Mîdịghe esịt ekeme ndinam nnyịn ikere ke imenyene eti ntak ndisọn ndusụk idụt.

Yak ise ise nte esisọn̄de ndidiọn̄ọ m̀mê imesisari owo ke esịt nnyịn. Yak idọhọ ke asan̄a ke efak okoneyo usen kiet, etise, owo iba emi afo mûdiọn̄ọke ke ẹsan̄a ẹtiene fi. Iso mmọ ẹtie ntre ntre, ndien etie nte owo mmọ kiet akama n̄kpọ ke ubọk.

Ndi ekpekere ke mmọ ẹmọn̄ ẹnam fi n̄kpọ? Se iketịbede inọ fi okoneyo ntem ke usụn̄ ekeme ndinam fi ekere ke akpana efehe. Edi ndi sia n̄kpọ ama eketịbe ọnọ fi, ọwọrọ ke n̄kparawa iba emi ẹmọn̄ ẹnyụn̄ ẹnam fi n̄kpọ? N̄kpọ en̄wen edi, Afo ekere ke n̄kparawa iba oro ẹto m̀mọ̀n̄? Nte ọbọrọde mbụme emi ekeme ndiwụt se isịnede fi ke esịt. Enye ekeme ndiwụt m̀mê ekpri asari do ke esịt fo.

Edieke iyomde nditịn̄ akpanikọ, nnyịn iyenyịme ke kpukpru nnyịn imenyene n̄kpri asari ke idem nnyịn. Bible etịn̄ se isinamde mme owo ẹsari owo ete: “Owo ese se enye okụtde ke enyịn.” (1 Samuel 16:7) Ndien emi esiwak ndinam owo anam se mîfọnke. Ntre, sia mîdụhe eke mîsinamke emi, ndi iyosụk ikeme nditre asari ke ofụri eyouwem nnyịn? Ndi asari eyetre ke ererimbot emi tutu amama?