Ndi Jesus ọkọdọhọ anamidiọk Oro ke enye oyodu ye imọ ke heaven?

Se Jesus eketịn̄de ọnọ anamidiọk oro ẹkekọn̄de ke eto ẹkpere enye anam ẹbụp mbụme emi. Jesus ọkọdọhọ enye ete: “Ke akpanikọ ke ndọhọ fi mfịn emi, Afo oyodu ye ami ke Paradise.” (Luke 23:43) Omokụt ke Jesus iketịn̄ke ebiet emi Paradise oro edidude. Edi ndi ikọ Jesus ọkọwọrọ ke anamidiọk oro edidu ye imọ ke heaven?

Man ifiọk ibọrọ mbụme emi, yak ise m̀mê anamidiọk oro ama odot ndika heaven. Mbon oro ẹdikade heaven ẹnyene ndina baptism ke mmọn̄ ye edisana spirit. Oro ọwọrọ ke ana mmọ ẹdi mme mbet Jesus oro Abasi adade nte nditọ esie. (John 3:3, 5) N̄kpọ en̄wen emi anade owo anam mbemiso odotde ndika heaven edi ndidu uwem nte Abasi oyomde, nnam akpanikọ, n̄ka iso nnam se inende, nnyụn̄ ntua owo mbọm. (1 Corinth 6:9-11) Owo oro enyene n̄ko ndisọn̄ọ nda nnam se Abasi ye Christ ẹdọhọde tutu enye akpa. (Luke 22:28-30; 2 Timothy 2:12) Mbon oro ẹnamde emi kpọt ẹdot ndiset n̄ka heaven n̄kanam akwa utom emi Abasi enịmde ọnọ mmọ, oro edi, nditiene Christ ndi oku ye ndidem, nnyụn̄ n̄kara isọn̄ emi ke tọsịn isua.—Ediyarade 20:6.

Anamidiọk oro ikanamke ndomokiet ke otu emi, edi ekedi abiatibet onyụn̄ akpa nte abiatibet. (Luke 23:32, 39-41) Imọfiọk ke enye ama etịn̄ ikọ ukpono ukpono ke ini enye ọkọdọhọde Jesus ete: “Ti mi ke ini afo odụkde obio ubọn̄ fo.” (Luke 23:42) Kpa ye oro, enye ikedịghe mbet Jesus, inaha baptism ke mmọn̄ ye ke edisana spirit man Abasi akpada enye nte eyen. Enye n̄ko ikodụhe eti uwem inyụn̄ inamke se Abasi ọdọhọde ẹnam. Ndi okpowụt ifiọk ndikere ke Jesus ọkpọdọhọ anamdiọk emi mîkanamke n̄kpọ Abasi nte mme mbet imọ mi editiene mmọ ada ubọn̄ ke heaven?—Rome 2:6, 7.

Ke uwụtn̄kpọ, yak idọhọ ke owo emi ekeyịpde okụk fo ekpe fi ubọk ete efen ọnọ imọ. Afo emekeme ndifen nnọ enye, unyụn̄ ukotke enye ikpe. Edi ndi akpayak mbubehe m̀mê ufọk fo esịn enye ke ubọk? Imọfiọk ke ukpunamke utọ n̄kpọ oro, edi ke akpayak esịn ke ubọk owo emi ekemede ndiberi edem. Kpasụk ntre, mbon oro Abasi ayakde ẹka heaven ẹdi mbon oro ẹdude uwem ke usụn̄ oro owụtde ke mmimọ iyaka iso inam se Abasi oyomde ke ini idikarade mme owo ke isọn̄ emi. (Ediyarade 2:10) Okposụkedi emi anamidiọk oro ekekpede Jesus ubọk ete eti imọ mbemiso enye akpade, enye ikanamke n̄kpọ ndomokiet ndiwụt ke imedi se ẹberide edem.

Edi ndi Jesus ikọdọhọke enye ke enye oyodu ye imọ ke heaven kpa usen oro? Ihih, ikọdọhọke sia Jesus ke idemesie ikakaha heaven usen oro, edi ekesịne “ke esịt isọn̄” usen ita. (Matthew 12:40; Mark 10:34) Idem ke Jesus ama ekeset ke n̄kpa, enye ama osụk odu mi ke isọn̄ ke usen 40 mbemiso ọdọkde aka heaven. (Utom 1:3, 9) Omokụt do ke idụhe nte anamidiọk oro okpokodude ye Jesus ke heaven usen oro.

Ewe Paradise ndien ke anamidiọk oro edidu? Jesus ama anam enye eset, enye edidu ke Paradise ke isọn̄ emi Jesus edikarade. (Utom 24:15; Ediyarade 21:3, 4) Edieke oyomde ndifiọk ekese mban̄a Paradise emi ye se Abasi oyomde owo anam, mbọk nyene nneme ye Mme Ntiense Jehovah.