Mmọ “Ẹma Ẹbiere Ndisịn Ifịk N̄kwọrọ Ikọ”

EYO ama ọtọtọn̄ọ ndifiop ke usenubọk Friday September 1922, ke ini owo 8,000 ẹkebụn̄ọde ẹdụk ufọkmbono ke Cedar Point, Ohio. Etieibuot okpokoro ama ọdọhọ ke owo ekeme ndiwọrọ ke ini akpan mbono emi, edi owo idiyakke enye afiak edidụk.

Ẹma ẹkwọ ikwọ ẹtọn̄ọ ikpehe oro ẹkekotde “Edinam Itoro.” Ekem, Brọda Joseph F. Rutherford ama ọdọk akada ke mbot utịn̄ikọ. Ata ediwak owo ikọdiọn̄ọke se enye okoyomde nditịn̄. Ufọk ama ofiop tutu anam ndusụk owo ẹsasan̄a ẹdọk, ẹsasan̄a ẹsụhọde. Brọda Rutherford ama ekpe mmọ ubọk ete ẹdisụhọde ẹtetie ẹkpan̄ utọn̄. Ke ini enye ọkọtọn̄ọde nditịn̄ ikọ, idụhe owo emi ọkọdiọn̄ọde ke ẹma ẹwan̄ akamba ediye ọfọn̄ ẹyịri ke ata enyọn̄ iso mbot utịn̄ikọ.

Ibuotikọ Brọda Rutherford ekedi: “Obio Ubọn̄ Heaven ke Ekpere.” Enye ama ada hour kiet ye ubak etịn̄ ke mme prọfet Abasi ikefeheke ndịk ndinam mme owo ẹfiọk ke Obio Ubọn̄ Heaven ekpere. Ke ini enye ekekperede ndikụre utịn̄ikọ esie, enye ama obụp ete: “Nte mbufo ẹmenịm ke akpanikọ ete ke Edidem ubọn̄ ama ọtọn̄ọ ndikara?” Kpukpru owo ẹma ẹbọrọ ke ọkpọsọn̄ uyo ẹte: “Ih!”

Ekem enye ama ọdọhọ ete: “Ẹfiak ndien ẹka an̄wautom, O mbufo nditọ ata edikon̄ Abasi! . . . Sese, Edidem ada ubọn̄! Mbufo ẹdi mme ọnọ-ntọt esie. Mmọdo ẹtan̄a, ẹtan̄a, ẹtan̄a.”

Kpa idaha oro ẹma ẹtat ọfọn̄ oro ẹkewan̄de ẹyịri ke enyọn̄ iso mbot utịn̄ikọ. Ẹkewet ke ọfọn̄ oro: “Ẹtan̄a Edidem ye Obio Ubọn̄.”

Ray Bopp ọdọhọ ke “n̄kpọ emi ama enem otuowo etieti.” Anna Gardner ọkọdọhọ ke “ẹma ẹkwak ubọk tutu ufọk ekpere ndinyek.” Fred Twarosh ọkọdọhọ ke “kpukpru owo ẹma ẹdaha ẹda.” Evangelos Scouffas ọkọdọhọ ete: “Eketie nte n̄kpọ eke ẹkedọhọde kpukpru owo ẹdaha ẹda inikiet; nnyịn ima idaha ida, mmọn̄eyet ama asiaha nnyịn ke enyịn.”

Ediwak mbon emi ẹkedụkde mbono oro ẹma ẹtọtọn̄ọ ndikwọrọ eti mbụk, edi mbono oro ama anam mmọ ẹbiere ndisịn idem n̄kwọrọ eti mbụk. Ethel Bennecoff ọkọdọhọ ke Nditọ Ukpepn̄kpọ Bible “ẹma ẹbiere ndisịn ifịk n̄kwọrọ ikọ nnyụn̄ nnen̄ede mma ukwọrọikọ.” Ẹma ẹbụp ke mbono oro ẹte: ‘Anie edika utom ọnọ nnyịn?’ Odessa Tuck, emi ekedide isua 18 ini oro, ama ebiere ndika. Odessa ọkọdọhọ ete: “N̄kọdiọn̄ọke ebiet emi ẹdidọhọde n̄ka, se ẹdidọhọde nnam, ye nte ndisan̄ade nnam se ẹdidọn̄de mi. Se n̄kọdiọn̄ọde edi ke n̄koyom ndikpebe Isaiah emi ọkọdọhọde ete: ‘Se mi mi! Dọn̄ mi utom.’ ” (Isa. 6:8) Ralph Leffler ọkọdọhọ esie ete: “Usen oro owo mîdifreke mi ke ẹkenen̄ede ẹtọn̄ọ nditan̄a Obio Ubọn̄, ndien ẹtan̄a enye mfịn ke ofụri isọn̄.”

Omokụt do ndien ntak emi akamba mbono oro ẹkenịmde ke 1922 ke Cedar Point, Ohio, ekedide ata akpan mbono! George Gangas ọkọdọhọ ete: “Mbono oro ama anam mbiere ke nditreke ndidụk kpukpru mbono.” Enye ikonyụn̄ itreke. Julia Wilcox ọkọdọhọ ete: “N̄kemeke nditịn̄ nte esitiede mi ke idem ini ekededi emi n̄wed nnyịn etịn̄de n̄kpọ aban̄a mbono oro ẹkenịmde ke Cedar Point ke 1922. Mmesidọhọ nte, ‘Jehovah sọsọn̄ọ nte akanamde mi ntiene ndụk mbono emi.’ ”

Ediwak nnyịn mfịn ke iteti mbono oro ekenemde nnyịn etieti, emi akanamde nnyịn inen̄ede ima Akwa Abasi nnyịn ye Edidem esie, inyụn̄ itetịm isịn ifịk inam n̄kpọ esie. Ndien emi esinam idọhọ Jehovah ite: “Jehovah sọsọn̄ọ nte akanamde mi ntiene ndụk mbono emi.”