Yak Jehovah An̄wam Fi Ọbiọn̄ọ Ndiọi Spirit

1. Ephesus 6:10-13 owụt ke nso idi usụn̄ kiet emi Jehovah enen̄erede owụt ke imekere iban̄a nnyịn? Nam an̄wan̄a.

USỤN̄ kiet emi Jehovah enen̄erede owụt ke imekere iban̄a nnyịn edi nte enye an̄wamde nnyịn ibiọn̄ọ mme asua nnyịn. Satan ye mme demon ẹdi akpan asua nnyịn. Jehovah odụri nnyịn utọn̄ aban̄a se mmọ ẹkemede ndinam nnyịn, onyụn̄ ọnọ nnyịn mme n̄kpọ emi ikemede ndida mbiọn̄ọ mmọ. (Kot Ephesus 6:10-13.) Ima inyịme Jehovah an̄wam nnyịn inyụn̄ iberi edem ke enye ke ofụri esịt, iyọbiọn̄ọ Devil inyụn̄ ikan enye. Apostle Paul ọkọdọhọ ete: “Edieke Abasi adade ye nnyịn, anie edibiọn̄ọ nnyịn?” Nnyịn n̄ko idọhọ kpa ntre.—Rome 8:31.

2. Nso ke idineme ke ibuotikọ emi?

² Se Satan ye mme demon ẹnamde inen̄ekede ibehe nnyịn emi idide mme ata Christian. Se inen̄erede ibehe nnyịn edi ndidiọn̄ọ Jehovah nnyụn̄ nnam n̄kpọ esie. (Ps. 25:5) Edi ọfọn idiọn̄ọ nte Satan esinamde n̄kpọ man enye idida n̄kari esie ikan nnyịn. (2 Cor. 2:11) Ke ibuotikọ emi, imọn̄ ineme akpan usụn̄ kiet emi Satan ye mme demon ẹsidade ẹbian̄a mme owo. Imọn̄ ineme n̄ko nte ikemede ndibiọn̄ọ mmọ nnyụn̄ n̄kan mmọ.

NTE NDIỌI SPIRIT ẸSIBIAN̄ADE MME OWO

3-4. (a) Nso idi ubụpekpo m̀mê n̄kpọ mme demon? (b) Mbon emi ẹnịmde ubụpekpo m̀mê n̄kpọ mme demon ẹwak didie?

³ Akpan usụn̄ kiet emi Satan ye mme demon ẹsidomode ndibian̄a mme owo edi ubụpekpo m̀mê n̄kpọ mme demon. Mme obụpekpo ẹsidọhọ ke mmimọ imekeme ndidiọn̄ọ mme n̄kpọ emi ikpîkpu owo mîdiọn̄ọke, mîdịghe ikeme ndinam n̄kpọ emi ikpîkpu owo mîkemeke ndinam. Ke uwụtn̄kpọ, ndusụk mmọ ẹdọhọ ke imekeme ndida ntantaọfiọn̄ m̀mê idiọn̄ ndiọn̄ọ se iditịbede ke ini iso. Ndusụk mmọ ẹkeme ndinam etie nte iketịn̄ ikọ ye mme akpan̄kpa. Ndusụk owo ẹbre ifọt m̀mê mfọni (magic), ẹsinyụn̄ ẹdomo ndikọk nduọhọ nnọ mbon en̄wen.b

⁴ Mbon emi ẹnịmde ubụpekpo m̀mê n̄kpọ mme demon ẹwak didie? Ke ndụn̄ọde kiet emi ẹkenamde ke idụt 18 ke Latin America ye ke Caribbean, owo kiet ke otu owo ita emi ẹkebụpde ẹnịm odudu mfọni, ifọt, m̀mê ibọk. Ata ediwak mmọ ẹnyụn̄ ẹnịm ke owo ekeme nditịn̄ ikọ ye mme akpan̄kpa m̀mê mme demon. Ke ndụn̄ọde efen emi ẹkenamde ke idụt 18 ke Africa, se ibede mbahade iba ke otu mme owo emi ẹkebụpde ẹnịm ke ifọt ẹnyene odudu. M̀mê owo odụn̄ ke m̀mọ̀n̄, ana owo ekpeme idem ye ubụpekpo m̀mê n̄kpọ mme demon, sia Satan oyom ndida ‘kpukpru mme andidụn̄ isọn̄ ntụn usụn̄.’—Edi. 12:9.

5. Jehovah ada didie ubụpekpo?

⁵ Jehovah edi “Abasi akpanikọ.” (Ps. 31:5) Afo ekere ke enye ada didie ubụpekpo m̀mê n̄kpọ mme demon? Jehovah asasua n̄kpọ oro! Enye ọkọdọhọ nditọ Israel ete: “Kûyak ẹkụt owo ekededi ke otu fo emi ọfọpde eyeneren esie m̀mê eyenan̄wan esie ke ikan̄, m̀mê owo ekededi emi ebrede idiọn̄, m̀mê ebre mfọni m̀mê owo ekededi emi omụmde ndomo m̀mê abiaidiọn̄, m̀mê owo emi ọkọkde nduọhọ ọnọ owo m̀mê obụp ekpo m̀mê etịn̄ ini iso m̀mê owo ekededi emi akade okobụp mme akpan̄kpa n̄kpọ. Koro kpukpru owo eke ẹnamde n̄kpọ emi ẹdi mbubiam n̄kpọ ke enyịn Jehovah.” (Deut. 18:10-12) Ibet emi Jehovah ọkọnọde nditọ Israel ibọpke mme Christian. Edi imọdiọn̄ọ ke Jehovah osụk asasua ubụpekpo m̀mê n̄kpọ mme demon.—Mal. 3:6.

6. (a) Didie ke Satan esida ubụpekpo m̀mê n̄kpọ mme demon anam mme owo ibak? (b) Ecclesiastes 9:5 owụt ke nso isitịbe inọ mbon emi ẹkpade?

⁶ Jehovah odụri nnyịn utọn̄ aban̄a ubụpekpo m̀mê n̄kpọ mme demon sia enye ọdiọn̄ọ ke Satan esidomo ndida n̄kpọ emi nnam mme owo ibak. Satan esida enye anam mme owo ẹnịm nsu, utọ nte enye emi ẹsidọhọde ke enyene ebiet emi mme akpan̄kpa ẹkade iso ẹdu uwem. (Kot Ecclesiastes 9:5.) Satan esida ubụpekpo m̀mê n̄kpọ mme demon anam ndịk anam mme owo, onyụn̄ anam mmọ ẹkpọn̄ Jehovah. Enye oyom mme owo ẹbuọt idem ye ndiọi spirit utu ke Jehovah.

NTE IDISAN̄ADE IBIỌN̄Ọ NDIỌI SPIRIT

7. Nso ke Jehovah eteme nnyịn?

⁷ Ima itetịn̄ ke Jehovah eteme nnyịn se ikpanamde mbak Satan ye mme demon ẹdibian̄a nnyịn. Yak ise ndusụk n̄kpọ emi ikemede ndinam man in̄wana ye mmọ.

8. (a) Siak akpan n̄kpọ emi esin̄wamde nnyịn isịn nsu emi ndiọi spirit ẹkpepde. (b) Didie ke Psalm 146:4 ayarade nsu emi Satan osude aban̄a se isitịbede owo ama akpa?

⁸ Kot Ikọ Abasi nyụn̄ tie kere se okotde. Ata akpan n̄kpọ emi esin̄wamde nnyịn isịn nsu emi ndiọi spirit ẹkpepde edi emi. Ikọ Abasi etie nte nsọsọp akan̄kan̄. Kpa nte akan̄kan̄ ekemede ndibahade n̄kpọ yak ẹda ẹkụt se isịnede ke esịt, ntre n̄ko ke Ikọ Abasi esiyarade nsu emi Satan ekpepde. (Eph. 6:17) Ke uwụtn̄kpọ, ẹsidọhọ ke mme akpan̄kpa ẹkeme nditịn̄ ikọ ye mme odu-uwem. Edi Bible owụt ke edi nsu. (Kot Psalm 146:4.) Bible eti nnyịn n̄ko ke Jehovah ikpọn̄ ekeme nditịn̄ nnennen nnennen se iditịbede ke ini iso. (Isa. 45:21; 46:10) Edieke isikotde Ikọ Abasi kpukpru ini inyụn̄ itiede ikere se ikotde, iyekeme ndisua nnyụn̄ nsịn nsu emi ndiọi spirit ẹyomde nnyịn inịm.

9. Nso ye nso ke nnyịn mîsisịnke ubọk?

⁹ Kûsịn ubọk ke n̄kpọ ndomokiet emi asan̄ade n̄kpọ ye ubụpekpo m̀mê n̄kpọ mme demon. Sia idide ata mme Christian, nnyịn isinamke n̄kpọ mme demon ke usụn̄ ekededi. Ke uwụtn̄kpọ, nnyịn isikaha ibịne obụpekpo m̀mê ebreidiọn̄, isinyụn̄ idomoke ndineme nneme ye mme akpan̄kpa ke usụn̄ ekededi. Nte ima ikeneneme ke ibuotikọ emi ekebede, edieke ẹnamde n̄kpọ ekededi ke ini ubụkowo emi owụtde ke ẹnịm ke mme akpan̄kpa ke ẹdu uwem ke ebiet en̄wen, nnyịn isisan̄ake n̄kpọ do ye utọ edinam oro. Nnyịn isinyụn̄ idaha idiọn̄ m̀mê usiak ntantaọfiọn̄ idomo ndidiọn̄ọ se iditịbede ke ini iso. (Isa. 8:19) Imọdiọn̄ọ ke kpukpru edinam oro ẹdiọk etieti, ke mmọ ẹnyụn̄ ẹkeme ndinam owo eneme nneme nnennen nnennen ye Satan ye mme demon.

10-11. (a) Nso ke ndusụk owo ke eyo mme apostle ẹkenam ke mmọ ẹma ẹkekpep akpanikọ? (b) Didie 1 Corinth 10:21 owụt ntak emi ikpekpebede mme Christian eyo mme apostle? Didie ke ikeme ndikpebe mmọ?

¹⁰ Biat mîdịghe duọk n̄kpọ ekededi emi asan̄ade n̄kpọ ye ndedịbe odudu. Ndusụk owo ke Ephesus ke eyo mme apostle ẹma ẹsibụp ekpo m̀mê ẹnam n̄kpọ mme demon. Ini mmọ ẹkpepde akpanikọ, mmọ ẹma ẹsọsọp ẹnam n̄kpọ. Utom 19:19 ọdọhọ ete: “Ediwak mmọ emi ẹkesibrede mfọni ẹtan̄ n̄wed mmọ ẹbon ọtọkiet ẹnyụn̄ ẹfọp mmọ ke iso kpukpru owo.” Mmọ ẹma ẹnam se ededi emi mmọ ẹkemede man ẹbiọn̄ọ mme demon. Mme n̄wed mfọni mmọ oro ama ọsọn̄ urua etieti. Mmọ ẹkefọfọp mme n̄wed oro utu ke nditan̄ nnọ mme owo m̀mê ndinyanyam. Idịghe okụk emi editakde mmọ ekebehe mmọ; se ikebehede mmọ ekedi nte mmọ ẹkpenemde Jehovah esịt.

¹¹ Didie ke ikeme ndikpebe mme Christian eyo mme apostle oro? Ọkpọfọn ibiat m̀mê ifọp n̄kpọ nnyịn ekededi emi asan̄ade n̄kpọ ye ndedịbe odudu. Emi esịne ibọk n̄kpemeidem emi ẹsikọn̄ọde, ẹsịnede, ẹkụnede, m̀mê ẹnịmde ke ufọk man n̄kpọ idinam owo m̀mê man ndiọi spirit idinam owo n̄kpọ.—Kot 1 Corinth 10:21.

12. Mme mbụme ewe ke ikpobụp idem nnyịn ke ini idụn̄ọrede se idade inem idem esịt?

¹² Nen̄ede dụn̄ọde se adade enem idem esịt. Bụp idemfo ete: ‘Ndi mmesikot n̄kpọ emi aban̄ade ndedịbe odudu ke mme n̄wed, magazine, m̀mê ke Intanet? Nso utọ ikwọ ke nsikpan̄ utọn̄ n̄kop? Nso utọ fim ye edinam TV ke nsise? Nso utọ vidio game ke nsibre? Ndi ndomokiet ke otu oro asan̄a n̄kpọ ye ubụpekpo m̀mê n̄kpọ mme demon? Ndi ẹsiban̄a ifọt, ekpo, m̀mê n̄kpọ emi ẹnamde ke “enyịn efen”? Ndi se ẹsitịn̄de ẹban̄a do esinam etie nte ke mfọni, nduọhọ, m̀mê ukọkibọk idiọkke?’ Imọdiọn̄ọ ke idịghe kpukpru fịm m̀mê mbụk ẹsiban̄a ubụpekpo m̀mê n̄kpọ mme demon. Edi ke adade ini odụn̄ọde se afo esidade enem idem esịt, biere ke idimek mbon emi ẹdin̄wamde fi enen̄ede ọsọn mme n̄kpọ emi Jehovah asuade. Iyom ndinam se ikekeme man ‘inyene eti ubieresịt’ ke enyịn Abasi.—Utom 24:16.c

13. Nso utọ mbụk ke nnyịn mîkpesibụkke?

¹³ Kûsubụk mbụk emi aban̄ade mme demon. Iyom ndikpebe Jesus ke n̄kpọ emi. (1 Pet. 2:21) Mbemiso enye ekedide isọn̄, enye okodụn̄ ke heaven, ama onyụn̄ ọdiọn̄ọ ediwak n̄kpọ aban̄a Satan ye mme demon. Edi enye ikesibụkke inọ mme owo se ndiọi spirit emi ẹkesinamde. Jesus okoyom ndidi ntiense Jehovah; ikoyomke nditan̄ ase Satan. Imekeme ndikpebe Jesus ke nnyịn nditre ndisuan mbụk emi aban̄ade mme demon. Utu ke oro, idida se itịn̄de iwụt ke akpanikọ enenem nnyịn.—Ps. 45:1.

14-15. (a) Ntak emi nnyịn mîkpefeheke ndiọi spirit? (b) Nso iwụt ke Jehovah ke ekpeme ikọt esie mfịn?

¹⁴ Kûyak ndịk ndiọi spirit anam fi. Ndiọi n̄kpọ ẹkeme nditịbe nnọ nnyịn ke idiọk ererimbot emi. Aksiden, udọn̄ọ, m̀mê n̄kpa ekeme ndisịm owo ke ini owo mîkodorike enyịn. Edi ikpanaha edi utọ n̄kpọ emi ama etetịbe, nnyịn ikere ke ndiọi spirit ẹnam nnyịn. Bible ọdọhọ ke “ini ye n̄kpọntịbe unana idotenyịn” ẹkeme ndisịm owo ekededi. (Eccl. 9:11) Ekpedi eke mme demon, Jehovah owụt ke imọ imenen̄ede inyene odudu ikan mmọ. Ke uwụtn̄kpọ, Abasi ikayakke Satan owot Job. (Job 2:6) Ke eyo Moses, Jehovah ama owụt ke imọ imenyene odudu ikan mme oku mfọni Egypt. (Ex. 8:18; 9:11) Ke ẹma ẹkenọ Jesus ubọn̄, Jehovah ama ọnọ enye odudu, Jesus ama onyụn̄ owụt ke imọ imenyene odudu ikan Satan ye mme demon ini enye okosion̄ode mmọ ke heaven ọduọn̄ọ ke isọn̄. Ndien ke mîbịghike, ẹyedọn̄ mmọ ke editụn̄ọ ukpe. Mmọ idikemeke ndisịne do nnam owo ndomokiet ibak.—Edi. 12:9; 20:2, 3.

¹⁵ Ediwak n̄kpọ ẹdu emi ẹwụtde ke Jehovah ke ekpeme ikọt esie mfịn. Kere ban̄a emi ise: Nnyịn ke ikwọrọ inyụn̄ ikpep mme owo akpanikọ ke kpukpru ebiet ke ererimbot. (Matt. 28:19, 20) Utom emi anam iyarade kpukpru ibak Devil. Ekpedi Satan ekeme ndinam nnyịn itre kpukpru se isinamde, akpanam. Edi enye ikemeke. Ntre ufọn idụhe nnyịn ndifehe ndiọi spirit. Imọdiọn̄ọ ke “enyịn Jehovah [ke asan̄a] akanade ofụri isọn̄ man enye owụt odudu esie ke ufọn mbon oro ẹnamde n̄kpọ ẹnọ enye ke ofụri esịt.” (2 Chron. 16:9) Edieke isọn̄ọde ida ye Jehovah, mme demon idikemeke ndinam nnyịn ikûnyene nsinsi uwem.

NTE JEHOVAH ESIDIỌN̄DE MBON EMI ẸYAKDE ENYE AN̄WAM MMỌ

16-17. Nọ uwụtn̄kpọ kiet ndiwụt ke ana owo enyene uko man ekeme ndibiọn̄ọ ndiọi spirit.

¹⁶ Ana inyene uko man ikeme ndibiọn̄ọ ndiọi spirit, akpan akpan ke ini mme ufan m̀mê iman nnyịn emi ẹkerede ke inam nnyịn ufọn ẹkọbọde nnyịn sia ẹkerede ke n̄kpọ ọmọn̄ anam nnyịn edieke nnyịn mîtieneke inam se ẹnamde. Jehovah esidiọn̄ mbon emi ẹnyenede uko ẹbiọn̄ọ ndiọi spirit. Kop uwụtn̄kpọ sista kiet ke Ghana emi ekerede Erica. Enye ekedi isua 21 ini enye ọtọn̄ọde ndikpep Bible. Sia enye ekedide eyen abiaibọk, akana enye esitiene ata unam emi ete esie ekesiwade ọnọ mme abasi esie. Ini Erica ekesịnde ndita, mbon ubon mmọ ẹkekere ke enye omiom mme abasi oro. Mmọ ẹma ẹnịm ke mme abasi oro ẹyenam mmimọ idama inyụn̄ idọn̄ọ.

¹⁷ Mbon mme Erica ẹma ẹdomo ndinyịk enye ata unam oro edi enye ama esịn, kpa ye oro enye ọkọdiọn̄ọde ke oro ọmọn̄ anam ẹbịn imọ ẹsio ke ufọk. Ndusụk nditọete ẹma ẹyak enye ẹdidụn̄ ye mmọ. Nte Jehovah ọkọdiọn̄de Erica edi oro—anam enye enyene obufa ubon—nditọete ẹkeditie nte ata nditọeka idịbi kiet ẹnọ enye. (Mark 10:29, 30) Kpa ye emi ubon mme Erica ẹkesịnde enye ẹnyụn̄ ẹfọpde n̄kpọ esie, Erica ama ọsọn̄ọ ada anam n̄kpọ Jehovah, onyụn̄ ana baptism. Idahaemi enye edidi asiakusụn̄ ofụri ini. Ndịk mme demon inamke enye. Enye ọdọhọ ntem aban̄a ubon esie: “Mmesibọn̄ akam kpukpru usen nte yak mbonubon mi ẹdiọn̄ọ Jehovah, ẹdinam n̄kpọ ẹnọ edima Abasi nnyịn, ẹnyụn̄ ẹwọrọ ke ufụn.”

18. Nso edidiọn̄ ke idibọ edieke ibuọtde idem ye Jehovah?

¹⁸ Idịghe kpukpru nnyịn ke utọ idomo oro edisịm. Edi ana kpukpru nnyịn ibiọn̄ọ ndiọi spirit inyụn̄ ibuọt idem ye Jehovah. Ima inam ntre, iyọbọ ediwak edidiọn̄, Satan idinyụn̄ ikemeke ndida nsu esie mbian̄a nnyịn. N̄kpọ efen edi ke nnyịn idiyakke ndịk mme demon anam nnyịn itre ndinam n̄kpọ Jehovah. Akakan n̄kpọ edi ke iyenen̄ede ikpere Jehovah. James emi ekedide mbet Jesus ọkọdọhọ ete: “Ẹsụk idem ẹnọ Abasi; edi ẹbiọn̄ọ Devil, ndien enye eyefehe ọkpọn̄ mbufo. Ẹsan̄a ẹkpere Abasi, ndien enye ayasan̄a ekpere mbufo.”—Jas. 4:7, 8.