4 | Nti Item Do ke Bible

Se Ọwọrọde

Kpa ye oro Bible mîdịghe n̄wed usọbọ, enye ọdọn̄ọ nti item emi ẹkemede ndin̄wam owo emi enyenede mfịna ibuot. Yak ise ndusụk item oro.

Nte Item Bible Ekemede Ndin̄wam

“Mbon emi idem ọsọn̄de isiyomke abiausọbọ, edi mbon oro idem mîsọn̄ke ẹsiyom.”​—MATTHEW 9:12.

Bible anam idiọn̄ọ ke idiọkke ndika ufọkibọk. Mme dọkta ẹn̄wam ediwak mbon emi ẹnyenede mfịna ibuot ke ini mmọ ẹkade ẹbịne dọktọ ẹnyụn̄ ẹyom usụn̄ ndidiọn̄ọ n̄kpọ mban̄a mfịna mmọ.

‘Ndisịn̄ede idem ọfọn owo ke idem.’​—1 TIMOTHY 4:8.

Ndida ini nnam mme n̄kpọ emi esinamde idem ọsọn̄ owo ekeme ndin̄wam owo emi enyenede mfịna ibuot. Mme n̄kpọ emi esịne ndisịn̄ede idem, ndia nti udia, nnyụn̄ nde idap ọfọn.

“Esịt eke adarade ọkọk ubiak, edi edu mfụhọ an̄wan owo ọkpọ.”​—MME N̄KE 17:22.

Ndikot mme itie Bible emi ẹkemede ndisọn̄ọ owo idem nnyụn̄ mbiere mme n̄kpọ emi idikemede ndinam ekeme ndinam ikop inemesịt. Edieke etide nti n̄kpọ emi Abasi anamde ọnọ fi onyụn̄ enịmde ke n̄kpọ ọyọfon, emi ekeme ndin̄wam fi ọyọ ke ini enyenede mfịna ibuot.

“Ọniọn̄ odu ye mbon nsụkidem.”​—MME N̄KE 11:2.

Edieke okụtde ke ukemeke ndinam kpukpru n̄kpọ ke idem fo, nyịme mbon en̄wen ẹn̄wam fi. Mme ufan fo ye mbonubon fo ẹkeme ndiyom ndin̄wam fi, edi mmọ idiọn̄ọke se ẹkpenamde. Nam mmọ ẹdiọn̄ọ se akpamade mmọ ẹnam ẹnọ fi. Diọn̄ọ ke idịghe kpukpru n̄kpọ ke mmọ ẹkeme ndinam nnọ fi nyụn̄ kọm mmọ ke ekpri se mmọ ẹkemede ndinam.

Nte Item Bible An̄wamde Mbon Emi Ẹnyenede Mfịna Ibuot

“Nte eketiede mi ke idem ama anam ndiọn̄ọ ke mmenyene mfịna, ntre mma n̄ka n̄kokụt dọktọ. Enye ama anam ndiọn̄ọ se idide mfịna mi nnyụn̄ ndiọn̄ọ mme utọ usọbọ emi ẹdude ke edem nnyịn ye se n̄kemede ndinam man nse mban̄a idem mi.”​—Nicole,a emi enyenede mfịna ibuot.

“Mmedikụt ke ndikot Bible ye n̄wan mi kpukpru usenubọk esinam nnen̄ekede mfụhọ ofụri usen oro. Enyene itie Bible emi esidọn̄de mi esịt usen emi esịt enen̄erede etịmede mi.”​—Peter, emi esinen̄erede ofụhọ.

“Bụt ikesiyakke mi ntịn̄ se ifịnade mi nnọ mme owo. Edi ufan mi ama esikpan̄ utọn̄ ọnọ mi onyụn̄ odomo ndifiọk nte etiede mi ke idem. Enye ama esisọn̄ọ mi idem onyụn̄ anam ndiọn̄ọ ke imọ do ye ami.”​—Ji-yoo, emi mîsikemeke ndidia udia.

“Bible an̄wam mi ndiọn̄ọ nte n̄kpanamde utom ye nte n̄kpọduọkde odudu. Se Bible etịn̄de an̄wam mi nyọ mfịna mi.”​—Timothy, emi enyenede mfịna ibuot.