Boghe ayokh ane Zadok

1-2. Za a mbe Zadok ? (1 Milang 12:22, 26-28)

TAME simane, nkuna bôt a lôt 340 000, ba mane kôane naa ba ke tuè David ane kéza ye Israel ngura. Tang melu melal, ba wokh édung minlang, bya ye luèñ, minkôô mi ne bébéñ Hebrón (1 Mila. 12:39). É ne bo ndzukh naa, be yem étong Zadok nkuna bôr té été. Ve, Jehôva a nga ve naa bi yem naa, Zadok a mbe ézizang nkuna bôr té été (A lang 1 Milang 12:22, 26-28). Za a mbe Zadok ?

² Zadok a mbe é fara a mbe é sèñ nsama ye é fara n’nen Abiathar. Nzame a nga ve fe Zadok môra fakh ye akeng ya wokh nkômane wèñ (2 Sam. 15:27). Bôr be mbe bé ke yen Zadok éyong be mbe bé kômô melepgha me ne fakh. A mbe fe aval môr é mbe ayokh. Nfa ye mefulu mèñ meté, éde bia ye yen ayeghle di été.

3. (a) Amu dzé bebo-bisèñ Jehôva ba yiane bo ayokh ? (b) Za dzam bia ye yen ayeghle di été ?

³ Melu me ye asughlane ma, Satan a veme mefakh mèñ naa, a lumane ayong Jehôva (1 Pierre 5:8). Bia yiène bo ayokh nté bia yane é tam Jehôva a man ye Satan, ye ntukh émo wèñ (Bya 31:24). N’yenghane meval melal bi ne vu ayokh Zadok.

A SUKH ÉDJIÉ NZAME ASI

4. Amu dzé ayong Jehôva da yiane bo ayokh naa be sukh Édjié dèñ asi ? (A daghe fe évaghle).

⁴ Bia, ayong Jehôva, bia sukh Édjié dèñ asi ya n’nem ôsese, ve biyong bizing, da sili naa bi bo ayokh naa bi bo de (Mat. 6:33). Éfônan, mbia émo di été, bia yiane bo ayokh naa bi ning bi kang metsin metsing Jehôva ye kanghle mbemba fuéñ ye Édjié dèñ (1 Beth. 2:2). Da sili fe naa, bi bo ayokh naa bi tobe kaa ñong ngap nfa mam me politik, émo é ne nkanane di été (Jean 18:36). Ayong Jehôva été, abuiñ be nga dzimle akum, be nga tsible be, ye wua be mimbokh amu be nga tep naa ba ñong ngap nfa mam me politik nge ki a bo aluman.

5. Amu dzé Zadok a nga yiane bo ayokh naa a sukh David asi ?

⁵ Zadok éé dzi ki ke Hebrón fave naa, a ke dzemle éto kéza David. A nga ke wéñ ye mengèè ye fe nkôman akal aluman (1 Mila. 12:38). A mbe nkoghane naa a tông David aluman été, ye kamane Israel asu minzizing mièñ. Afiang bo naa Zadok éé mbe ki moan ézima, kaa ki bele akeng nfa, ve, a mbe ayokh.

6. Aval avé David a nga ve Zadok mbemba éfônan nfa ayokh ? (Bya 138:3)

⁶ Vôm mbé moan fara ane Zadok, a nga yeghe naa a bele aval ayokh té ? A mbe ézizang befam be mbe ngu’u ye ayokh. Kaa bisô naa, a nga yeghe de ya éfônane deba. Éfônan, amu David a mbe ‘ndjié ye mbo-aluman a mbe édedaa ayokh’, éde ayong Israel ngura é nga kômô ñe tuè kéza (1 Mila. 11:1, 2). David a nga yagbe mban ébe Jehôva naa a vole ñe asu minzizing mièñ (Bya 28:7 ; A lang Bya 138:3). Zadok a mbe a bele bifônane bife bi nga vole ñe naa a bo ayokh ; befam ane Jehoiadá nge ki Joad ye ndôma dzèñ, mbo-alumane Benaya, ye fe bedjié ye menvokh 22 be mbe bé luman é ngam David (1 Mila. 11:22-25 ; 12:26-28). Befam besese beté, be mbe be bele nkôman ô ne ngu’u naa, ba tuè David kéza ye kamane ñe.

7. (a) Za bifônane nfa ayokh ye melu maa, bi ne vu ? (b) Za dzam ô ne yeghe ya éfônan ayokh moadzang waa Nsilu, aval ane bia yen de éngengeng été ?

⁷ Bia bele ngu’u ye ayokh éyong bia fas bifônan é bôr be nga sukh ye ayokh Édjié Jehôva asi. É kéza waa, Yésu Christ, a nga tebe naa bip éyong be nga yemle ñe naa a ñong ngap ébe mam me politik ye émo Satan di (Mat. 4:8-11 ; Jean 6:14, 15). A nga yagbe ébe Jehôva éyong ése naa, a bele ngu’u. Bi bele fe abuiñ bifônan bi ye metam maa, ye bitong befam be nga tep naa ba ñong ngap ébe mam me politik. Amu dzé biaa ñong ki tam naa, bia fas é mbemba bifônan bieba, bia yen a nden waa jw.orga ?

VOLEGHANE BEVOO YE ÉBA BEVOO

8. Amu dzé é ne sili bemvene ayokh naa be ve bobedzang beba avole da yiène ?

⁸ Ayong Jehôva da dzing da volane bevoo ye éba bevoo (2 Becor. 8:4). Ve daa, biyong bizing, dzam té é ne sili ayokh. Éfônan, éyong aluman da laa, bemvene be ye vôm té, be ne yen naa, bobeñang ye bekal beba, be ne yi naa be saghe be, be sukh be asi, éyong ézing naa, be ve be bidzi nfa ya nsisim nge ki, nfa ya nsôn. Ya édzing be bele akal mintôma, bemvene ba tebe aval bitéñ bi ne ve naa be dzimle bining bieba, amu ba kômô be ve é dzam ba yi (Jean 15:12, 13). Ye aval mboane té, ba lere naa ba vu éfônan ayokh Zadok.

9. Ane bia lang de nten 2 Samuel 15:27-29, za dzam David a nga dzô Zadok naa a bo ? (A daghe fe évaghle).

⁹ David a mbe dzimle éning dèñ. Ndôma dzèñ, Absalon, a mbe a bele nkôman ô ne ngu’u naa a wup ñe édjié (2 Sam. 15:12, 13). David a nga yiène kôre a Jerusalén avôô-avôô ! A nga luè bebo-bisèñ bèñ ye dzô be naa : « Tebeghan, bi tup, amu naa môr ézing aa ye ki tobe nkôran é mo Absalon ! » (2 Sam. 15:14) Nté bebo-bisèñ David be mbe bé tup, ane a nga yen naa, môr a yiène lighe a kisôan, naa a bo é kare ñe é mam Absalon a kôman. Éde a nga lôm Zadok ya befara befe naa, be bo bé kare ñe mam meté (A lang 2 Samuel 15:27-29). Be nga yiène bo édedèè nkee. É dzam David a nga dzô befara beté naa be bo, éé mbe ki ébubu, é mbe fe ve naa, be dzimle bining bieba. Absalon, a mbe é môr a ne nget, é simane ve émien, ye naa, a nga kong ésaa wèñ a nga byèñ ñe. Tamane siman é dzam a mbe bo Zadok ye befara bevoo, nge a nga yem naa, be mbe bé kare David é mam mese a mbe é bo nfa ye naa, be kamane David !

10. Aval avé Zadok ya é bôr be mbe ye ñe be nga kamane David ?

¹⁰ David a nga sili Zadok ye Husái nge ki Houshaï, é mvuiñ dzèñ éfe é mbe ñe sôsôe naa, be vole ñe a kômane dzam ézing (2 Sam. 15:32-37). Amu naa a mbe é tông ntaane mam David, Husái nge ki Houshaï a nga bo ane a sukh Absalon asi, éde a nga ve ñe melepgha nfa aval a mbe kômane naa a luman a David. Dzam té é nga ve David tam naa, a kôman akal aluman. Éyong Absalon a nga bèè melepgha Hushái nge ki Houshaï a nga ve ñe, éde Husái a nga kanghle Zadok ba Abiathar, é dzam be nga mane kôman (2 Sam. 17:8-16). Éyong té, befam bebèñ beté, be mbe dzô David, é dzam Absalon a mbe é kôman (2 Sam. 17:17). Ye avole Jehôva, Zadok ye befara bevoo be nga vole naa be kaman éning David (2 Sam. 17:21, 22).

11. Aval avé bi ne vu éfônan ayokh Zadok éyong bia vole bobedzang ?

¹¹ Nge be luè bia naa, bi ke vole bobedzang éyong metam me ne ndzukh, aval avé bi ne bo ayokh ane Zadok ? (1) A bèè melepgha. Aval metam meté, é ne éban naa bi tobe élat. A yebe melepgha ma so bia ntem ékôan (Behéb. 13:17). Bemvene ba yiane bo mban a fas mintaane mimam mieba nfa bibubua bimam, ya fe melepgha Ékôan da ve be, nfa ye é mam ba yiane bo éyong bibubua bimam bi nkune boban (1 Becor. 14:33, 40). (2) A bo ayokh, ve daa nkee (Mink. 22:3). A bele mbemba ken. Mi taa dzeng naa mi tebe bitéñ bi ne ve naa, mi dzimle bining bienan a zeze. (3) A yagbe ébe Jehôva. Simghane naa, Jehôva a bira bis mbeng wônan ya éwi é bobeñong benan. A ne mia vole naa, mi sukh bobeñong asi, kaa naa mia tebe mbia bitéñ.

12-13. Za dzam éfônane Viktor ye Vitalii da yeghle bia ? (A daghe fe évaghle).

¹² N’ñonghan éfônane Viktor ye Vitalii, bobedzang bebèñ be ne éwôlô nsisim be nga sèñ nfa ye a ve bobedzang beba bidzi ye mendzim a Ukrania. Viktor a dzô naa : « Bi mbe bi dzeng bidzi vôm asese. Biyong bizing, bi mbe bi wokh ane ngal da bam é vôm bi mbe. Moadzang ézing a nga ñong bidzi é vôm a mbe é baghle bio naa a ve bia bie. Bidzi bité, bi nga ve abuiñ bekare-fuèñ naa be bele é dzam be nga yi naa be ning tam té. Nté bi mbe bi ve biôm metua été, bomba nge ki bombe a nga zu ku bemetros nge ki bemètre 20 ye vôm bi mbe. Ngura nté môs, me mbe mé dzaa Jehôva naa, a ve ma ayokh nfa ye a ke ôsu ya vole bekare-fuèñ. »

¹³ Vitalii ñ’a dzô naa : « Dzam té é nga sili bia naa bi bo édedèè ayokh. Ékena ôsua dam, é nga bem mewala 12. Me nga yaghlane Jehôva ngura ékena té. » Vitalii a mbe ayokh ve daa, a mbe fe nkee. A koghle naa : « Me nga tsini ôsu ye dzaa Jehôva naa, a ve me fakh, ye naa, a vole ma a yem meniè mam. Me nga lôt fave bisala bidjié bi nga dzô naa bia yiane wulu. Mebun mam me nga vem, éyong me mbe mé yen aval bobedzang ye bekal baa, be mbe bé sèñ nsama. Be mbe bé vaa é biôm bi mbe bi yè zen, ya ñong bidzi, bitô, ye é biôm bife bi mbe éban, naa be ñiè bie metua waa été. Ye fe naa, be mbe fe bé ve Viktor ye ma, é dzôm bi mbe dzi ya é vôm bi mbe waghan a zen. »

TSINIGHE ÔSU NAA WA TOBE SÔSÔE YE JEHÔVA

14. Aval avé dzam té é ne bia name nge é môr bia dzing a sum wulu ékoar-koar ye Jehôva ?

¹⁴ Étsible é ne bia dang bo ndzukh a zômô, é ne éyong môr ye é nda-bôr dzaa nge ki mvuiñ dzaa da likh Jehôva (Bya 78:40 ; Mink. 24:10). Nge élat bi bele ya môr té é ne édedèè ngu’u, é ne bia bo édedaa ayèñ naa bi yebe étéñ té. Nge ô tubaneyang aval ndzukh dzam té, éfônane sôsôe Zadok é ne wô wône.

15. Amu dzé Zadok a nga yiène bo ayokh nfa ye naa a tsini ôsu ye wulu sôsôe ya Jehôva ? (1 Bedjié 1:5-8)

¹⁵ Zadok a nga tsini ôsu naa a wulu sôsôe ye Jehôva éyong é mvuiñ dzèñ Abiatar é nga top naa a bo ékoar-koat. Dzam té é nga boban amangha ye édjié David. Éyong David a mbe é yirane awu dèñ bébéñ, ndôma dzèñ, Adoniya, a nga dzeng naa a dure édjié Jehôva a nga kiagh akal Salomon (1 Mila. 22:9, 10). Abiatar a nga top naa, a sukh Adoniya asi (A lang 1 Bedjié 1:5-8). Ya mboane té, Abiatar éé dzi ki bo ékoar-koat niène ve ya David, a nga bo fe ékoar-koat ye Jehôva ! Ye ô ne siman abim avé dzam té é nga tobe Zadok abé ye ve ñe n’nem mintèñ ? Abiathar ba Zadok be nga sèñ nsama ane befara a lôr mimbu mewôm-menii (2 Sam. 8:17). Be nga kale é « arca nge ki arche ña Nzame » nsama (2 Sam. 15:29). Ôsusua, befam bebèñ beté, be nga sukh édjié David asi, ye bo abuiñ mam mefe (2 Sam. 19:11-14).

16. Za dzam é nga yiène vole Zadok naa a tsini ôsu ya wulu sôsôe ye Jehôva ?

¹⁶ Zadok a nga tsini ôsu ye wulu sôsôe ya Jehôva amben nkighan Abiatar a nga ñong. David a nga yem naa, a mbe tsini ôsu ya tobe mebun ye Zadok. Éyong ntaane mam Adoniya ô nga kulan, David a nga yen Zadok, Natán ya Benaya naa be tuè Salomon éto kéza (1 Bed. 1:32-34). A tobe ya besôsôe bebo-bisèñ Jehôva, ane Natán ye é bôr befe be nga sukh kéza David asi, é nga yiène ve Zadok ngu’u ye saghe ñe (1 Bed. 1:38, 39). Éyong Salomon a nga bo kéza, a « nga tele Zadok ane fara évang Abiatar » (1 Bed. 2:35).

17. Aval avé ô ne vu Zadok éyong é môr wa dzing a lum Jehôva mvus ?

¹⁷ Aval avé ô ne vu éfônane Zadok ? Nge é môr wa dzing a top naa a lum Jehôva mvus, wa yiène lere Jehôva naa, wa top naa wa tobe ñe sôsôe (Jos. 24:15). Jehôva a ye wa ve ngu’u ye ayokh wa yi. Yaghlane Jehôva ye tsini ôsu naa wa tobe élat ye memvuiñ muè me ne ñe sôsôe. Jehôva a bira dzing é sôsôe duè, a ye fe borane wa akal té (2 Sam. 22:26).

18. Za ayeghle wa ñong ye é dzam é nga lôrane ye Marco ba Sidse ?

¹⁸ N’tamane yen éfônane Marco ya ngal, Sidse, éba bengoan beba be ne beñabôrô, be nga lum bebela mvus. Marco a dzô naa : « Mia bira dzing é boan benan atéé ye é môs ba byale. Mia dzeng é mam mesese mi ne bo naa mi kame be. Ya dzam té, éyong ba top naa, ba lum Jehôva mvus, da bira mina bo n’nem mintèñ. » A tsini é dzô naa : « Ve, Jehôva a nga tsini naa a tobe ye bia. A nga ve naa, é tam me mbe atekh, ngal wom a bo ngu’u, éyong ñ’a ki, a mbe atekh, ma me bo ngu’u. » Sidse a koghle naa : « Bii be ki zômô dzam té nge kaa é ngu’u bi nga yi, é nga so bia ébe Jehôva. Me mbe mé lumane ya ôsiman ô ne naa, ma me ne bidzô, ve me mbe mé kare Jehôva aval ma siman. Niène ôyôm tam ô nga lôt, é moadzang ézing bia ñe bi nga bo abuiñ mimbu kaa yenan, a nga yir ma bébéñ, éde a nga bere ma mo bitu’u, a daghe ma a mis été, éde a nga dzô me naa : ‘A Sidse, simane naa, se ki wa ô ne bidzô !’ Ye avole Jehôva, me nga bera tsini naa, ma sèhane ñe ye mevakh. »

19. Za dzam mia kikh naa mia ye bo ?

¹⁹ Jehôva a kômô naa bebo-bisèñ besese bèñ, be bo ayokh ane Zadok (2 Tim. 1:7). Ve, aa vaghle ki kômô naa bi yegbe ébe é ngu’u dzèè. A kômô naa bi yegbe ébe ñe. Ya dzam té, nge ô tebe étéñ da dzaa naa ô bo ayokh, yagbe ébe Jehôva. Ô ne tobe a mebun naa, a ye wa vole naa ô bo ayokh ane Zadok ! (1 Pierre 5:10).