iKau

Vei Kemuni na Dauwiliwili:

Vakacava, o vakila ni o volekata na Kalou? Levu era vakabauta ni sega ni rawa. So era kaya ni sa rui yawa, so tale era kaya ni sega ni ganiti ira mera toro voleka vua nira sega ni savasava. Ia e uqeti keda na iVolatabu: “Toro voleka vua na Kalou ena qai toro voleka mai vei kemuni o koya.” (Jemesa 4:8) E vakadeitaka vei ira na qaravi koya: “O yau o Jiova na nomu Kalou, au taura tiko na ligamu imatau, o koya e tukuna vei iko, ‘Kua ni rere. Au na vukei iko.’”—Aisea 41:13.

Eda na veivolekati vakacava kei na Kalou? Na veitokani kece e yavutaki ena veikilai vinaka, itovo, kei na veika e kilai kina. Eda na vulica ena iVolatabu eso na itovo ni Kalou kei na ka e dau cakava. Nida vakasamataka na itovo yadua i Jiova, nona ucui koya vinaka o Jisu Karisito, kei na sala meda vakatotomuri rau kina, sa na qai rawa nida toro voleka vua na Kalou. Eda na raica ni o Jiova e Turaga Cecere Duadua ni lomalagi kei na vuravura qai Tamada vinaka duadua. E Kalou kaukaua, lewadodonu, vuku, dauloloma, qai sega vakadua ni biuti ira na luvena yalodina.

Me vukei iko mada ga na ivola qo mo toro voleka vua na Kalou o Jiova, me qaqaco vinaka nomudrau veiwekani, mo rawa ni vakacaucautaki koya me tawamudu.