Rawa ni Okati e Dua na Olodei ni Lotu butobuto me vaKarisito?
ENA vula i batabata ni 2004, a yaco e dua na veileti ena gauna ni Kirisimasi e Itali. E so na qasenivuli kei ira era vakaitutu ena tabana ni vuli, era tokona na vakasama me vakalailaitaki se bokoci vakadua na ivalavala ni lotu ni Kirisimasi. Ra kaya ni levu na gonevuli era sega ni lotu Katolika se lotu Tawase. Ia, e so na tamata vuli kei na qasenivuli era vinakata me rokovi na ivalavala tudei oya.
Ni veiletitaki vakalevu, e vu sara mada mai vei na kena dau solevutaki na Kirisimasi? Ni torocake tiko na kena veiletitaki, e talei dina e so na vakadidike a tabaki ena nodra niusipepa na Vatikani, L’Osservatore Romano.
E tukuna na niusipepa ni Katolika me baleta na tikinisiga e solevutaki kina na Kirisimasi: “Na tikinisiga dina a sucu kina o Jisu e sega ni kilai, sega ni vakadeitaki tale ga na tikinisiga oqori ena itukutuku makawa ni wili lewenivanua e Roma ena gauna oya kei na vakadidike ena veisenitiuri sa oti. . . . Na tikinisiga e kilai raraba tu me 25 Tiseba, a digitaka na lotu vakaRoma ena ikava ni senitiuri. E dau solevutaki kina na kalou matanisiga ena lotu butobuto vakaRoma . . . Dina ga ni sa ciqomi tu e Roma na lotu Vakarisito ena lawa e kotora o Constantine, ia se takalevu ga na itukuni . . . ni kalou matanisiga, vakauasivi vei ira na sotia. Na solevu e tukuni tiko e ke a vakayacori kece ena 25 Tiseba, qai vu mai kina na ivalavala sa takalevu tu nikua. Mani nanuma kina na lotu vakaRoma me vakayacori tale ga ena siga oya e dua na soqo ni lotu Vakarisito, oya me sosomitaki na solevutaki ni kalou matanisiga, ina solevu ni nona sucu o Jisu Karisito, na Matanisiga ni Lewadodonu.”
Ia vakacava na vunikau ni Kirisimasi e sa mai ivalavala tu ni lotu Katolika?
E kaya na niusipepa ni Katolika, ni levu na kau drokadroka ena gauna makawa me vaka na “kau e vakavotona na drauna, kei na taba ni nokonoko se paini, e dau kilai tu ni mana se tu kina na kaukaua ena tarova na tauvimate.” E tomana: “Ena Kirisimasiivi, 24 Tiseba, erau dau vakananumi kina o Atama kei Ivi ena italanoa kilai levu me baleta na Vunikau ni vuravura Parataisi . . . Na vunikau oqo e dodonu me vuniapolo, ia ni veicalati kei na vula i batabata e mani vakaduri kina e dua na vunipaini ena buturara qai vakaliligi e tabana e so na vuaniapolo me vakatayaloyalotaki kina nona lako mai na iVakabula, e buli tale ga e so na bisikete mamare kei na bisikete caquru e duidui na kedra ibulibuli me vakatakarakarataka na Ukarisitia ni nona tiko o Jisu, vaka kina na kakana kamikamica kei na nodra iloloma na gone.” Cava e yaco me tekivu mai na gauna oya?
E kaya na niusipepa na L’Osservatore Romano, ena ika16 ni senitiuri sa tekivu vakayagataki na vunikau ni Kirisimasi mai Jamani: “Na iotioti ni vanua me ciqoma na kena vakayagataki o Itali, baleta e tukuni ni vunikau ni Kirisimasi era dau vakayagataka na lotu Tawase, dodonu gona me sosomitaki ena ivakatakarakara ni nona davo koto o Jisu ena valenimanumanu.” Ia, o Pope Paul VI “a tekivuna na ivalavala kilai levu oqo ena nona vakaduria [ena St. Peter’s Square, e Roma] e dua na vunikau ni Kirisimasi vakaitamera,” ena yasa ni ivakatakarakara ni nona davo koto o Jisu ena valenimanumanu.
E veiganiti beka vua e dua na iliuliu ni lotu, me okata na ivakatakarakara kei na veika e vu mai na lotu butobuto ena gauna makawa me vakarisito? Na iVolatabu e vakaroti ira na lotu Vakarisito dina ena ka mera cakava: “Sa veitokani vakaevei na yalododonu kei na tawa-yalo-dodonu? se rau sa veiwekani vakaevei na rarama kei na butobuto?”—2 Korinica 6:14-17.
[iYaloyalo ena tabana e 9]
Vunikau ni Kirisimasi (tabana i mawi) kei na ivakatakarakara ni nona davo koto o Jisu e valenimanumanu ena Vatikani
[Credit Line]
© 2003 BiblePlaces.com
[iYaloyalo ena tabana e 9]
Na kalou matanisiga
[Credit Line]
Museum Wiesbaden