Me Sauma na iVolatabu

Na Cava Mera Papitaiso Kina na Lotu vaKarisito?

Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.

1. Na cava na ibalebale ni nona papitaiso na lotu vaKarisito?

Na papitaiso e dua na sala eda kerea kina vua na Kalou meda veiwekani vinaka kei koya. E sega gona ni dodonu me papitaiso na lotu vaKarisito ni se gone dramidrami, ia me qai papitaiso ni sa rawa ni vulica na ka me baleta na Kalou me lai dua sara na tisaipeli i Jisu. (Cakacaka 8:12; 1 Pita 3:21) Eda na qai tisaipeli i Jisu ena gauna eda vulica kina da qai cakava na ka e vakarota.​—Wilika Maciu 28:19, 20.

Ena nodratou gauna na yapositolo i Jisu, era sega ni lokuyarataka e levu na nodra vulica na veika me baleta na Kalou kei Jisu. Kena ivakaraitaki, a vakatulewataka sara ga e dua na turaga me tisaipeli ena gauna e kila kina ni rawati na bula ena nona mate o Jisu. Era digia mera imuri i Jisu nikua e levu era yalomalumalumu qai vu mai lomadra nodra vakasaqara na ka dina.​—Wilika Cakacaka 8:26-31, 35-38.

2. Na cava a papitaiso kina o Jisu?

E rauta ni yabaki 30 o Jisu ena gauna a tabadromuci koya kina o Joni na Dauveipapitaisotaki ena uciwai na Joritani. Nona papitaiso o Jisu e dusia nona vakatulewataka me cakava na loma ni Kalou. (Iperiu 10:7) Qori e okati kina nona solia nona bula me isoro ni noda ivalavala ca na kawatamata. Ni bera mada ga ni mai bula e vuravura o Jisu, a lomani Tamana tiko ga qai talairawarawa vua.​—Wilika Marika 1:9-11; Joni 8:29; 17:5.

3. Na cava me papitaiso kina na lotu vaKarisito?

Eda duidui vei Jisu nida sucu ivalavala ca. Ia e rawa nida veiwekani vinaka kei na Kalou ena nona mate vakaisoro o Jisu. (Roma 5:10, 12; 12:1, 2) E rawa sara ga nida lewe ni nona vuvale. (2 Korinica 6:18) E rawa vakacava qori? Ena yalataka rawa nona bula e dua vei Jiova, e yalataka kina me cakava na lomai Jiova ena nona bula taucoko. Oti sa na qai papitaiso me vakaraitaki kina e matanalevu na yalayala a cakava ena masu.​—Wilika Maciu 16:24; 1 Pita 4:2.

4. Na cava mo cakava mo rawa ni papitaiso?

O ira na iVakadinadina i Jiova era dau veivakavulici ena iVolatabu vei ira era via toro voleka vua na Kalou. Ena dei na nomu lomana na Kalou kei na nomu vakabauti koya ni o vulica na iVolatabu, o tiko tale ga ena soqoni vaKarisito. Ena vinaka na nomu ivakarau ni rai kei na nomu itovo. Na nomu vakaitovotaka na loloma, vakabauta, kei na so tale na itovo vakalou ena vukei iko mo dina ena nomu yalayala mo qaravi Jiova me tawamudu.​—Wilika Joni 17:3; Iperiu 10:24, 25.

Me ikuri ni ivakamacala, raica na wase 18 ni ivola qo, Na Cava Sara Mada e Kaya na iVolatabu?, tabaka na iVakadinadina i Jiova.