Se Yaga Tiko Ga Nikua

“A nomuni vosa na cina ki na yavaqu, kei na rarama ki na noqu sala.”​—SAME 119:105.

E DUIDUI VAKACAVA NA IVOLATABU? Eso na ivola e raici tu me ivola vinaka, ia e sega ni yaga me dusimaka noda bula. E levu na ivoladusidusi ena gauna qo e vinakati me vakavoutaki tiko ga. Ia e tukuna na iVolatabu ni “ka kece e volai e liu e volai meda vakavulici kina.”​—Roma 15:4.

KENA IVAKARAITAKI: E sega ni idusidusi vakavuniwai na iVolatabu, ia e tiko kina eso na ivakasala yaga me baleta na lomada kei na noda bulabula vakayago. Kena ivakaraitaki, e tukuni kina ni “sa vakabulai na yalo, sa bula talega kina na yago.” (Vosa Vakaibalebale 14:30) E veivakasalataki tale ga na iVolatabu: “Ni sa tawasei koya tani na tamata, sa qara na ka e domona, a sa veivorati kei na vuku kece.” (Vosa Vakaibalebale 18:1) Ia e tukuna tale ga ni “marau vakalevu o koya e solia na ka, vakalailai o koya e taura na ka.”​—Cakacaka 20:35.

KA E LAURAI ENA VAKADIDIKE: O na bulabula ke o dau lewai iko vinaka, vakaitokani vinaka o qai dauyalovinaka. E tukuna na Journal of the American Medical Association: “O ira na tagane era dau cudru katakata e dau rawarawa sara na nodra strouk ni laurai vata kei ira era dau lewa vinaka na nodra cudru.” E laurai ena dua na vakadidike a caka tiko ena loma ni tini na yabaki mai Ositerelia, nira na rairai bula balavu na itabaqase era dau “veimaliwai kei ira na nodra itokani kei na so tale era rawa ni talaucaka kina na lomadra.” Era raica tale ga ena 2008 na dauvakadidike mai Kenada kei Merika ni na “marau vakalevu o koya e vakayagataka na nona ilavo vei ira eso tale ni laurai vata kei koya e vakayagataka duadua ga na nona ilavo.”

NA CAVA O NANUMA? O na nuitaka e dua na ivola a volai ena 2,000 na yabaki sa oti me vakasalataki iko ena ka vakavuniwai? Vakacava na iVolatabu?

[Tikina bibi ena tabana e 8]

“Au taleitaka sara na iVolatabu . . . baleta ni totoka na ivakasala vakavuniwai e volai tu kina.”​—HOWARD KELLY, M.D., DUA VEI RATOU NA TAUYAVUTAKA NA JOHNS HOPKINS UNIVERSITY SCHOOL OF MEDICINE