Na ka Dina me Baleta na Mate

KAYA mada o sarava tiko e dua na vidio me baleta e dua na tamata rogo o taleitaka vakalevu, e kena irairai ni daulagasere. O sarava ena iyaloyalo na gauna se gone lailai kina, nona vulica na lagasere, kei na nona vakatovotovo wasoma. O raica tale ga nona lagasere ena buturara ni veivakamarautaki, nona lakova na duidui vanua, kei na nona kilai levu e veiyasa i vuravura. O sarava tale ga na itaba ni gauna e rogo tu kina, qai tini na vidio qori ena nona sa takali.

Qori na italanoa dina me baleta e dua na tamata rogo sa mate. Ke vakamacalataki mada ga ena vidio e dua na daulagasere, saenitisi, dauqito se so tale na tamata rogo, e dua ga na kedra itinitini. Ena rairai rawaka, ia vakasamataka mada na levu tale ni ka ena rawata ke sega ni vakila na bula vaqase se mate.

E vakavu rarawa nida vakasamataka qori, ia ya sara ga na ka rarawataki ena yacovi keda kece. (Dauvunau 9:5) Se mani vakacava na noda sasaga, eda na qase ga da qai mate yani. Ena rawa ni tini koso tale ga na bula ena vakacalaka se tauvimate. Me vaka ga e tukuni ena iVolatabu, eda vaka na kabu ni mataka e “basika vakalailai . . . qai seavu yani.”—Jemesa 4:14.

Eso tale era nanuma ni sega ni vakainaki se tawayaga na bula, era kaya ni vinaka mera ‘kana, ra gunu, nira na mate nimataka.’ (1 Korinica 15:32) Ia eso era digia na ivakarau ni bula qori nira kila ni dua na siga era na mate, e sega tale ga na nodra inuinui ni veigauna se bera mai. Toso na gauna ni sotavi na ituvaki mosimosi, era na rairai taroga, ‘Qo ga na inaki ni bula?’ O na kunea e vei na kena isau?

Levu nikua era vakabauta na veika vakasaenisi. Era sa raica rawa na vuniwai kei na saenitisi eso na ka ena vakabalavutaka na bula. Eso tale na saenitisi era vakadikeva tiko na sala me vakabalavutaki kina. Se mani vakacava na nodra sasaga, e levu era se taroga tiko ga: Na cava eda qase kina da qai mate? E tiko na inuinui ni rawa ni muduki na keda meca o mate? Qo ga na inaki ni bula? Ena saumi na taro qori ena vica na ulutaga e tarava.