Tamata Mamarau Duadua e Vuravura
1 “Era marau o ira na vakalou vei Jiova!” (Same 144:15, NW) Na vosa oqori e tukuni ira tiko na iVakadinadina i Jiova nira tamata mamarau duadua e vuravura. E kunei na marau levu oqo ena nodra qarava na Kalou bula, dina duadua ga o Jiova. Ni “Kalou mamarau” o Jiova, era na marau tale ga o ira na sokaloutaki koya. (1 Tim. 1:11, NW) Na cava e so na ka e baleta na noda sokalou e vu ni noda marau?
2 Vu ni Marau: E kaya o Jisu ni nona marau e dua e vu mai na nona “kauaitaka na [nona] gagadre vakayalo.” (Maciu 5:3, NW) Ena vakacegui na gagadre oya nida vuli iVolatabu tiko ga qai lakova kece na soqoni vakarisito. Noda vulica na dina ni Vosa ni Kalou ena sereki keda mai na vakabauta lasu kei na nodra ivakavuvuli cala na veimatalotu. (Joni 8:32) Na iVolatabu tale ga e vakavulica vei keda na sala vinaka duadua ni bula. (Aisea 48:17) E taucoko kina na noda marautaka na veimaliwai kei ira na tacida lotu Vakarisito.—1 Ces. 2:19, 20; 1 Pita 2:17.
3 Eda kunea na lomavakacegu nida muria na ivakatagedegede savasava ni Kalou, ni oqo e taqomaki keda qai vakamarautaki Jiova. (Vkai. 27:11) E vola e dua na dauvolaitukutuku: “Dina ga ni dredre na lawa ni nodra lotu, era mamarau tu ga na iVakadinadina i Jiova. O ira na gone kei na qase [ena kedra maliwa] e dau duatani dina na nodra marau qai vakarauta tale ga.” E rawa vakacava nida vukea e so tale mera mamarau?
4 Vukea e So Tale Mera Marau: Sa roboti ira tu e vuravura na rarawa, ra qai yalolailai nira vakasamataka na nodra gauna mai muri. Ia, eda sega ni yalolailai nida kila ni dua na gauna mai muri sa na sega tale na rarawa. (Vkta. 21:3, 4) O koya gona, meda gumatua ena cakacaka vakaitalatala, da vaqarai ira na yalomalumalumu meda wasea vei ira na noda inuinui kei na noda vakabauta me baleti Jiova.—Isik. 9:4.
5 E kaya e dua na tacida yalewa e painia: “Eda lomavakacegu dina nida vukei ira na tamata mera mai kilai Jiova kei na nona Vosa.” Meda kitaka tiko mada ga na veika kece eda rawata meda uqeti ira kina e levu tale mera vuli iVolatabu. E vu ni marau levu na noda qaravi Jiova kei na noda vukea e so tale mera qaravi koya.—Caka. 20:35.