iVola Mai na iLawalawa Dauvakatulewa
Vei Kemuni na Taci Keitou Lomani:
Eda bula tu qo ena gauna namaki, e gauna rekitaki tale ga! Keitou marautaka dina na cakacaka vata kei kemuni na tacida tagane kei na tacida yalewa—me vaka ena “lomavata”—ena noda vunautaka tiko e vuravura ena kena ivakatagedegede levu sara na yaca ni Tamada vakalomalagi o Jiova.—Sefa. 3:9; Joni 14:12.
Nida qaravi Jiova ena marau, e sega ni kena ibalebale nida na galala mai na drakidrakita ni bula e veisiga. Ena yabaki ni cakacaka ni isoqosoqo sa oti, eso vei kemuni oni vakaleqai ena uneune, waluvu, cagilaba, kei na so tale na leqa tubukoso e rawa ni vakayali kina na bula. (Maciu 24:7) Levu vei kemuni oni vosota e veisiga na rarawa e vakilai ena vuku ni tauvimate kei na bula vaqase. E tarai keda kece na tubu ni “veika rarawa” e sa yaco tu nikua. (Maciu 24:8) Era bala i valeniveivesu e levu na tacida ena vica na vanua okati kina o Armenia, Eritrea, kei Sauca Korea ena vuku ni nodra vakabauta.—Maciu 24:9.
Na cava e vukei keda me donu tiko ga na noda rai, dina ni tarai keda na veika rarawa? E dua na ivakasala bibi e vakadreti keda kina na tikinivolatabu ni yabaki 2010: ‘Na loloma e vosota na ka kece. E sega vakadua ni seavu.’ (1 Kor. 13:7, 8) Io, na noda veilomani vakaveitacini kei na noda lomani Jiova e vakayaloqaqataki keda meda vosota.
Era kurabuitaka e levu era tukuna nira lotu vaKarisito na wasoma ni noda cakacaka vakavunau kei na levu ni vanua sa kovuti. De ra na sega ni duavata kei na noda vakabauta kei na ivakavuvuli, ia eso mada ga era kaya, “Na cakacaka oni cakava tiko e dodonu me keimami cakava tale ga!” Na cava e vakauqeti keda meda vunau e veigauna? Io, na noda loloma. Me vakataka na Tamada vakalomalagi, eda sega ni vinakata me rusa e dua. (2 Pita 3:9) E laurai gona na noda vinakata mera veivutuni mera bula na lewe i vuravura ena iwiliwili levu duadua ni dautukutuku a rawati ena yabaki ni cakacaka ni isoqosoqo sa oti, era le 7,508,050. Na lewe ni isoqosoqo ni lotu cava tale era cakava e levu mai vu ni lomadra na nodra vukei vakayalo eso tale?
Eda vakayaloqaqataki nida raica na kena vakayacori tiko na parofisai ena Aisea: “Sa na yaco e na gauna maimuri, ni na vakataudeitaki na ulu-ni-vanua ni vale i Jiova me sivia na veiulu-ni-vanua, ena vakaceceretaki ka me lolovira na veiulu-ni-koro; ka ra na drodro kina na veimatanitu kecega.” (Aisea 2:2-4) Era okati tale ga ena iwiliwili levu era drodro tiko ena vale i Jiova na le 294,368 era papitaiso ena yabaki ni cakacaka ni isoqosoqo sa oti. Eda kidavaki ira na tacida qo ena noda isoqosoqo. Me dusimaki keda mada ga na loloma vaKarisito meda vukei ira qori mera vorata na nona veivakatovolei na keda meca o Setani na Tevoro.—1 Pita 5:8, 9.
Era tiko ena iVakananumi ena Tusiti, 30 Maji, 2010 e le 18,706,895, qo e vakaraitaka ni se vo tu e le milioni tale mera vukei mera tomani keda ena noda sokaloutaki Jiova. Eda marau ni se sega ni vakarusa o Jiova na vuravura ca qo! Me vakauqeti keda mada ga na loloma meda vosota tiko ga.—2 Ces. 3:5.
E vakaukauataka na noda veiwekani kei na Tamada vakalomalagi o Jiova na soqo siga tolu a vakayacori e veiyasai vuravura ena yabaki sa oti, e kena usutu, “Me Dei Tiko Ga Noda Veiwekani Kei Jiova!” E dina kina na ka e tukuna na daunisame: “Sa kalougata na tamata sa nodra Kalou ko Jiova.” (Same 144:15) Se mani cava ena yaco ena veisiga ni mataka, eda nuidei nida na sega ni vakaleqai ni tiko kei keda o Jiova. (Same 23:4) Sa voleka sara me vakayagataka na Luvena o Jiova me “vaqeavutaka na cakacaka ni Tevoro.” (1 Joni 3:8) E siga namaki dina qori! Ia nida waraka me yaco mai na siga qori, se levu tu na cakacaka meda vakaogai keda kina.—1 Kor. 15:58.
Keitou “dau nanumi kemuni tu ga” ena neitou masu. (Roma 1:9) Moni “tiko ga ena loloma ni Kalou, ni oni waraka tiko na yalololoma i Jisu Karisito na noda Turaga ni oni nuitaka tiko na bula tawamudu.”—Juta 21.
Keitou loloma yani vei kemuni kece!
Tacimuni,
iLawalawa Dauvakatulewa ni iVakadinadina i Jiova