Gauna Cava ena Yaco Kina na Veivakarusai? Ka e Tukuna o Jisu

DIKEVA E RUA NA KA E TUKUNA O JISU ME BALETA NA VEIVAKARUSAI QORI:

“Mo dou yadra tiko gona, ni dou sega ni kila na kena siga se na kena aua.”​—MACIU 25:13.

“Dou vakatawa, dou yadra tiko, ni dou sega ni kila na gauna lokuci.”​—MARIKA 13:33.

E sega gona ni dua ena vuravura qo, e kila na gauna sara ga ena vakarusai kina na veika ca kece. Ia sa tiko ga nona “gauna lokuci” na Kalou me cakava kina qori, na ‘siga kei na aua’ me vakarusa kina na veika ca. (Maciu 24:36) Ia e kena ibalebale qori ni sega ni rawa ni kilai na gauna ena vakarau yaco kina na veivakarusai? Sega. O Jisu a tukuna vei ratou nona tisaipeli eso na ka ena yaco, me ivakatakilakila ni sa voleka na veivakarusai.

IVAKATAKILAKILA

Qo na ivakatakilakila ni “ivakataotioti ni veika vakavuravura,” ya ni sa vakarau vakarusai na veika ca kece. E kaya o Jisu: “Era na veivaluvaluti na veivanua kei na veimatanitu, ena vakilai na leqa ni kakana qai yaco tale ga na uneune ena levu na vanua.” (Maciu 24:3, 7) E kaya tale ga ni na yaco na “matedewa,” qai totolo sara na kena tete. (Luke 21:11) O vakadinadinataka ni sa yaco tu nikua na veika e tukuna qori o Jisu?

Era rarawa vakalevu na tamata nikua ena levu ni veivaluvaluti, leqa ni kakana, uneune, kei na veimataqali mate era veitauvi. Kena ivakaraitaki, ena 2004 e yaco e dua na uneune levu ena wasawasa na Indian Ocean qai vakavuna na ualoka, era mate kina e rauta ni le 225,000. Ni oti e dua na yabaki, era mate e rauta ni 2.6 na milioni e veiyasa i vuravura ena matedewa na COVID-19. E kaya o Jisu ni veika e yaco qori, e vakaraitaka ni sa vakarau vakarusai na veika ca kece ena vuravura qo.

“IOTIOTI NI VEISIGA”

Na iVolatabu e vakatoka na loma ni gauna ni bera na veivakarusai me “iotioti ni veisiga.” (2 Pita 3:3, 4) E kaya na 2 Timoci 3:1-5, ni na torosobu nodra itovo na tamata ena gauna qori. (Raica na kato “Ni Bera na Veivakarusai.”) Vacava o vakadinadinataka nikua na levu ni tamata era nanumi ira ga, kocokoco, voravora, era sega ni dauloloma? Qori tale ga na ivakadinadina ni sa voleka sara ni vakarusai na veika ca kece.

Ena vacava na dede ni iotioti ni veisiga? E kaya na iVolatabu ni na “lekaleka” ga. Oti na Kalou ena qai vakarusai ira “na vakarusai vuravura tiko.”​—Vakatakila 11:15-18; 12:12.

SA VOLEKA NA VURAVURA PARATAISI!

Na Kalou sa lokuca tu na siga kei na aua, me vakarusa kina na veika ca kece e yaco tu e vuravura. (Maciu 24:36) Ia qo e dua tale na itukutuku vinaka, na Kalou e “sega ni vinakata me rusa e dua.” (2 Pita 3:9) E solia tiko gona vei keda na kawatamata na gauna meda vulica na ka e vinakata, qai talairawarawa vua. Na vuna? Ni sega ni vinakata meda vakarusai, ia meda bula ena vuravura vou e vakarautaka, sa na parataisi kina na vuravura taucoko.

Na Kalou e tuvanaka na veivakavulici me caka ena vuravura taucoko. Meda vulica kina na sala meda bula tale ga ena vuravura vou e liutaka nona Matanitu. E kaya o Jisu ni itukutuku vinaka ni Matanitu ni Kalou ena vunautaki “ena veiyasa i vuravura.” (Maciu 24:14) Ena 2019, era vakayagataka na iVakadinadina i Jiova e sivia e rua na bilioni na aua, mera vunautaka, qai vakavulica na itukutuku vinaka mai na iVolatabu. E kaya o Jisu ni na vakayacori tiko na cakacaka vakavunau qori, ena vuravura taucoko ni bera na veivakarusai.

Sa na vakarau oti na veiliutaki ni tamata. Ia kila na cava, o rawa sara ga ni bula ni yaco na veivakarusai, mo qai marautaka na vuravura Parataisi e yalataka na Kalou. Na ulutaga tarava, ena vakamacalataka na sala mo bula kina ena vuravura vou.