Na Rai ni iVolatabu

Na Lasu—Ena Rawa Beka ni Vakadonui?

“NA LASU LAILAI GA ENA RAWA NI LEVEI KINA ENA SO NA GAUNA NA IVAKAMACALA BALAVU.”

E VAKARAITAKA na ivakamacala oqo na ivakarau ni nodra raica na lasu e vuqa na tamata. E yavutaki na nodra rai ni sega ni cala na lasu ke sega ni vakaleqa e dua tale. Na mataqali rai oqo e vakatokai na situation ethics, kena ibalebale e sega ni cala na ka cava ga eda cakava ena dui ituvaki ke da muria tiko na lawa ni loloma. Me vaka e vakamacalataka na dauvolaivola o Diane Komp, “kevaka e dodonu na ka e vakamuai keda qai dodonu tale ga na rai ni lomada . . . e sega sara ga ni dua na ka ke da lasu.”

Na mataqali rai oqori sa takalevu tu nikua. Na veileqa lelevu e vu mai na nodra lasu na daunipolitiki kei ira na veiliutaki tu e vuravura e yavalata na bula ni kawatamata. E vakamuai ira cala e vuqa na tamata na ituvaki leqataki vaka oqo, e vakavuna mera sa sega ni dau vosa dina. E sa ivalavala tudei tale ga ena so na vanua ni cakacaka na lasu. “Au saumi meu lasu. Au qaqa ena vuqa na veisisivi ni dauvolivolitaki kei na veiqatitaki ni icocovi vakayabaki kevaka au lasu. . . . Oqo e vaka me sa ivalavala tudei ni veituberi vei ira era vakavulici mera dauvolivolitaki,” e kudruvaka e dua na dauvolivolitaki. E levu era nanuma ni sega ni cala ke da lasu mada ga vakalalai. E dodonu beka oya? Ena vakadonui beka ke ra lasu ena so na gauna na lotu Vakarisito?

Na Rai Dokai Vakaivolatabu

E vakacala na iVolatabu na mataqali lasu kece ga. “[Na Kalou ena] vakarusai ira era sa vosa lasu,” e kaya na daunisame. (Same 5:6; raica na Vakatakila 22:15.) E vakaraitaka na iVolatabu ena Vosa Vakaibalebale 6:16-19 e vitu na ka e cata matua o Jiova. “Na yame daulasu” kei “na dautukutuku vakailasu sa dauvosataka na ka lasu” erau vakabibitaki ena vitu na ka oqori. Baleta na cava? Baleta ni cata o Jiova na ca e vu mai na lasu. Oqori e dua na vuna e vakatokai Setani kina o Jisu me daulasulasu qai dauveivakamatei tale ga. E sega ni levea rawa kina na kawatamata na bula vakaloloma kei na mate ena vuku ni nona lasulasu.​—Vakatekivu 3:4, 5; Joni 8:44; Roma 5:12.

E rawa nida kila na rai nei Jiova me baleta na lasu mai na ka a yacovi rau o Ananaiasa kei Safaira. Erau a nakita na nodrau lasutaki iratou na yapositolo ena nodrau inaki me laurai na levu ni nodrau lomasavu. Erau nakita, erau sa vakasamataka tale ga vakailiu na ka erau cakava. E kaya kina na yapositolo o Pita: “Ko sega ni lasutaki ira tiko na tamata, ko sa lasutaka sara ga na Kalou!” A qai vakamatei rau na Kalou ena vuku ni ka erau cakava oqo.​—Cakacaka 5:1-10, VV.

E qai vakasalataki ira kina na lotu Vakarisito ena vica tale na yabaki mai muri na yapositolo o Paula: “Kakua na dauveilasutaki.” (Kolosa 3:9, VV) E bibi dina na veivakasalataki oqo ena ivavakoso lotu Vakarisito. E kaya o Jisu ni na vakatakilakilataki ira na nona tisaipeli dina kevaka era dau veilomani. (Joni 13:34, 35) Ena rawa wale ga ni tubu me bulabula na loloma sega ni dau veivakaisini vaka oqo ke tiko na dina kei na veivakabauti. Ena via dredre meda lomana e dua kevaka eda kila ni na sega ni dau dina vei keda.

Dina ni cala na mataqali lasu kece ga, ia e so na lasu era bibi cake mai na so tale. Kena ivakaraitaki, e rawa ni lasu e dua ke sa luvuci ena madua se e rairai rere beka. E dua tale ena rawa ni nona ivalavala tudei na lasu ena nona via veivakacacani se veivakaleqai. Na lasu nakiti e vu mai na lomaca ena vakaleqai ira na tani, ena rawa ni vakasivoi kina mai na ivavakoso e dua ke sega ni veivutunitaka. Me vaka ni sega ni vu mai na lomaca na lasu kece, e dodonu meda dau qaqarauni meda kua ni beitaka vakatawadodonu e dua kevaka eda sega ni kila vinaka na dina ni ka e beitaki kina. Me vakasamataki mada vakavinaka se cava sara mada e tiko e lomana kei na ituvaki dredre cava e vakavuna nona lasu.​—Jemesa 2:13.

“Vuku me Vaka na Gata”

Ia, e sega ni ibalebale ni noda dau dina meda vakaraitaka na veika kece e yaco kevaka e tarogi vei keda. “Dou kakua ni solia na ka tabu vei ira na koli, se biuta na nomudou mata-ni-civa e matadra na vuaka, de ra . . . vuki mai ka basuraki kemudou,” e veivakasalataki kina o Jisu, ena Maciu 7:6. Kena ivakaraitaki, ni sega ni tu vei ira na tamata dau naki ca na dodonu mera kila na dina ni veika e yaco. Era kila tu na lotu Vakarisito nira bula tiko ena dua na vuravura ca. E vakasalataki ira kina na nona tisaipeli o Jisu mera “vuku me vaka na gata” ia mera “yalovinaka [tiko ga] me vaka na ruve.” (Maciu 10:16; Joni 15:19) A sega ni dau vakaraitaka kece na ka e yaco o Jisu, vakabibi ke vakayacora vaka kina ena rawa ni vakaleqai koya se o iratou na nona tisaipeli. Ia, e sega ga ni dau vosa lasu ena gauna mada ga vaka oqori. E dau galu ga se vagolea tani na veivosaki ina dua tale na ulutaga.​—Maciu 15:1-6; 21:23-​27; Joni 7:3-​10.

O ira tale ga na tagane kei na yalewa yalodina era cavuti ena iVolatabu, me vakataki Eparama, Aisake, Reapi, kei Tevita, era yalomatua era dau qaqarauni tale ga. (Vakatekivu 20:11-​13; 26:9; Josua 2:1-6; 1 Samuela 21:10-​14) E wiliki ira na tagane kei na yalewa vaka oqori na iVolatabu mera tamata dau sokalou ena yalodina ni yavutaki na nodra bula ena talairawarawa. E veiganiti gona kina mera vakatotomuri.​—Roma 15:4; Iperiu 11:8-​10, 20, 31, 32-​39.

Rairai ena rawa ni levei na ituvaki dredre e so kevaka eda lasu. Ia ena vinaka vei ira na lotu Vakarisito nikua mera vakatotomuria na weniyava i Jisu ena nodra muria na veidusimaki ni nodra lewaeloma vakavulici vakaivolatabu ena gauna era dau sotava kina na veituvaki dredre.​—Iperiu 5:14.

E uqeti keda na iVolatabu meda dau dina, meda cakacaka tale ga vakadodonu. E cala na lasu, ia e dodonu meda muria na ivakasala vakaivolatabu: “Me vosa dina na tamata yadua vua na kai nona.” (Efeso 4:25) Nida cakava vaka kina, ena vinaka tiko ga na noda lewaeloma, eda na vakabulabulataka na veisaututaki kei na veilomani ena loma ni ivavakoso, eda na dau vakalagilagia tiko ga kina “na Kalou daudina.”​—Same 31:5; Iperiu 13:18.

[iYaloyalo ena tabana e 30]

Erau a vakayalia na nodrau bula o Ananaiasa kei Safaira ena vuku ni lasu