E se Bibi Tiko ga na ka Dina

Vakacava e dredre tiko ga mo vakaduiduitaka na ka dina kei na ka lasu? E levu era rairai yavutaka na ka era vakabauta ena ka ga era nanuma se ivakarau ni lomadra. Era sega ni yavutaka ena ka dina. E levu e veiyasa i vuravura nikua era vakabauta ni sega na ka dina.

E sega ni ka vou qori. Rauta na 2,000 na yabaki sa oti, a tarogi Jisu na Kovana ni Roma o Ponitio Pailato: “Na cava na ka dina?” (Joni 18:38) A sega ni waraka me sauma o Jisu, ia e bibi na nona taro. Na iVolatabu ena sauma vinaka na nomu vakatataro, ena vukei iko tale ga mo kila na ka dina kei na itukutuku lasu ena vuravura qo.

E tiko na ka dina?

Io. E vakayagataki ena iVolatabu na vosa “dina” me dusia e dua na ka e yavutaki ena dina, e donu tale ga. E vakavulica ni Kalou o Jiovaa e iVurevure ni ka dina qai vakatokai “me Kalou daudina.” (Same 31:5) E tu ena iVolatabu na ka dina mai vua na Kalou, qai vakatauvatana qori ina rarama e dusimaki keda ena vuravura veilecayaki qo.—Same 43:3; Joni 17:17.

O na kunea vakacava na ka dina?

E sega ni vinakata na Kalou mo ciqoma tu vakamataboko na ka dina ena iVolatabu. E vinakata ga mo dikeva vinaka ni o vakayagataka nomu vakasama qai kua ni nuitaka na lomamu. (Roma 12:1) E vinakata mo kilai koya qai lomani koya ena nomu “vakasama taucoko.” E uqeti iko tale ga mo vakadeitaka ni dina na ka o vulica ena iVolatabu.—Maciu 22:37, 38; Cakacaka 17:11.

E vu mai vei na lasu?

E kaya na iVolatabu ni meca ni Kalou o Setani na Tevoro a tekivuna na lasu, qai vakatokai me “tama ni lasu.” (Joni 8:44) E lasutaka na veika me baleta na Kalou vei rau na imatai ni veiwatini. (Vakatekivu 3:1-6, 13, 17-19; 5:5) Tekivu mai na gauna qori, e se tukuna tiko ga na ka lasu me baleta na Kalou qai vunitaka na ka dina.—Vakatakila 12:9.

Cava e rui takalevu kina nikua na lasu?

E vakatoka na iVolatabu na gauna qo me “iotioti ni veisiga.” E dua gona na iwiliwili levu sa vakamuai ira tiko o Setani, e vakacalai ira tale ga. E levu era daulasu mera veivakacalai se mera vakayagataki ira kina eso tale. (2 Timoci 3:1, 13) E levu tale ga na lotu nikua era tukuna na ka lasu. Me vaka e parofisaitaka na iVolatabu, e levu era sa “digia ga na nodra qasenivuli me vakavulici ira ena ka e via rogoca na daligadra,” ra qai “gole tani mera kua ni rogoca na ka dina.”—2 Timoci 4:3, 4.

Vuna e bibi kina na ka dina

E bibi na ka dina me rawa ni o nuitaki vei ira eso tale. Ke sega, ena rawa ni vakaleqa na nomu veitokani kei na nomu veimaliwai ena dua na vanua. E kaya na iVolatabu ni vinakata na Kalou me yavutaki ena dina na noda sokalou. E kaya: “O ira na sokalou vua [na Kalou] e dodonu mera sokalou vakayalo, mera dina tale ga ena nodra sokalou.” (Joni 4:24) Mo kila na dina e tu ena iVolatabu me baleta na ivakavuvuli lasu vakalotu kei na sala mo gole tani mai kina, wilika na ulutaga “Lasu e Nanumi Kina ni Sega ni Dauloloma na Kalou.”

Cava e vinakata kina na Kalou mo kila na ka dina?

Ni vinakata mo bula tawamudu, mo kila tale ga na ka dina me baleti koya. (1 Timoci 2:4) O na veitokani voleka kei koya ke o vulica qai muria na nona ivakatagedegede ni ka e donu kei na ka e cala. (Same 15:1, 2) Na Kalou e talai Jisu mai vuravura me rawa nira kila e levu na ka dina. E vinakata gona mo rogoca na ivakavuvuli i Jisu.—Maciu 17:5; Joni 18:37.

E rawa ni vakaotia vakadua na Kalou na lasu?

Io. E cata na Kalou ni o lasu mo vakayagataki ira kina eso tale. E yalataka ni na vakarusai ira na daulasulasu. (Same 5:6) Ena qai yaco kina na ka e yalataka: “Na tebenigusu dau dina ena vakataudeitaki me tawamudu.”—Vosa Vakaibalebale 12:19.