Ra Taroga na iTabagone . . .

Cava Meu Cakava Meu Taleitaka Cake Kina na Wili iVolatabu?

“Ena so na gauna e dau dredre sara ga meu taura rawa na ka e kaya na iVolatabu, e dau veivakayalolailaitaki dina.”​—Annalieza, yabaki 17.

“E vakavucesa na wilika na iVolatabu.”​—Kimberly, yabaki 22.

E LEVU na tamata era sega ni dau taleitaka na wilivola. Ia na ivola levu me vaka na iVolatabu, e rawa nira soro mada ga kina o ira na dau makutu na wiliwili. “Vei au, na ivola vavaku na iVolatabu e tu kina na vosa e dredre me kilai,” a kaya o Tammy, yabaki 17. “E vinakati vakalevu na yalomakutu kei na vosota ena wiliki ni iVolatabu.”

Kuria oya, ni tu tale ga na veika me caka e rawa ni taura vakalevu na gauna kei na nomu igu, me vaka beka na lesoni mai koronivuli, na cakacaka e vale, kei na veika ni veivakamarautaki. Oqo e rawa sara ga ni vakadredretaka na wili iVolatabu kei na nomu marautaka tale ga. O Alicia e dua na iVakadinadina i Jiova, dau taura na gauna me vakavakarau kei na nona tiko ena soqoni, vaka tale ga kina nona dau wasea yani vei ira na tani na nona vakabauta. E kaya: “E dau vakadredretaka sara ga na wiliki ni iVolatabu na levu ni veika e tu me caka.”

Ia erau walia rawa na leqa oqo o Alicia, Tammy, kei na vuqa tale na itabagone. Oqo era sa marautaka tiko nodra wilika wasoma na iVolatabu. O na rawata tale ga! Dikeva e tolu na sala e rawa ni o cakava mo taleitaka kina na wili iVolatabu.

Me Tiko na Gauna Mo Wili iVolatabu Kina

E kaya o Kelly, yabaki 18: “Au vakabauta ni levu na itabagone e vakavucesa vei ira na wilika na iVolatabu baleta ga nira sega ni sasagataka.” Me vaka ga na qito o dau taleitaka mo qitora wasoma, ena vaka tale ga oya na nomu taleitaka na iVolatabu kevaka o wilika wasoma.

Ia vakacava ke lailai na nomu gauna ni o sa rui osooso? E veivakasalataki kina na yapositolo o Paula: “Mo dou qai raici kemudou vinaka, mo dou i valavala vakayalomatua, mo dou kakua ni vakataki ira na lialia, mo dou vakataki ira ga na vuku, mo dou volia me nomudou na gauna, ni sa ca na veisiga oqo.” (Efeso 5:15, 16) E rawa ni o ‘volia na gauna’ ena nomu vakuai iko mai na ka e sega soti ni yaga me vaka na sara retioyaloyalo. Na vosa “gauna” a vakayagataka o Paula, e rawa ni vakaibalebaletaka na gauna e lokuci kina e dua na ka. Na gauna cava o sa lokuca mo wilika kina na iVolatabu?

E so era dau wili iVolatabu e veimataka, nira dikeva oti na tikinivolatabu kei na ivakamacala ena siga oya​—Dikevi na iVolatabu e Veisiga.a E so tale era dau wiliwili ni bera nira moce. Digia na gauna e ganiti iko vinaka qai tovolea sara mo muria. A kaya o Alicia: “Na ki e dei tu ga kina na noqu ituvatuva oya ni rawarawa ga na noqu bula.”

E so na itabagone lotu Vakarisito era tuvanaka e 10 ina 15 na miniti e veisiga mera wili iVolatabu kina. Na nodra cakava oqo, era sa wilika tasevu kina na iVolatabu ena loma ga ni dua se rua na yabaki! Kevaka mada ga o raica ni o na sega ni rawata oya, tovolea me nomu isausau mo wilika vakatikina ga na iVolatabu e veisiga. Nomu tovolea mo muria tiko ga na ituvatuva dei ni wili iVolatabu, ena tubu tiko ga nomu lomana na Vosa ni Kalou.​—Same 119:97; 1 Pita 2:2.

Masuta na Vuku

O ira na dau wilika wasoma na iVolatabu, era raica ni dredre mera kila e so na tikina mai na Vosa ni Kalou. O Jiova na Kalou e vakavuna na iVolatabu, e vinakata mo kila na nona Vosa. Na ivola na Cakacaka e tukuni koya na ivakalesilesi ni Iciopea, ni a sega ni taura rawa na parofisai ena Aisea wase e 53. E via kere veivuke na kai Iciopea, mani talai Filipi na yalo tabu i Jiova me lai vakamacalataka vua na parofisai oya.​—Cakacaka 8:26-​39.

Ena yaga na wili iVolatabu kevaka e tekivutaki ena masu, sega ni wiliwili wale tu ga. E so e nodra ivakarau ni bera nira wilika nodra iVolatabu, era dau kerea vei Jiova ena masu na vuku kei na kilaka mera vakasamataka kina na ka era vulica mai na nodra wiliwili. (2 Timoci 2:7; Jemesa 1:5) Na yalo tabu i Jiova e rawa ni vukei iko mo dau vakananuma na veitikina o wilika mai na iVolatabu mo rawa ni sauma kina e so na taro, se mo vosota tale ga kina na veika dredre.

A vakananuma lesu e dua na cauravou gone lotu Vakarisito: “E biuti keitou o tamaqu niu se qai yabaki 12. Ena dua na bogi au cikevi Jiova ena masu me lesu tale mai o tamaqu. Au taura cake mai noqu iVolatabu ka wilika na Same 10:14: ‘[I Jiova,] sa laivi koya vei kemuni na malumalumu; ko ni sa dauvukei koya na luveniyali.’ Au vakasamataka vakalekaleka. Au vakila sara ga ni vosa tiko vei au o Jiova, me tukuna tiko ni o koya e noqu ivukevuke qai Tamaqu tale ga. Na tama vinaka cava tale e tu me vakataki koya?”

E rawa beka ni o vakamatauna ni bera ni o wili iVolatabu mo masu mada i liu? A vakatura o Adrian: “Masu ni bera ni o wiliwili, ni oti tale ga, ena vaka ga ni drau veivosaki tiko kei Jiova.” Na masu e vu mai lomamu ena vukea mo dei tiko ga ena nomu ituvatuva ni wili iVolatabu, ena vakaukauataka tale ga na nomudrau veiwekani kei na Kalou.​—Jemesa 4:8.

Raitayaloyalotaka

A cavuta na veivosa e volai mai cake o Kimberly, ni vakavucesa na wilika na iVolatabu. E dina, na iVolatabu e ivola makawa​—e volai ni se bera nira buli na kompiuta, na retioyaloyalo se na waqavuka​—o ira tale ga na tamata ena gauna vakaivolatabu era sa mate ena vica na udolu na yabaki sa oti. Ia na yapositolo o Paula e vola: “Sa bula na vosa ni Kalou, ka kaukauwa.” (Iperiu 4:12) E rawa vakacava me solia na kaukaua na ivola makawa oqo?

Ena gauna i Esera na vunivola, ra udolu na tagane kei na yalewa, kei ira “kece ga era sa yalomatua me ra kila rawa” era vakasoqoni mai Jerusalemi mera mai rogoca na wiliki ni Lawa i Mosese. Ena gauna mada ga oya, e sa yabaki 1,000 tu na Lawa! Ia o Esera kei ira na nona ivukevuke “ra sa wilika vakamalua nai vola ni vunau ni Kalou, ka vakatakila na kenai balebale, ka vakamacalataka na ka sa wili.” Na cava e yaco nira sa vakamacalataka na iVolatabu, qai wiliki vakabulabula? “A ra sa lako yani ko ira kecega na tamata me ra kana, ka gunu, ka me ra vakauta nai votavota, ka me ra marau vakalevu, ni ra sa kila na vosa sa tukuni vei ira.”​—Niemaia 8:1-​12.

E rawa vakacava me ‘vakaibalebale’ nomu wili iVolatabu? E ka ni bolebole vei Cathy na wiliwili, ia e vukei koya na nona dau wiliwili vakadomoilevu. O Nicki e dau tovolea me raitayaloyalotaka na ka e caka. E kaya: “Au raica se cava au na cakava niu tu ena ituvaki oya. Au dau taleitaka na kedrau italanoa o Ruci kei Neomai. Au dau wilika wasoma. Niu toki ina siti vou, e dau vakacegui au na italanoa oqo, baleta niu vakila sara ga na ka e sotava o Ruci ena nona lako ina koro e vulagi kina. E vakararavi dina vei Jiova o koya, oqo e vukei au tale ga meu cakava vaka kina.”​—Ruci, wase e 1-4.

Me solia na ‘kaukaua’ na iVolatabu ena vinakati me vakasamataki vakatitobu. Ena veigauna kece o wiliwili kina, vakananuma lesu tale na ka o wilika qai vakasamataka na sala o na rawa ni vakayagataka kina. E rawa ni o dikeva lesu na ivola ivukevuke ni kena vulici na iVolatabu e tabaka na iVakadinadina i Jiova me rawa ni vakatitobutaka na nomu wiliwili.b

Dei Tiko Ga!

Mo dei tiko ga ena dua na ituvatuva ni wili iVolatabu e sega ni ka rawarawa. Na ituvatuva vinaka mada ga ni wili iVolatabu ena vinakati me veiveisau ena so na gauna. E rawa vakacava me nomu inaki mo gumatua tiko ga ni wilika e veisiga na iVolatabu?

E rawa nira vukei iko nomu itokani kei na nomu matavuvale. A kaya o Ambery, yabaki 15: “Keirau rumu vata kei na taciqu. Niu dau wawale qai via moce ena so na bogi, e dau uqeti au o taciqu meu wilika na noqu iVolatabu. Au sega vakadua ni guilecava!” Kevaka e uqeti iko e so na tikina mai na iVolatabu, veivosakitaka kei ira tale na so. Oqo e rawa ni o taleitaka kina vakalevu na Vosa ni Kalou, de dua ena rawa ni vukei ira tale ga kina na tani mera wilika nodra iVolatabu. (Roma 1:11, 12) Kevaka mada ga o sega ni wilika rawa nomu iVolatabu ena dua se vica na siga, kua ni soro! Tekivu mai na vanua ga o sa yala toka kina, qai saga tiko ga vagumatua mo muria na ituvatuva ni nomu wiliwili.

Kua ni guilecava na veika vinaka o na rawata mai na nomu wilika e veisiga na iVolatabu. Rogoci Jiova ena nona Vosa, ena veivolekati kina nomudrau veiwekani. O na mai kila tale ga na nona vakanananu kei na lomana. (Vosa Vakaibalebale 2:1-5) E itataqomaki na ka dina e lako mai vua na Tamada vakalomalagi. E taroga na daunisame: “Ena vakasavasavataka vakaevei na nonai valavala na cauravou? Ni sa qarauna ga me vaka na nomuni vosa.” (Same 119:9) Mo tekivuna qai dei tiko ga ena ituvatuva ni wili iVolatabu. O na raica ni o na taleitaka cake mai na nomu dau nanuma cala tu e liu!

[iVakamacala e ra]

[iYaloyalo ena tabana e 18]

Masu kei na vakekeli ena vakabulabulataka nomu wili iVolatabu, qai vukei iko tale ga mo raica na ibalebale ni veitikinivolatabu

[iYaloyalo ena tabana e 19]

Raitayaloyalotaka na ka e caka, ena rawa ni vakaibalebale kina na ka o wilika