LESONI 11

Me Yaga Vakalevu Vei Iko na iVolatabu

iLavelave e Tabaki

Ni o vakarau qarava e dua na itavi levu, vakacava o nanuma ni sa rui dredre? Mo rawa ni qarava rawa, de dua o na cakava vakalalai. E va tale ga qori nida wilika na iVolatabu. De dua o na taroga, ‘Au na tekivu vakacava?’ Ena lesoni qo, eda na dikeva eso na ka o rawa ni cakava mo marautaka kina na wili iVolatabu kei na nomu vulica.

1. Na cava meda wilika wasoma kina na iVolatabu?

O ira na dau wilika wasoma na iVolatabu se na “lawa i Jiova,” era na mamarau qai vuavuaivinaka na ka era cakava. (Wilika Same 1:1-3.) Tovolea mada ga mo wilika me vica na miniti e veisiga. Na levu ga ni nomu kila na Vosa ni Kalou, o na taleitaka vakalevu na wili iVolatabu.

2. Cava mo cakava me yaga nomu wili iVolatabu?

Me yaga na wili iVolatabu, e bibi meda cegu mada qai vakasamataka na ka eda wilika. Dodonu meda wilika da qai “vakasamataka vakatitobu.” (Josua 1:8, ivakamacala e ra) Ni o wiliwili tiko, qo na ka mo taroga: ‘Na cava au vulica eke me baleta na Kalou o Jiova? Au na muria vakacava? Au na vakayagataka vakacava na tikinivolatabu qo meu vukei ira kina eso tale?’

3. Au na tikica vakacava na gauna meu wilika kina na iVolatabu?

Vakacava e dau sega na gauna mo wili iVolatabu kina? Levu vei keda e dau va qori. Tovolea mo “vakayagataka vinaka na nomu gauna.” (Efeso 5:16) Qori nomu lokuca sara ga e dua na gauna e veisiga mo wilika kina na iVolatabu. Eso era lokuca mera wili iVolatabu ena mataka lailai. Eso tale era wiliwili ena dua tale na gauna, de dua ena gauna ni vakasigalevu. Eso tale era wiliwili ena bogi ni bera nira lai moce. Na gauna cava e vinaka vei iko?

VAKEKELI

Vulica na sala mo taleitaka kina vakalevu na wili iVolatabu, kei na sala mo vakavakarau vinaka kina me rawa ni yaga nomu vuli iVolatabu.

iYaloyalo: E vakatovolea tiko e dua na kakana e dua na cauravou. 1.E vaqitora na kena. 2. Ni toso na gauna, e kania na kena. 3. Ni sa lai qase e marautaka na kena. — Me vaka ga noda vulica meda taleitaka na duidui kakana, e rawa tale ga nida vulica meda taleitaka na wili iVolatabu

4. Vulica mo taleitaka na wili iVolatabu

Ena rairai sega ni rawarawa nida tekivu wili iVolatabu. Ia rawa nida “saga meda vinakata” se taleitaka, me vaka ga nona saga e dua me taleitaka na kakana se qai kania vakadua. Wilika 1 Pita 2:2, qai veivosakitaka na taro qo:

Cava o nanuma, ke o wilika na iVolatabu e veisiga, o sa na rawa ni taleitaka se rai vakanamata kina?

Sarava na VIDIO na sala era taleitaka kina eso na wili iVolatabu. Oti qai veivosakitaka na taro tarava.

VIDIO: Ra Vulica na iTabagone Mera Taleitaka na Vosa ni Kalou (5:33)

Ena vidio, na dredre cava era sotava na itabagone?
Na cava e vukei ira mera dei ena nodra wili iVolatabu?
Cava era cakava mera taleitaka kina vakalevu nodra wili iVolatabu?

Vakatutu:

Digia na iVolatabu e nuitaki qai kilai rawarawa. Vakayagataka na Vakadewa ni Vuravura Vou ke sa tiko ena nomu vosa.
Wilika na ivola ena iVolatabu o dau taleitaka vakalevu. O rawa ni raica na kato “Tekivu na Wili iVolatabu.”
Makataka na ka o wilika. Vakayagataka na kato “Makataka Nomu Wili iVolatabu” ena ivola qo.
Vakayagataka na JW Library^®. O rawa ni wilika se rogoca na iVolatabu ni o vakayagataka na talevoni, tablet se so tale na ka.
Vakayagataka na ikuri ena Vakadewa ni Vuravura Vou. E tiko kina na mape, iyaloyalo, kei na ivakamacala ni vosa, ena vukei iko mo taleitaka vakalevu na wiliwili.

5. Vakavakarau ena vuli iVolatabu

Wilika Same 119:34, qai veivosakitaka na taro qo:

Cava e bibi kina mo masu ni bera ni o wili iVolatabu se ni o vakavakarau ena vuli iVolatabu?

Cava mo cakava me yaga kina vakalevu na nomu vuli? Ni o vakarautaka tiko e dua na lesoni, tovolea mada qo:

Wilika na imatai ni vica na parakaravu.
Wilika na tikinivolatabu qai saga mo sema ina parakaravu.
Makataka na vosa se matavosa e saumi kina na taro; qo ena vukei iko mo drau veitalanoataka kei na nomu qasenivuli.

iYaloyalo: E vakavakarau tiko e dua na marama ena nona vuli iVolatabu. A. E wilika na imatai ni tabana ni lesoni. B. E wilika na tikinivolatabu lavetaki. C. E makataka na vosa bibi kei na matavosa.

O bau kila?

Era vakayagataka voli mai na iVakadinadina i Jiova e vica na vakadewa ni iVolatabu. Ia keimami taleitaka vakalevu na Vakadewa ni Vuravura Vou ni donu, matata qai vakayagataka na yaca ni Kalou.—Raica na ulutaga ena jw.org “E Tiko Nomuni iVolatabu na iVakadinadina i Jiova?”

KA ERA KAYA ESO: “E dredre me vulici na iVolatabu. Au osooso, au vucesa na vuli.”