Galili​—Na Cava e Dau Vakavuna?

ERAU duidui o koya e galili kei koya e vinakata me tu taudua ga. O koya e galili e sega ni vinakata me tu taudua, ia e rairai vagalilitaki koya na kena ituvaki se dau vakanananu ni tiko duadua nira yawa na wekana se na nona itokani. Ia o koya e vinakata me tu taudua ga e sa nona lewa sara ga me yawaki ira na kena vo.

E vinaka ena so gauna meda tiko taudua ga. Me vakataki Jisu Karisito, e levu era via tiko taudua ga ena gauna era masu kina se ra vakananuma eso na ka. (Maciu 14:13; Luke 4:42; 5:16; 6:12) Ena yasana adua, na galili e ka mosimosi. Na cava e rawa ni vakavuna na galili?

● Tu Taudua ena Siti Osooso

E udolu se milioni sara vakacaca ena siti lelevu e veivolekati na nodra itikotiko. Ia e kurabuitaki ni nodra veiosoosoti va qori na lewenivanua e vakavuna vakalevu na galili. Na osooso ni bula ena siti e rawa ni vakadredretaka na nodra veikilai vinaka e levu era tiko veitikivi. Qori na vuna era dau vaka tale kina na vulagi o ira na tu ena siti. Na nodra sega ni nuitaki ira era sega ni kila, kei na nodra sega ni vinakata me kilai na kedra itukutuku e rairai vakavuna vakalevu na nodra galili.

● Vakalolomataki na Tamata Cakacaka

Na sala e cicivaki kina na bisinisi lelevu se na vanua ni buliyaya e vakavuna na nodra galili e levu na tamata cakacaka ra qai nanuma ni sega ni ganiti ira mera cakacaka. Era lomaocaoca kina vakasivia ra nuiqawaqawa tale ga.

Na wasoma tale ga ni nodra veitosoyaki na tamata cakacaka ena kabani lelevu e vakavuna na nodra lomaleqa, ra via tiko taudua ga, ra qai dau galili. E tukuni ena International Herald Tribune ni tubu na kedra iwiliwili na tamata cakacaka era vakamatei ira ena so na kabani e Varanise, nira nanuma e levu nira “vakacakacakataki vakasivia ena vuku ni veiveisau ni bula vakailavo.”

● iYaya Vakalivaliva ni Vakauitukutuku

E kaya o Parofesa Tetsuro Saito mai Japani: “Sa na dredre meda sota meda veivosaki ni sa vakayagataki ga vakalevu nikua na iyaya vakalivaliva ni vakauitukutuku me vaka na mobail kei na so tale.” E Ositerelia, e tukuni ena Sunday Telegraph: “Na iyaya vovou . . . e sa vakavuna tiko na nodra sega ni via veimaliwai na tamata. E levu era . . . e-mail se vakauitukutuku ena mobail, mai na nodra sota mera veivosaki.”

A kudruvaka o Rachel e dua na goneyalewa yabaki 21 mai Varanise me baleta na vu ni nona galili: “Era sega ni saga e levu mera raici iko, nira nanuma sa rauta ga mera text, e-mail, se veitalanoa ena internet. Ia qori e vagalilitaki au vakalevu.”

● Veisau ni iTikotiko

Na leqa vakailavo e dau vakavuna na nodra veitokiyaki e levu, era toki mera kua ni vakacegui kina mai na nodra cakacaka se ra toki mera lai qara cakacaka. Ni veisau na nodra itikotiko, era sa yawaki ira era dau tiko veitikivi e liu, o ira na nodra itokani kei ira sara mada ga na nodra lewenivuvale, ra dau vakanananu tale ga ina nodra koronivuli makawa. O ira na toki qori era vaka sara ga na kau e tala me lai tei ena dua tale na vanua, ia e biu tu yani na wakana.

E sega ni guilecava o Francis na nona biubiu e Ghana me gole i Varanise. E kaya: “Au galili vakalevu niu sega ni kila na vosa ni vanua oya, e sega na noqu itokani, qai batabata na draki.”

E tukuna o Behjat me baleta na nona toki i Igiladi: “E dredre meu vakamatauni au ena nodra ivakarau vakavanua. Au kilai ira eso ekea, ia e sega na noqu itokani voleka se wekaqu me keirau dau veitalanoa, meu talaucaka vua na lomaqu.”

● Lolosi ni Takali e Dua

E dau galili vakalevu e dua e takali na kena isa. Ena vakadinadinataka vakalevu qori e dua a qaravi watina voli mai vakabalavu ena vuku ni tauvimate. E rawa ni nanuma sara ga kina ni sa sega na kena yaga.

E kaya o Fernande e dua na yada mai Parisi: “E dredre duadua vei au na noqu sa sega ni rawa ni talaucaka na lomaqu vua na noqu itokani vinaka duadua​—o watiqu.” O Anny e kaya ni dau nanumi watina “ni vinakati me vakatulewa ena so na ka bibi me vaka na tauvimate se so tale na ka.”

● Veisere, Veibiu, Bula Vakadawai

Na veisere kei na veibiu e dau vakavuna na galili kei na datuvu. Era vakaloloma vakalevu duadua na gone, ni sa levu cake sara na ka era sotava ni vakatauvatani kei na ka era nanuma tu e liu na kenadau. Era vakabauta eso na kenadau ni o ira na gone era veisere na nodra itubutubu era dau galili nira sa uabula.

Era dau galili tale ga na dawai era sega ni kunea rawa tiko e dua e veiganiti mera vakawatitaka. Sa qai vagalilitaki ira ga vakalevu eso na vosa e dau tau vakasabalia, me vaka: “O na sega ni marau vakalevu cake ke o vakawati?”

Era galili tale ga na itubutubu le dua. Na itavi vakaitubutubu e vakavu marau, ia e sotavi tale ga kina na leqa. Na leqa qori e sa na walia duadua sara ga o itubutubu le dua ni sega na kena isa me rau veitalanoataka.

● Bula Vaqase, Lecaika ni Bula Vakaitabagone

Ke ra qaravi ira vinaka mada ga na nodra lewenivuvale, era se dau galili ga na itabaqase. Era na rairai sikovi ira na itabaqase ena so na gauna na wekadra se na nodra itokani, ia vakacava ena gauna tale eso​—e rairai sega ni sikovi ira kina e dua?

Era sega ni dau galili ga na itabaqase, o ira tale ga na itabagone era dau galili. E levu sa nodra bula sara tu ga na ka ni veivakamarautaki era cakava duadua​—sara tivi, qito ena vidio, kei na vica vata na aua era dabe duadua toka kina ena mata ni kompiuta.

E tete tiko ga na galili, ia vakacava e tiko na kena iwali? Ena valuta vakacava na galili e dua?

[Tikina bibi ena tabana e 14]

“Au galili vakalevu niu sega ni kila na vosa ni vanua oya, e sega na noqu itokani, qai batabata na draki”