O na Kunea Vakacava na Kena iWali?
KE O galili, de vinaka mo taroga: ‘Au rawa ni cakava eso na ka meu vakavinakataka kina na kequ ituvaki? E vinakati meu cakava eso na veiveisau? Ke vaka kina, na cava meu veisautaka?’ Na vica na taro e toka e ra ena yaga ena nomu lialiaci, o qai qara na iwali ni galili e veivakacegui.
Meu Veisautaka na Noqu Rai?
E sega ni vakuai e dua ena galili. Na ivakarau ni yalo qori ena qai veivakaleqai ga ke sega ni valuti. Ia ke yaco qori, de dua e sa sikinala oya ni sa rairai veisau na nomu rai me baleta na bula. Ena rawa ni kilai qori ena ka o cakava ni o maliwai ira tiko na so. De dua era sega ni nakita, ia eso e vaka mera viribaiti ira ena wayavotovotoa nira tarova na nodra sasaga eso tale mera nodra itokani. E vinakati ga vei ira qori ena so na gauna mera veisautaka na nodra rai.
Raica mada na ka e tukuna o Sabine me baleta na nona toki i Igiladi. E kaya: “E dau taura na gauna mera qai veinuitaki na itokani vou, me rawa nira qai lomavakacegu ra yalodei nira veimaliwai voli. Vakacava mo tarogi ira tale na so me baleta na nodra isususu? A tukuni vei au: ‘E sega ni dua ga na ivakarau vakavanua e donu. Raica na ka vinaka duadua o rawa ni vulica mai na ivakarau vakavanua kece.’” Io, me vaka ga a uqeti me cakava o Sabine, o na rairai via vaqara tale ga eso na ka mai na nodra ivakarau vakavanua tale na so ena yaga mo vakatotomuria.
Au Dau Via Tu Taudua Ga?
O na rairai taroga: ‘Au dau via tu taudua ga? Era na kauaitaki au tale na so keu dau kauaitaki ira?’ Ke o nanuma ni dodonu mo cakava qori, saga sara mo dau veimaliwai kei ira tale na so. E tukuna me baleta na nona toki mai Guadeloupe i Igiladi o Roselise e yabaki 30: “E dau nodra ivakarau na galili mera yawaki ira tale na so.” Na nona ivakasala: “Vaqarai ira era rairai galili tale tu ga. Vakaliuliu mo veitalanoa kei ira. Ena so na gauna, e dua wale ga na taro e rawa ni itekitekivu ni veitokani e dei.”
Ia e vinakati na gauna kei na sasaga mo drau qai veitokani voleka kei na dua. E dua na sala vinaka me tekivu kina qori, oya mo vulica mo dau vakarorogo. Ke o dau vakarorogo vinaka ni vosa e dua, o na kila na ka mo tukuna ni drau veitalanoataka na ka e taleitaka. Nanuma tiko, na veinanumi e bibi ena veitokani!
E Noqu Malumalumu na Rai Cala?
Ke o dau beci iko, ena dredre mo vakaitokani. E vinaka mo taroga: ‘Au dau raici au sobu tu ga?’ O Abigaïl e dua na goneyalewa yabaki 15 mai Ghana e kaya: “E vagalilitaki au ena so na gauna na rai cala. Au dau nanuma kina niu sega ni lomani, au tawayaga.” Ke o dau vakaliuliu mo vukei ira tale na so na ka era gadreva, mo nuidei ni na sega ni tiko vei ira na rai ni o tawayaga. Era na via veitokani kei iko mera sauma lesu kina na nomu vinaka. De vinaka mo vakaliuliu sara ga ni cakava na veika mo veitokani rawa kina.
Ni o vakasamataka na sala o rawa ni vakaliuliu kina mo veitokani kei ira tale na so, o na kunei ira kina na itokani e duidui na nodra yabaki ni bula. O na marau ni drau veimaliwai vinaka kei na dua e qase vei iko se dua e gone. A valuta rawa na nona galili o Abigaïl ni a digi ira era qase cake mera nona itokani. A kaya: “Au vuli vei ira nira sa qaseta na bula.”
Au Dau Yawaki Ira Tale na So?
Era vakacegui vakalailai na galili ena levu ni gauna era vakayagataka ena sara tivi, kei na qito ena vidio, se na vica vata na aua era vakayagataka ena kompiuta. Ia ni boko na iyaya qori, era galili tale. E kaya o Elsa e dua na goneyalewa yabaki 21 mai Parisi: “E rawa ni vaka na wainimate gaga na tivi kei na qito ena vidio ni rawa ni vakawelea e dua me sega kina ni via veitokani.”
E dua na ka e leqa kina na tivi oya ni o dabe galugalu toka ga, drau sega ni veitalanoa kei na dua, o sega tale ga ni saga kina mo veitokani. E va tale ga qori na qito ena vidio—o raitayaloyalotaka ga kina ni o tu ena dua tale na vuravura, ia ni o qito oti, sa yali tale na ka o raitayaloyalotaka. Ena rairai vakawelei iko na internet mo guilecava kina na ka era yaco wavoliti iko tu, ia e rawa ni vagolei iko ena ka tawakilikili se vei ira era dau vunitaka na kedra itukutuku. Na internet e sega gona ni vanua veiganiti mo qara kina na itokani dina.
Au Qara Tiko na Kequ iSa ni Vakawati?
Eso na dawai era na rairai via vakawati ga me oti kina na nodra galili. E sega ni vakabekataki ni o na marau vakalevu ke o vakawatitaka e dua e yalovinaka qai dauloloma, ia me qarauni me kua ni vakusai na vakatulewataki ni so na ka bibi me vaka na vakawati.
E sega ni vakadeitaki ni na vakaotia na galili na vakawati. O ira na vakawati e sega ni vinaka na nodra veimaliwai vakaveiwatini, e tukuni nira “maliwai ira era galili vakalevu duadua e vuravura.” E ka ni rarawa ni dua na iwiliwili levu era tu ena ituvaki qori. Ke o via vakawati ena dua na gauna, e ka vakayalomatua mo valuta rawa na galili ni se bera ni o dodomo. Ni o veisautaka na nomu rai kei na nomu itovo, o qai vakaliuliu ni saga mo veitokani ni o se dawai, qori sa rawa sara ga ni yavu ni dua na vakawati e dei qai mamarau.
O Rawa ni Valuta na Galili
De dua e sega na iwali totolo ni nomu galili. Ia o rawa ni valuta ni o muria na iVunau Koula a tukuna o Jisu: “Na ka kece oni vinakata mera cakava vei kemuni na tamata, moni cakava tale ga vei ira.” (Maciu 7:12) Ke o vinakata gona mera kauaitaki iko tale na so, o iko tale ga mo kauaitaki ira. Ke o vinakata mera talaucaka vei iko na nodra nanuma se na lomadra, o iko tale ga mo cakava vei ira. E levu era na rairai sega ni kauai ena imatai ni gauna o saga kina mo veitokani kei ira, ia ni toso na gauna era na kauai eso. Ke ra sega mada ga ni kauai, o na marau ga vakalevu ni o saga mo veitokani kei ira.
A tukuna o Jisu e dua tale na ka dina o rawa ni valuta kina na galili: “E marau vakalevu o koya e solia na ka, vakalailai o koya e taura na ka.” (Cakacaka 20:35) Ke o dau solia na nomu gauna mo veivuke—o vukea e dua na gone ena nona ka ni vuli, se o vukea e dua na itabaqase ena volivoli se na samaki ni nona vale, iteitei se loga senikau—o na marau vakalevu, qori e rawa sara tale ga ni itekitekivu ni veitokani dina.
iTokani Vinaka Duadua
E levu tale na vakatutu yaga me valuti kina na galili. Kua ni o sogobutu toka ga e vale. Ke rawa, lako ena so na vanua ni gade se i lomanivanua. Ni o tiko taudua e vale, vakaogai iko ena so na cakacaka yaga, me vaka na culacula, cakacaka ni vale, ripeataki iyaya, se wilivola. A vola e dua na tagane: “Niu sotava na leqa, e dau vakacegui au na noqu wilivola mada ga vakalailai.” E levu e vakacegui ira na nodra wilika na same ena iVolatabu.
Era kaya na kenadau ni rawa ni valuta na galili e dua, qai bulabula vinaka ke veimaliwai kei ira era lotu vata. O na kunei ira e vei era saga tiko mera muria na iVunau Koula? Ena ivola me baleti ira na veisoqosoqo lotu, a vola kina e dua na dauvakadidike e sega ni tovaka e dua na lotu: “Ena nodra ivavakoso, o ira na iVakadinadina [i Jiova] era lewe ni dua na itikotiko e laurai kina na veinuitaki dina ra dau veiciqomi tale ga.”
A qai tukuna vei ratou na nona tisaipeli o Jisu na ka ena vakatakilakilataki ira na lotu vaKarisito dina: “Na ka qo era na kila kece kina ni dou noqu tisaipeli, ke dou veilomani.” (Joni 13:35) Na loloma qori—kena imatai, na nona lomana na Kalou e dua, kena ikarua, na nona lomani ira era lotu vata—e kedra ivakatakilakila levu era lewena na lotu dina.—Maciu 22:37-39.
Na sala vinaka duadua me valuta kina e dua na galili oya me veitokani kei na Kalou. Ke nomu itokani na Kalou, o na sega vakadua ni galili!—Roma 8:38, 39; Iperiu 13:5, 6.
[Kato/ iYaloyalo ena tabana e 17]
SALA AU VALUTA KINA NA NOQU GALILI
Anny, e yada: “Au dau saga meu lewa vinaka na ka au vakasamataka, meu raica tale ga na ka e vinaka kina na kequ ituvaki.”
Carmen, e dawai: “Au vulica meu ‘guilecava’ na ka sa oti, meu toso tiko ga i liu, au qai qarai ira na itokani vou.”
Fernande, e yada: “O na guilecava na nomu leqa ke o dau saga mo vukei ira tale na so.”
Jean-Pierre, e dawai: “Au dau taubale, qori na gauna au dau talaucaka kina na lomaqu vua na Kalou.”
Bernard, sa mate o watina: “Au dau qiriti ira na noqu itokani, ia au sega ni cakava qori meu nanuma lesu kina na noqu rarawa ena gauna sa oti, au sega ga ni vinakata me tagutuvi na neimami veikilai.”
David, e dawai: “Au dau via tiko taudua ga, ia au dau saga meu kilai ira tale na so.”
Lorenna, e dawai: “Au dau vakaliuliu meu torovi ira tale na so, me keimami veikilai.”
Abigaïl, e yabaki 15: “Au dau veimaliwai kei ira na noqu itokani era qase cake, e levu na ka au vulica vei ira.”
Cherry, e dawai: “Au vakadinadinataka ke o tukuna vei ira tale na so ni o galili, era na saga sara ga mera kauaitaki iko.”
[Kato/iYaloyalo ena tabana e 18]
SALA MO VALUTA KINA NA GALILI
● Me donu na nomu rai
● Yalana na ka ni veivakamarautaki o na tiko taudua ga kina, me vaka na sara tivi
● Qarai ira na itokani era taleitaka tale ga na ka vinaka, qori era wili kina o ira oni sega ni yabaki vata
● E bibi sara mo veitokani kei na Kalou
[iYaloyalo ena tabana e 16]
Veitokani kei ira oni sega ni yabaki vata