Na Mesaia

Ena kilai vakacava na Mesaia?

E parofisaitaka na iVolatabu ni na mai vakayacora na Mesaia se Karisito e rua na itavi, ena veiyawaki na kena vakayacori.a Ena imatai ni nona itavi ena bula kina vakatamata. Me rawa ni kilai ni Mesaia, era sa tukuna oti tu na dauvolaivolatabu e levu na ka me baleta nona bula kei na nona cakacaka vakaitalatala. Na inaki bibi ga ni parofisai vakaivolatabu me “vakatakilai kina o Jisu.”​—Vakatakila 19:10.

KA E KAYA NA IVOLATABU

Na Mesaia ena . . .

• Vu mai na iyatukawa i Tui Tevita.​—Aisea 9:7; Luke 3:23-31.b

• Sucu e Peceliema.​—Maika 5:2; Luke 2:4-7.

• Yalomalumalumu ni kacivaka na “itukutuku vinaka.”​—Aisea 61:1; Luke 4:43.

• Beci qai sega ni dokai.​—Aisea 53:3; Maciu 26:67, 68.

• Bukiveretaki ena 30 na tikinisiliva.​—Sakaraia 11:12, 13; Maciu 26:14, 15.

• Galu tu ga ena matadra na beitaki koya vakatawadodonu nira vinakata me mate.​—Aisea 53:6, 7; Maciu 27:12-14.

• Dusi koya ni “Lami” e vakacabori me bokoci kina na ivalavala ca, meda rawa ni vakadonui tale ena mata ni Kalou.​—Aisea 53:7; Joni 1:29, 34, 36.

• Vakamatei ia ena sega ni ramusu e dua na nona sui.​—Same 34:20; Joni 19:33, 36.

• Bulu kei ira na vutuniyau.​—Aisea 53:9; Maciu 27:57-60.

• Vakaturi ena ikatolu ni siga.​—Maciu 16:21; 28:5-7.

Vakayacora o Jisu na parofisai kece qori kei na levu tale. E vakabulai ira na tauvimate, vakaturi ira tale ga na mate. E vakadinadinataka ni Mesaia qai vakarautaka na yavu dei meda vakabauta kina na yalayala ni iVolatabu me baleta na veika ena cakava e vuravura raraba ena dua na gauna se bera mai. (Luke 7:21-23; Vakatakila 21:3, 4) Ni sa vakaturi o Jisu e dabe sara ena ‘liga imatau’ ni Kalou me waraka na gauna ena qai vakaotia kina nona cakacaka vakaMesaia.​—Same 110:1-6.

“Ni yaco mai na Karisito, ena levu beka na nona cakamana ni vakatauvatani kei na tagane qo?”​—Joni 7:31.

Ena Vakaotia Vakacava na Mesaia Nona Cakacaka?

Era a vakanamata na Jiu ena gauna i Jisu me sereki ira mai na veiliutaki vakaRoma na Mesaia, oti me veiliutaki ena matanitu o Isireli e sa vakasukai mai. (Cakacaka 1:6) Era qai kila na Jiu era nona imuri o Jisu, ni na lai vakaotia mai lomalagi o koya na nona cakacaka me dua na ka bula vakayalo kaukaua e soli vua na lewa.​—Maciu 28:18.

KA E KAYA NA IVOLATABU

Na ikarua ni nona itavi na Mesaia oya me . . .

• Veiliutaki vakatui ena Matanitu ni Kalou, qo na matanitu me veiliutaki e vuravura.​—Taniela 7:13, 14; Vakatakila 11:15.

• Vakalougatataki keda kece na vakaraitaka nida vakabauti koya.​—Vakatekivu 22:17, 18; Same 72:7, 8.

• “Kureitaka na veimatanitu e vuqa” kei ira na kena iliuliu ni vakarusai ira na saqati koya.​—Aisea 52:15; Vakatakila 19:19, 20.

• Taqomaka na “isoqosoqo levu” e roboti vuravura era yalododonu mera bula ena vuravura vou e vakilai kina na vakacegu.​—Vakatakila 7:9, 10, 13-17.

• Cakacaka vata kei na Kalou o Jiova mera vakaturi na mate mera bula ena Parataisi e vuravura.​—Luke 23:43; Joni 5:21, 28, 29.

• Vakavulici ira na vakarurugi ena nona veiliutaki ena sala me rawati kina na vakacegu dina.​—Aisea 11:1, 2, 9, 10.

• Vakaotia na ivalavala ca, e vakavuna tiko na tauvimate kei na mate.​—Joni 1:29; Roma 5:12.

• Vakawabokotaka na cakacaka kece i Setani, me vakaduavatataki keda ena nona veiliutaki na Kalou o Jiova.​—1 Korinica 15:25-28; 1 Joni 3:8.

Sa vakayacora o Jisu na imatai ni nona itavi vakaMesaia. Ena vakaotia tale ga na kena ikarua. Era vulica vakatitobu na yalomatua na veika me baleti koya, ni kaya o Jisu: “O yau na sala, na dina, kei na bula.”​—Joni 14:6.

“Ena tubu vinaka mai e na nona gauna ko ira na yalododonu; kei na sautu levu, ka yacova na gauna e oti kina na vula. Ena lewa talega . . . nai yalayala kei vuravura.”​—Same 72:7, 8.