Papitaisotaki Jisu o Joni

RAICA mada na ruve e via ro tiko ena ulu i koya na turaga oqo. Oqori ga o Jisu ni sa yabaki 30. Na tagane erau tiko vata oqori o Joni na dauveipapitaiso. Eda sa vulica oti e so na ka baleti koya. O se nanuma tiko na gauna a lai sikovi Ilisapeci kina o Meri qai rika ena marau na gone e ketena? Io na gone sara ga oya o Joni. Ia na cava erau mai cakava tiko oqo o Joni kei Jisu?

E se qai tabadromuci Jisu oti ga o Joni ena Uciwai na Joritani. Oqori na ivalavala ni nona papitaisotaki e dua. Ena tabadromuci mada i wai qai vueti cake mai. Oqo sara ga na ka e cakava tiko o Joni vei ira na tamata. Ia na cava e papitaisotaki Jisu kina?

A cakava oqori o Joni baleta ni a mai kerei koya sara ga o Jisu. O Joni e papitaisotaki ira era veivutunitaka na nodra ivalavala ca. Ia ni se sega ni bau ivalavala ca o Jisu, na cava ga me qai veivutunitaka? E sega ni veivutunitaka o koya e dua na ivalavala ca, ni luve ni Kalou mai lomalagi. Ia e tiko tale e dua na vuna e kerei Joni kina me papitaisotaki koya. Meda raica mada.

Ni bera ni lako mai o Jisu vei Joni, a dua tu na matai. O ira na matai era dau taiyaya me vaka na teveli kei na idabedabe. O Josefa na wati Meri e matai, a vakavulici Jisu tale ga ena cakacaka oqo. Ia a sega ni talai Luvena mai o Jiova me mai matai. E tu na cakacaka bibi me mai cakava. Sa kena gauna tale ga oqo me cakava kina. Me ivakaraitaki gona ni nona sa na cakava na loma i Tamana, a kerei Joni kina me papitaisotaki koya. E marautaka beka oqori na Kalou?

Io, ni qai cabe tiko ga mai wai o Jisu, sa rogo mai e dua na domo mai lomalagi: ‘Oqo na Luvequ, au sa dauvinakata.’ E tadola tale ga na lomalagi, qai vuka sobu mai e dua na ruve vei Jisu. Ia e sega ni ruve dina, dina ga ni rairai vaka na ruve. E yalo tabu ni Kalou.

Sa na levu sara na ka me na vakasamataka o Jisu ena gauna oqo, mani lai tiko ina dua na vanua lala me 40 na siga. Sa qai lako mai vua o Setani me vakatovolei koya me beca na lawa ni Kalou. Ia e sega ni via cakava na ka oqo o Jisu.

Oti oqori, sa qai sota o Jisu kei na so eratou isevu ni nona imuri, se tisaipeli. Oqo e so vei iratou, o Adriu, Pita (na yacana tale ga o Saimoni), Filipi kei Nacanieli (na yacana tale ga o Pacolomiu). Sa qai gole yani o Jisu kei iratou kece na nona tisaipeli vou oya ina yasayasa o Kalili. Eratou lai cegu ena koro i Nacanieli, o Kena. Ena vanua vata ga oqo a sureti kina o Jisu ina dua na kana magiti ni vakamau qai cakava tale ga kina na imatai ni nona cakamana. O kila beka na cava oya? Na nona vukica na wai me waini.