Wase e 12

Papitaiso i Jisu

NI OTI e rauta ni vula ono na nona tekivu vunau ko Joni, sa qai lako yani vua ko Jisu ki na Joritani ni sa yabaki 30. A cava me lako kina vua? Me gade beka ga? E taleitaka wale beka ga ko Jisu me kila se vakacava tiko na cakacaka i Joni? Sega, ka ni a kerei Joni ko Jisu me papitaisotaki koya.

E tarovi koya sara ga ko Joni: “O i au ga e ganita me’u papitaisotaki mai vei kemuni, ia oqo ko ni sa qai lako tale li mai vei au?” E kila ko Joni ni tavalena ko Jisu na Luve lavotaki ni Kalou. Io, a rika ena marau ko Joni ena loma ni kete i tinana, ni sa buketetaki Jisu voli ko Meri ena gauna a sikovi iratou kina! Ko Ilisapeci, na tina i Joni, e sega ni vakabekataki ni a qai tukuna e muri vei koya na veika oqo. Ka rawa ni tukuna talega vua na nodra kacivaka na agilosi na sucu i Jisu kei na rairai ni agilosi vei ira na i vakatawanisipi ena bogi a sucu kina ko Jisu.

E sega ni vulagi ko Jisu vei Joni. Ia e kila vinaka ko Joni ni sega ni vauci Jisu na nona veipapitaisotaki. Ni baleti ira era veivutunitaka na nodra i valavala ca, ia e sega na i valavala ca i Jisu. Veitalia ga na nona via tarova ko Joni, e vakaukauwataki koya ga ko Jisu: “Tei vosota mada me caka vaka kina e na gauna oqo, ni daru na vakayacora kina na ka kece e vinakata na Kalou.”

Na cava e dodonu me papitaiso kina ko Jisu? Baleta ni vakatakarakara na papitaiso i Jisu, e sega ni veivutunitaka na i valavala ca, ia na nona soli koya me vakayacora na loma i Tamana. Na matai ko Jisu, ia sa tekivu ena gauna oqo me vakayacora na cakacaka vakaitalatala a talai koya mai kina na Kalou ko Jiova me mai vakayacora e vuravura. O bau vakasamataka ni a namaka li ko Joni me yaco e dua na ka ni sa papitaisotaki Jisu?

Ia, e qai tukuna e muri ko Joni: “Ia ko koya sa talai au mai me’u veipapitaisotaki e na wai, sa kaya ga vei au, O koya ko na raica ni sa lako sobu kina na yalo tabu, a sa mai toka vua, sai koya oqo sa veipapitaisotaki e na yalo tabu.” O koya gona, sa namaka tiko ko Joni na yalo tabu ni Kalou me lako sobu mai vua e dua me na papitaisotaka. De dua a sega ni kurabui ena gauna sa cabe cake mai na loma ni wai ko Jisu, ni qai raica ko Joni “na yalo tabu ni sa lako sobu mai lomalagi me vaka na ruve.”

Ia e levu sara na veika a qai yaco ni sa papitaiso ko Jisu. ‘Sa qai tadola vua na lomalagi.’ A cava na i balebale ni ka oqo? E kena i balebale beka ena gauna sa papitaiso tiko kina, e vakananuma lesu nona bula mai lomalagi ni se bera nona bula vakatamata. Sa qai nanuma lesu ko Jisu na nona bula me vaka e dua na luve vakayalo ni Kalou ko Jiova, okati kece kina na veika sa vosataka oti na Kalou vei koya ena nona a bula voli mai lomalagi ni bera nona mai sucu vakatamata.

Me kuria oqo ena gauna ni nona papitaiso sa qai kacivaka e dua na domo mai lomalagi: “O koya oqo na noqu Gone ni toko, au sa dauvinakata vakalevu.” Na domo i cei li o ya? Na domo beka ga i Jisu? E sega ni vakakina! Na domo ni Kalou. E macala vinaka, ni Luve ni Kalou ko Jisu, e sega ni Kalou o koya, me vaka era kaya e so na tamata.

Ia, ko Jisu e dua na luve ni Kalou vakayago me vakataki koya na i matai ni tagane ko Atama. Ni vakamacalataka oti na tisaipeli ko Luke na papitaiso i Jisu, sa qai vola: “A sa tolusagavulu na yabaki i Jisu, ko koya sa kainaka sa luve i Josefa, ni sa vakatekivu me vakavuvuli voli ko koya na luve i Ili, . . . na luve i Tevita, . . . na luve i Eparaama, . . . na luve i Noa, . . . na luve i Atama, na luve ni Kalou.”

Me vaka ni “luve ni Kalou” vakayago ko Atama, e vakatalega kina ko Jisu. Ko Jisu na tamata rogo duadua a bau bula, ka mai macala oqo ni da dikeva na bula i Jisu. Ia, ena nona papitaiso, a vauci ena dua na veiwekani vou ko Jisu kei koya na Kalou, ka yaco me Luve vakayalo talega ni Kalou. Sa vaka ga me kacivi koya lesu na Kalou ki lomalagi, ena nona vakatekivutaki koya ena dua na i lakolako ka laki tini ena nona cabora nona bula vakatamata me i soro ena vukudra na kawatamata era sa vakacalai tu ena i valavala ca. Maciu 3:13-17; Luke 3:21-38; 1:34-36, 44; 2:10-14; Joni 1:32-34; Iperiu 10:5-9.

▪ Na cava e sega ni vulagi kina ko Jisu vei Joni?

▪ Me vaka ni sega na nona i valavala ca, na cava me papitaiso kina ko Jisu?

▪ Ena vuku ni veika e sa kilai Jisu tu kina ko Joni, na cava beka a sega ni kurabui kina ni sa raica na yalo tabu ni Kalou ni lako sobu vei Jisu?