Na Sala i Tamasiko

O KILAI koya e sa davo tu oqori? Oqori o Saula. Nanuma tiko ni a soli vua na nodra kote na tamata era a vakaviriki Sitiveni. Raica mada na rarama serau oqori! Na cava beka e sa yaco tiko?

Ni vakamatei oti o Sitiveni, sa qai liutaka o Saula nodra vakacacani na imuri i Jisu. E curuma yani na nodra veivale, yarataki ira mai tuba qai balati ira i valeniveivesu. Levu gona na tisaipeli era sa dro ina so tani tale na koro mera lai kacivaka kina na “itukutuku vinaka.” Ia e lako yani ina veikoro oqori o Saula me vaqarai ira kina. E sa lako tiko oqo i Tamasiko. Ni se lako tiko ga a yaco e dua na ka veivakurabuitaki.

A cilavi Saula vakasauri e dua na rarama mai lomalagi. E bale ina qele, me vaka e raici tiko e ke. Sa qai rogo mai e dua na domo: ‘Saula, Saula! A cava o vakacacani au tiko kina?’ O ira na tiko vata kei koya era raica na rarama ra rogoca tale ga na domo. Ia era sega ga ni kila na veika e tukuni.

E taroga o Saula: ‘O cei beka o kemuni, Turaga?’ E kaya yani na domo: ‘O yau o Jisu o vakacacana tiko.’ E kaya oqo o Jisu baleta ni gauna e vakacacani ira tiko kina na nona imuri o Saula, e vaka sara ga e cakava tiko vua.

Sa qai taroga o Saula: ‘Na cava meu cakava Turaga?’

E kaya tale o Jisu: ‘Tucake, lako i Tamasiko. Ena qai tukuni vei iko mai kea na ka mo cakava.’ Ni tucake me veiraiyaki o Saula, sa sega ni raica rawa e dua na ka. Sa mataboko! Era sa qai tuberi koya yani na tiko vata kei koya i Tamasiko.

Sa qai kaya o Jisu vua e dua na nona tisaipeli e tiko e Tamasiko: ‘Tucake, Ananaiasa. Lako ina gaunisala o Dodonu, ina vale i Jutasa mo tarogi Saula kina. Au sa digitaki koya me noqu tamata nuitaki.’

E vakamuria sara o Ananaiasa. Ni rau sa sota kei Saula, e tabaki koya sara ena ligana qai kaya: ‘E talai au mai na Turaga mo rai rawa tale, mo qai vakasinaiti ena yalo tabu.’ Ni cavuta oti ga na vosa oya, e lutu vakasauri mai matana e dua na ka e vaka na vari ni ika. Sa rai rawa tale o Saula.

E vakayagataki vakalevu sara o Saula me vunau vei ira na tamata ena levu na vanua. E mai kilai tale ga me o Paula na yapositolo, eda na qai vulica tale e levu na ka baleti koya. Meda raica mada se cava a talai Pita kina na Kalou me cakava.