Cati Vakalevu na Nona Vunau o Saula
ERA sega ni vakabauta na Jiu mai Tamasiko se rawa vakacava me sa mai tavuki e dua e dau tokona na nodra lotu. Oqori o Saula, e kilai ena nona dau vakacacani ira era vunautaki Jisu mai Jerusalemi. A lako i Tamasiko me lai vakacacani ira e so tale era tiko e kea. Ia, oqo e sa mai vunautaka tiko ni Mesaia ga o Jisu, a rube ni a beitaki ni vosa vakacacataka na Kalou! E sa leqa beka na vakasama i Saula?—Cakacaka 9:1, 2, 20-22.
Se cava beka e vakavuna? O ira era lako vata mai kei Saula ena ilakolako mai Jerusalemi, era na rairai talanoataka na ka a yaco e gaunisala. Nira sa voleka yani i Tamasiko, a cila vakavolivoliti ira vakasauri e dua na rarama, ra qai bale kece ina qele. Era rogoca tale ga e dua na domo. Ia, o Saula ga a mavoa. Sa davo koto e gaunisala. Ni qai duri cake mai sa sega ni raica rawa e dua na ka, sa ra qai tuberi koya yani i Tamasiko o ira era a lako vata tiko.—Cakacaka 9:3-8; 26:13, 14.
Tekivu Vunautaki Jisu e Dua na Kena Meca
Na cava beka a yacovi Saula ena ilakolako oya i Tamasiko? A vakamalumalumutaki koya beka na balavu ni ilakolako kei na todra ni matanisiga? O ira na dauvakatitiqa edaidai, era kaya ni a veilecayaki ga na yago i Saula. Me tokona gona na nodra ile, era vakamacalataka ni rawa ni a tatadra ga, vosavosaiyalona, leqa na nona vakasama, se yatayata e vu mai na cokai ni nona lewaeloma, ra bau kaya sara mada ga ni rawa ni a manumanunisoni ni nodra nanuma ni a dau tauvi Saula na mate oqo.
Ia na ka a yaco dina, oya na nona rairai vei Saula o Jisu Karisito ena dua na rarama remoremo, me vakabauta kina ni o Karisito na Mesaia. E so na droini ni italanoa oqo e vakaraitaka ni a lutu mai na ose o Saula. De dina beka oqori, ia na iVolatabu e kaya ga ni a “bale ki na qele.” (Cakacaka 22:6-11) A rairai madua o Saula ena nona bale oya, ia e sega ni vakabekataki ni a madua vakalevu sara ni sa mai biuta na nona itutu vakalotu a dau sakitaka voli. Oqo me sa na qai kila ni dina na ka era a vunautaka voli na imuri i Jisu. Na ka ga me cakava o Saula me tomani ira. O koya gona, e dina ni a saqata vakaukaua na itukutuku i Jisu, ia sa mai veisau me dua e cuqena vakalevu. Ni sa rai tale, sa qai papitaiso, “Sa kaukauwa cake mai ko Saula, a sa vakataqayataki ira na Jiu era sa tiko mai Tamasiko, ni sa vakadinadina sara ni sa Karisito ko koya oqo.”—Cakacaka 9:22.
Dreve na iNaki Ca
A lako i vei o Saula, a qai vakatokai e muri me o Paula, ni oti nona tavuki me lotu Vakarisito? Ena nona ivola vei ira na kai Kalatia, e kaya: “Ia au a lako sara ki Arapea, ka’u qai lesu tale ki Tamasiko.” (Kalatia 1:17, VV) Na vosa “Arapea” e rawa ni tukuni ni a lako o koya ena dua na vanua ena iyarabale kei Arapea. Oya na vuna era nanuma kina e so na vuku ni a lako o Paula ina vanua dravuisiga e Siria, se ina matanitu makawa o Nabataea e liutaka o Tui Arita IV. Kena irairai ni a vaqara o Saula e dua na vanua vakanomodi me lai vakasama vakatitobu kina ni papitaiso oti, vakataki Jisu ga ni a lako e veikau ni oti nona papitaiso.—Luke 4:1.
Ni qai lesu i Tamasiko o Saula, sa ra ‘bosea na Jiu mera vakamatei’ koya. (Cakacaka 9:23) A yadrava tiko na koro na kovana nei Tui Arita me rawa kina ni vesuki Saula. (2 Korinica 11:32, VV) O ira na meca era bukiveretaka mera vakamatei koya, ia o ira na tisaipeli i Jisu era a tuvanaka na sala me dro kina.
So vei ira a vukei Saula ena nona dro, e okati kina o Ananaiasa kei ira na tisaipeli a tiko vata kei ira o Saula ni oti ga nona tavuki me lotu Vakarisito.a (Cakacaka 9:17-19) De ra vukei koya tale ga o ira era a yaco mera vakabauta ena gauna a vunau voli kina mai Tamasiko, baleta na Cakacaka 9:25 e kaya: “Sa qai kauti koya e na bogi ko ira na nona tisaipeli, ka tukuca sobu e na dua na sova ki daku ni bai.” Na ivosavosa “nona tisaipeli” e rawa ni vakaibalebaletaki ira a vakatavulica o Saula. Se mani cava a yaco, na vuavuaivinaka ni nona cakacaka vakavunau e sa qai bukana ga na nodra cati koya vakalevu.
Ka Eda Vulica Kina
Nida vakadikeva e so na ka a yacovi Saula ni donuya na nona tavuki kei na nona papitaiso, e matata vinaka ni a sega ni kauaitaka vakalevu na nodra nanuma na tamata me baleti koya; qai sega tale ga ni soro ena veitusaqati kaukaua. Na ka e bibi duadua vua, oya na nona ilesilesi me vunau.—Cakacaka 22:14, 15, VV.
O se qai vakadinata beka ena dua na gauna wale ga oqo ni bibi dina na vunautaki ni itukutuku vinaka? Ke vaka kina, o sa na kila ni o ira kece na lotu Vakarisito dina e dodonu mera dautukutuku ni Matanitu ni Kalou. Mo kua gona ni kurabui ni so na gauna e rawa ni caka vei iko na ivakarau kaukaua ena vuku ni nomu cakacaka vakavunau. (Maciu 24:9; Luke 21:12; 1 Pita 2:20) E ivakaraitaki vinaka vei keda na sala e vosota kina o Saula na veivakacacani a sotava. Na Kalou ena vakadonui ira na lotu Vakarisito era vosota ra qai sega ni soro nira sotava na veika rarawa. A kaya o Jisu vei ratou na nona tisaipeli: “Ena cati kemudou na tamata kecega, e na vuku ni yacaqu.” Ia, a qai vakadeitaka vei ira: “Dou na maroroya na yalomudou ni dou sa dauvosota.”—Luke 21:17-19.
[iVakamacala e ra]
a Rairai a tadu na lotu Vakarisito e Tamasiko ni oti beka ga nona vunau voli o Jisu e Kalili se ni oti na siga ni Penitiko 33 S.K.—Maciu 4:24; Cakacaka 2:5.
[iYaloyalo ena tabana e 28]
A “bale ki na qele” o Saula ni rairai vua o Jisu
[iYaloyalo ena tabana e 29]
A drobula o Saula mai Tamasiko ni a bukiveretaki me vakamatei