Na Bula ena Vuravura Vou ni Vakacegu

Na cava e votu e lomamu ni o raica na iyaloyalo ena tikidua oqo? O sega ni diva na vakacegu, na marau kei na bula sautu e tabaki tu kina? O na diva sara ga. Ia, e tadra beka ga, se ka e divi wale tu ga na yaco ni ituvaki vaka oqo e vuravura?

Levu sara na tamata era nanuma ni vaka dina kina. Ni yaco tu edaidai na ituvaki leqataki e so me vaka na ivalu, basulawa, via kana, tauvimate, qase​—e vica wale ga oqo. Ia e tiko na vuna meda vakanuinui kina. E kaya na iVolatabu ni na vakataudeitaki ena veigauna se bera mai “me vaka na nona vosa ni yalayala [na Kalou], eda sa waraka na lomalagi vou kei na vuravura vou, sa tiko kina nai valavala dodonu.”​—2 Pita 3:13; Aisea 65:17.

Na “lomalagi vou” kei na “vuravura vou,” me vaka e vakaraitaka na iVolatabu, e sega ni lomalagi dina eda raica tu e cake se vuravura eda butuka tu oqo. Na vuravura kei na lomalagi oqo e vinaka vakaoti na kedrau buli, e vakaraitaka tale ga na iVolatabu ni rau na tu me tawamudu. (Same 89:36, 37; 104:5) Na “vuravura vou” e vakaibalebaletaka na ilawalawa tamata yalododonu era na bula e vuravura, na “lomalagi vou” e tukuna na matanitu uasivi vakalomalagi ena liutaka mai na ilawalawa tamata era na tawana na vuravura oqo. Ia e ka vakayalomatua beka me vakabauti ni na tauyavu dina na “vuravura vou” lagilagi?

Vakasamataka mada oqo ni a loma ni Kalou e liu me vaka tu oya na kena uasivi na ituvaki kei vuravura. A biuti rau na imatai ni veiwatini ena Parataisi o Iteni ena vuravura ga oqo qai solia vei rau e dua na ilesilesi totoka: “Drau vakaluveni, ka tubu me lewe vuqa, ka vakatawai vuravura, ka vakamalumalumutaka.” (Vakatekivu 1:28) Io, na inaki ni Kalou me rau vakaluveni, me rau qai vakatetea yani na Parataisi me roboti vuravura. E dina ni rau a qai talaidredre e muri vua na Kalou, mani sega ni ganiti rau kina na bula tawamudu, ia a sega ni veisau na inaki dina ni Kalou. Ena qai vakayacori dina ena vuravura vou!​—Aisea 55:11.

Ni o dau masuta na Masu ni Turaga, se na masu na Tama i Keimami, o kerea tiko kina me lako mai na Matanitu ni Kalou. O sa masuta sara tiko ga e keri na Matanitu vakalomalagi me vakaotia vakadua mai vuravura na veika ca, me qai lewa mai na vuravura vou. (Maciu 6:9, 10) Eda nuidei ni na rogoca na masu vaka oya na Kalou, ni yalataka na nona Vosa: “Era na taukena na vanua ko ira na yalododonu, ka tiko kina ka sega ni mudu.”​—Same 37:29.

Na Bula ena Vuravura Vou ni Kalou

E sega ni vakatauvatani rawa na uasivi ni bula e vuravura ni sa veiliutaki na Matanitu ni Kalou, ni na vakavatukanataka e vuravura na ka vinaka kece ga a nakita e liu na Kalou mera marautaka na nona tamata. Sa na oti vakadua na veicati kei na veivakaduiduitaki, ena yaco na gauna mera sa na veitokani dina na tamata kece e vuravura. E yalataka na Kalou ena iVolatabu ni na ‘vakaotia na ivalu mai na iyalayala kei vuravura.’ “Ena sega ni lavei seleiwau e dua na matanitu ki na dua na matanitu, a ra na sega ni vulica tale nai valu.”​—Same 46:9; Aisea 2:4.

Ena qai vukici na vuravura kece me dua na were totoka, me parataisi. E kaya na iVolatabu: “Ena reki e na vuku ni ka oqo na lekutu kei na vanua dravuisiga; ia na vanua liwa lala ena marau, ka se me vaka na rose. . . . ni na vure cake mai na wai e na lekutu kei na uciwai e na vanua dravuisiga. Ia na nuku kata ena yaco me drano, kei na qele mamaca mei vurevure ni wai.”​—Aisea 35:1, 6, 7.

E sega ni tukuni rawa na levu ni marau ena Parataisi e vuravura. Ena sega tale na waloloi baleta ni sa lailai na kakana. E kaya na iVolatabu: “Ena qai vuataka na vuana ko vuravura.” (Same 67:6; 72:16) Na tamata yadua ena marautaka na vua ni nona cakacaka, me vaka e yalataka na noda Daubulibuli: “Era na tea eso na were-ni-vaini, ka kania na vuana. . . . era na sega ni tea, ka kania na tamata tani.”​—Aisea 65:21, 22.

Ena vuravura vou ni Kalou, sa ra na sega ni veiosoosoti na tamata ena vanua ni veivakavaletaki osooso, se itikotiko duka, ni sa yalataka tu na Kalou: “A ra na tara vale, ka tiko kina . . . era na sega ni tara, ka tiko kina na tamata tani.” E yalataka tale ga na iVolatabu: “Era na sega ni oca walega.” (Aisea 65:21-23) Na nodra cakacaka gona na tamata ena yaga qai veivakacegui. Ena sega vakadua ni ka ni oca vua e dua na bula.

Ena ruku ni Matanitu ni Kalou, ena yaco na gauna mera na veimaliwai vinaka tale na manumanu me vaka ga e dau yaco tu mai na were o Iteni, vaka tale ga kina na manumanu kei na tamata. E kaya na iVolatabu: “Ena tiko vata na wolifa kei na lami, ka na davo vata na lepate kei na luve ni me; ena tiko vata talega na luvedratou na pulumokau kei na laioni kei na manumanu uro; ia ena tuberi iratou e dua na gone lailai.”​—Aisea 11:6-9; Osea 2:18.

Vakasamataka mada, ena Parataisi e vuravura, sa na oti vakadua na tauvimate kei na malumalumu tale e so vakayago! E vakadeitaka vei keda na Vosa ni Kalou: “Ia na lewe ni koro ena sega ni kaya, Ka’u sa tauvi mate.” (Aisea 33:24) “Na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa.”​—Vakatakila 21:4.

Na Nomu Rawata

E sega ni vakabekataki ni yalayala ni Kalou me baleta na bula ena nona vuravura vou ni yalododonu ena uqeta sara ga na lomamu. E dina nira nanuma e so ni sa rui dredre me vakabauti ni na yaco dina na veivakalougatataki vaka oya, e sega ga ni dua na ka e dredre vua na noda Daubulibuli yalololoma.—Same 145:16; Maika 4:4.

Ia e tiko na veika e gadrevi meda cakava me qai rawa nida bula tawamudu kina ena Parataisi sa roro tiko mai oqo ena vuravura. E vakaraitaka o Jisu e dua e rui bibi, ena nona masu vua na Kalou: “Sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.”​—Joni 17:3.

Kevaka gona eda via bula dina ena vuravura vou ni Kalou, na imatai ni ka meda kila na loma ni Kalou, oti, meda qai muria sara. Ni ka sa macala vinaka tu oqo: “Sa takali tiko yani na vuravura kei na kena gagadre ca; ia ko koya ga sa vakayacora na loma ni Kalou sa tu dei ka tawa mudu,” ena qai marautaka tawamudu o koya na nona veivakalougatataki levu na noda Daubulibuli yalololoma.​—1 Joni 2:17, VV.

Na tikinivolatabu kece e lavetaki mai na Vakadewa ni Vuravura Vou ni iVolatabu.