Wase 12

O Vauci ena Dua na I Le Bibi

1, 2. (a) Na cava e bibi kina vei iko na ivakarau ni nomu bula? (b) Ena tarai cei tale na ivakarau ni nomu bula, ena vuku ni cava?

E BIBI dina na ivakarau ni nomu bula. Ni o na bula mamarau se o rarawa kina mai muri. Ena qai vakatau kina nomu takali vata kei na vuravura oqo se na nomu bulata na kena ivakataotioti ki na ituvaki vou dodonu ni Kalou mo bula tawamudu kina.​—1 Joni 2:17; 2 Pita 3:13.

² Na ivakarau ni nomu bula ena sega ni tarai iko duadua ga. E vauci ira tale ga na tani. Na ka o cakava e tarai ira tale ga. Kaya mada, ke rau se bula nomu itubutubu, na ka o cakava erau na dokai se madua kina. E kaya na iVolatabu: “A gone vuku sa vu ni reki vei tamana: ia na gone lialia sa vu ni rarawa vei tinana.” (Vosa Vakaibalebale 10:1) E bibi vakalevu sara, ni na tarai Jiova na Kalou na ivakarau ni nomu bula. Ni na reki se na rarawa kina o koya. Baleta? Ni o vauci tiko ena dua na i le bibi.

ERA NA YALODINA LI NA TAMATA VUA NA KALOU?

3. Na cava na bolebole i Setani vei Jiova?

³ A vakavotuya na i le oqo o Setani na Tevoro. A ya ena gauna a rawai rau kina o Atama kei Ivi me rau beca na lawa ni Kalou me rau duavata kei koya ena veivorati vua na Kalou. (Vakatekivu 3:1-6) Oqori e nanuma o Setani me yavu ni nona vosa bolebole vei Jiova, o ya: ‘Era qaravi kemuni ga na tamata ena ka era rawata vei kemuni. Au rawa ni vagolei cei ga e rawa ke o ni vakatarai au.’ E dina ni sega ni kunei na vosa oqo ena iVolatabu, e macala ni via vaka oqori na ka e tukuna o Setani vua na Kalou. Oqo e laurai ena i vola na Jope ena iVolatabu.

4, 5. (a) O cei o Jope? (b) Na cava e yaco mai lomalagi ena gauna i Jope?

⁴ O Jope e dua a bula ena vica vata na senitiuri ni oti na veivorati mai na were o Iteni. O Jope e dua e qarava na Kalou ena yalodina. E bibi dina li vei Jiova kei Setani na yalodina i Jope? E vakaraitaka na iVolatabu ni vaka kina. E volai kina na nona rairai yani o Setani vei Jiova mai lomalagi. Raica na ka erau veivosakitaka:

⁵ “Sa dua na siga era sa lako mai kina na luve ni Kalou me vakaraitaki ira e na mata i Jiova, a sa lako talega mai kei ira ko Setani. Ka sa kaya vei Setani ko Jiova, ko sa lako maivei? A sa kaya vei Jiova ko Setani, Au sa dauveilakoyaki e vuravura, ka gade voli kina. Ka sa kaya vei Setani ko Jiova, Ko sa vakananuma beka vua na noqu tamata ko Jope, ni sa sega e dua e tautauvata kaya e vuravura, a tamata yalododonu ka daucaka dodonu, ka sa rerevaka na Kalou, ka sega ni torova na ca?”​—Jope 1:6-8.

6. Na i le cava e votu tu ena gauna i Jope me vaka e vakaraitaka na iVolatabu?

⁶ Na cava e kaya kina o Jiova vei Setani ni tamata yalododonu o Jope? E macala ni i le tiko e ke, se ena yalodina o Jope vei Jiova se sega. Vakasamataka na taro ni Kalou, “Ko sa lako maivei?” kei na i sau ni taro i Setani, “Au sa dauveilakoyaki e vuravura, ka gade voli kina.” Na taro kei na kena i sau mai vei Setani e vakaraitaka ni sa solia o Jiova vei Setani na galala me vakadinadinataka kina nona bolebole ni rawa vua me vagolea tani na tamata mai vua na Kalou. Ia, na cava na ka a sauma o Setani vei Jiova me baleta na yalodina i Jope?

7, 8. (a) Na vuna cava a kaya o Setani ni qarava kina na Kalou o Jope? (b) Na cava e qai cakava na Kalou me vakadeitaka na i le o ya?

⁷ “Sa qai kaya vei Jiova ko Setani, Sa sega li ni yaga vei Jope na nona rerevaka na Kalou? Ko ni sa sega beka ni viribaiti koya, kei na nona vale, kei na nona ka kece e na veiyasana kecega? ko ni sa vakalougatataka na cakacaka ni ligana, ka sa tubu kina me ka levu na nonai yau e na vanua. Ia mo dodoka mada na ligamuni, ka tara na nona ka kecega, ena qai vosavakacacataki kemuni ki matamuni.”​—Jope 1:9-11.

⁸ Ena ka e tukuna o Setani, e laurai kina ni a vakalailaina na yalodina i Jope vua na Kalou. ‘O Jope e qaravi kemuni ga,’ e ba o Setani, ‘ni o ni solika tiko vua, sega ena nona lomani kemuni.’ A kudruvaka tale ga o Setani ni vakayagataka cala o Jiova nona kaukauwa levu. ‘O ni sa dauviribaiti koya tu ga’ a kaya o koya. Me vakadeitaki na i le oqo a qai sauma o Jiova: “Raica, sa soli ki ligamu na nona ka kecega; ia mo kakua ni dodoka na ligamu mo tarai koya.”​—Jope 1:12.

9. Na leqa cava a vakavuna o Setani vei Jope, ia na cava e qai yaco kina?

⁹ Sega ni bera ni sa vakacacani Jope sara o Setani. Sa qai cakava na ka me mate se butakoci kina na manumanu kece i Jope. Sa qai vakavuna me vakamatei tinitini na luve i Jope. Vovoleka ni yali na ka kece i Jope, ia e yalodina toka ga vei Jiova. E sega ni vosavakacacataka na Kalou. (Jope 1:2, 13-22) Ia, e sega ni yaco wale ga e kea.

10. Na cava e vakaraitaka ni sega ni cegu o Setani?

¹⁰ Se baci rairai tale o Setani kei ira na vo ni agilosi ena mata i Jiova. E tarogi Setani tale o Jiova se a sa raica oti na yalodina i Jope ka vaka: “Ia sa taura matua tikoga ko koya na nona yalododonu.” Qai sauma o Setani: “Nai sau ni kulina na kulina, ia na nona ka kecega ena solia na tamata me bula kina. Ia mo ni dodoka mada na ligamuni, ka tara na suina kei na lewena, ena qai vosavakacacataki kemuni ki matamuni.”​—Jope 2:1-5.

11. (a) Na veivakatovolei cava tale a vakavuna vei Jope o Setani? (b) Na cava na kena macala?

¹¹ Sa qai vakatarai Setani o Jiova me cakava vei Jope na ka ga e via cakava, dina ga ni kaya na Kalou: ‘Mo kakua ni vakamatei koya.’ (Jope 2:6) Sa qai yaviti Jope o Setani ena dua na mate vakaloloma. Ena levu ni nona rarawa o Jope e kerea sara ga me mate. (Jope 2:7; 14:13, 14) O watina mada ga a saqati koya ena nona kaya: “Mo vosa vakacacataka na Kalou, ka mo mate ga.” (Jope 2:9) Ia a sega ni via cakava o ya o Jope. A kaya: “Au na sega ni biuta tani vei au na noqu yalododonu, ka yacova na siga ka’u na mate kina.” (Jope 27:5) E yalodina tiko ga vua na Kalou o Jope. E vakadinadinataki ni cala o Setani ena nona boletaka ni qaravi Jiova ga o Jope ena vuku ni i yau, sega ena loloma dina. E vakaraitaka tale ga o ya ni sega ni rawata o Setani me vagolea tani na tamata kece ga mai na nodra qarava na Kalou.

12. (a) Ena vuku ni ka e cakava o Jope, e rawa kina vakacava vua na Kalou me sauma na bolebole i Setani? (b) Na cava e vakadinadinataka na yalodina i Jisu vua na Kalou?

¹² E vakaevei na loma i Jiova ena yalodina i Jope? Sa vakatubu marau dina vua! E kaya na Vosa ni Kalou: “Mo vuku, na luvequ, ka vakamarautaka na lomaqu, me dua na vosa me’u tauca vua sa beitaki au.” (Vosa Vakaibalebale 27:11) O Setani ga e beitaki Jiova tiko. Ia e marau dina na loma i Jiova ena nona yalodina tiko ga o Jope. Ena ka oqo e rawa kina vei Jiova me sauma lesu na veibeitaki dokadoka i Setani se na nona bolebole ni ra na sega ni qarava na Kalou na tamata ke ra vakatovolei. Ena vuku ni nodra i valavala e vuqa tale, sa rawa kina vua na Kalou me sauma lesu na veibeitaki. Na i vakaraitaki levu duadua na tamata e taucoko o Jisu. A yalodina tiko ga ena veivakararawataki kei na veivakatovolei a binia vua o Setani. E vakadinadinataka oqo ni a rawa tale ga vua na tamata e taucoko o Atama me cakava vaka kina ke a lomana. E vakadinadinataka tale ga ni a sega ni tawayalododonu na Kalou ena nona vinakata me talairawarawa vua na tamata.

O TO E VEI?

13. (a) E tara vakacava na i le na ivakarau ni nomu bula? (b) E rawa vakacava ni o vakamarautaka na Kalou se vakararawataki koya?

¹³ E vakaevei na nomu bula? O na nanuma beka ni sega ni bibi na ivakarau ni nomu bula? E bibi dina. Se o kila se sega, o sa na tokona tiko kina na Kalou se o Setani ena vuku ni i le o ya. E kauwaitaki iko o Jiova. E vinakata mo qaravi koya mo bula tawamudu kina ena parataisi e vuravura. (Joni 3:16) Era a vakararawataki koya na Kalou na Isireli ena gauna era vorati koya kina. (Same 78:40, 41) E vakamarautaka beka na Kalou na ivakarau ni nomu bula se vakararawataki koya? Io, mo vakamarautaka na Kalou e vinakati vei iko mo vulica na nona i vunau mo qai muria sara.

14. (a) Me baleta na veiyacovi, na lawa cava e dodonu me da muria me marau kina na Kalou? (b) Ena vuku ni cava e rui ca kina na beci ni lawa vaka oqo?

¹⁴ E dua na i naki levu i Setani, me uqeti ira na tamata me ra beca na lawa ni Kalou me baleta na vakayagataki ni gacagaca ni vakatubukawa, kei na lawa e vauca na vakawati kei na vuvale. Na lawa ni Kalou e vakarautaki me taqomaki keda. E kainaki kina ni cala me ra veiyacovi o ira na se bera ni vakawati. E kainaki tale ga kina ni cala vei ira na vakawati me ra veibutakoci. (1 Cesalonaika 4:3-8; Iperiu 13:4) Ia ni sa beci na lawa ni Kalou, era sucu na gone e sega tu na nodra itubutubu me lomani ira. Sa ra dau vakalutu kina e so na tina, o ya na nodra vakamatea na gone e se bera ni sucu. E levu tale ga era veidauci e tauvi ira na mate rerevaki ni veiyacovi e rawa ni buli vakaca kina na gone era na vakasucuma. E dua na i valavala tawayalodina, e beci kina na lawa ni Kalou na veiyacovi kei na dua o drau sega ni vakawati. A kaya o Jope: “Kevaka sa bacani na lomaqu vua e dua na yalewa, se’u wawa koto mai na nona katuba na kai noqu . . . Io, sa ca sara oqo, io, na i valavala e beca na lawa, me totogitaki sara.”​—Jope 31:1, 9, 11, The New American Bible.

15. (a) Ke da veidauci, sa da vakamarautaki cei? (b) Ena vuku ni cava e ka vakayalomatua kina na muri ni lawa ni Kalou?

¹⁵ Me kua ni da kurabui ni vuravura oqo e liutaka tiko na Tevoro, e raica tu me sega ni cala na nomu veiyacovi kei na dua o drau sega ni vakawati. Ia ke o sa na cakava, o sa vakamarautaki cei kina? O Setani ga, sega ni o Jiova. Mo “dro tani mai na veidauci” mo vakamarautaka kina na Kalou. (1 Korinica 6:18, NW) E dina e sega ni dau rawarawa na yalodina vua na Kalou. E sega tale ga ni a rawarawa vei Jope. Ia mo nanuma tiko, ni ka vakayalomatua me muri na lawa ni Kalou. O na marau cake kina ena gauna oqo ke o muria. Ia, e bibi cake sara ni o sa na vakamarautaka kina na Kalou ena nomu tokoni koya ena i le o ya. Ena vakalougatataki iko tale ga o koya mo bula tawamudu ena mamarau e vuravura.

16. (a) A vakalougatataki vakacava o Jope ena vuku ni nona yalodina? (b) Na cava ena vakayacori ena ka ca e dau cakava o Setani, me vaka na nodratou vakamatei tinitini na luve i Jope?

¹⁶ E dina, ni a vakadravudravuataki Jope vakaca sara o Setani qai vakavuna na mate ni luvena tinitini. Oqo e dua dina na leqa levu sara vei Jope. Ia ena nona a yalodina tiko ga o Jope, sa qai vakalougatataki koya na Kalou ena kena vakaruataki na ka e tu vua e liu ni bera ni vakatarai o Setani me vakatovolei koya. Mani tini tale na luve i Jope. (Jope 42:10-17) E sega ni vakataratututaki ni ratou na vakabulai tinitini tale na luve i Jope a vakamatea o Setani, ena gauna era na vakaturi mai kina na mate. E sega na ca se na leqa e vakatarai vei Setani me cakava me na sega ni vakadodonutaka na Tamada dauloloma o Jiova ena nona gauna lokuci.

17. Ena vuku ni cava e bibi dina kina na ivakarau ni noda bula?

¹⁷ O koya gona mo nanuma tiko ni bibi dina na ivakarau ni nomu bula. E bibi vei rau ruarua na Kalou o Jiova kei Setani na Tevoro. Na vuna ni o vauci o iko ena i le, se na yalodina na tamata vua na Kalou se sega.

[iYaloyalo ena tabana e 106]

A dei o Jope ena nona bolebole o Setani ni na sega ni yalodina e dua vua na Kalou ke vakatovolei

[iYaloyalo ena tabana e 110]

E beci na lawa ni Kalou ni o veiyacovi kei na dua o drau sega ni vakawati

[iYaloyalo ena tabana e 111]

E levu sara na ka a vakalougatataki Jope kina o Jiova ena vuku ni nona yalodina