Wase e 4

Bukete ia e Sega Ga ni Vakamau

SA VULA tolu tiko na bukete i Meri. O rawa ni nanuma lesu ni sikovi Ilisapeci ena gauna ka se qai bukete voli kina, ia sa lesu tale oqo ki Nasareci na nona koro. Ena sega ni dede sa ra na kila na lewe ni nona koro na veika me baleti koya. Sa dua dina na i tuvaki dredre!

E ca vakalevu sara ni sa veimusumusuki oti ko Meri me mai wati Josefa na matai. E kila o koya na lawa ni Kalou vei ira na Isireli, na yalewa sa musuki oti vua e dua na tagane ka soli koya me veiyacovi kei na dua tani na tagane ena vakaviriki mate. Ena vakamacalataka rawa vakacava vei Josefa na nona bukete?

Me vaka ni vula tolu na lako i Meri, eda rawa ni kila na gu ni loma i Josefa me raici koya. Ni rau sota, e rairai vakarogoya beka vua na i tukutuku ko Meri. E vakamacalataka beka ena nona vinaka taucoko ni a bukete ena vuku ni yalo tabu. Ia sa rawa mo vakasamataka, ni ka dredre vei Josefa me vakabauta na veika oqo.

E kila vinaka ko Josefa na i rogorogo vinaka i Meri. E kena i rairai ni ka levu sara na nona lomani koya. Ia, e veitalia mada ga na veika e tukuna, na kena i rairai ni dua na tagane a vakabuketetaki koya. Ia e sega ga ni vinakata ko Josefa me vakaviriki mate se me vakamaduataki e matadra na lewe vuqa. Sa qai lomana me sereki koya vuni. E dikevi ni vaka era vakamau na tamata era veimusumusuki ena gauna oqori, ia e vinakati me caka na sere me muduki kina na veimusumusuki.

Ni se vakananuma voli ga na veika oqo ko Josefa, e mani moce sara. Sa qai rairai vua na agilosi i Jiova ena tadra ka kaya: “Kakua ni rere ni kauta vei iko na watimu ko Meri: ka ni sa tubu mai vua na yalo tabu na ka sa kunekunetaka: ia ena vakasucuma ko koya e dua na gonetagane; ia mo vakayacani koya ko Jisu; ka ni sai koya ga ena vakabulai ira na nona tamata mai na nodrai valavala ca.”

Ni yadra cake mai ko Josefa, sa wacava na levu ni nona vakavinavinaka! E sega ni lokuyara ni vakayacora na i vakasala ni agilosi. Sa kauti Meri yani ki nona vale. Ni vakayacori oqo e matadra na lewe vuqa, e vaka na lotu ni veitube, me kilai kina ni rau sa vakamau ko Josefa kei Meri. Ia a sega ni veiyacovi kei Meri ko Josefa ena gauna kece a buketetaki Jisu voli kina.

Raica! ko Meri e sa tiko bibi vua na gone, ia sa vakavodoki koya yani ko Josefa ena dua na asa. E vei na vanua e rau lako yani kina, ia a cava me rau lakova kina na i lakolako o ya ni sa voleka ni vakasucu ko Meri? Luke 1:​39-41, 56; Maciu 1:​18-25; Vakarua 22:​23, 24.

▪ E vakacava na loma i Josefa ni kila ni sa bukete ko Meri, ia ena vuku ni cava?

▪ E rawa vakacava ni sereki Meri ko Josefa ni rau se bera ni vakamau?

▪ Na cava e vakayacori e matadra na lewe vuqa e vaka na lotu ni veitube ni nodrau vakamau ko Josefa kei Meri?