Lesoni 4

O Cei na Tevoro?

O Setani na Tevoro—e vu mai vei o koya? (1, 2)

E dau veivakacalai vakacava o Setani? (3-7)

Na cava mo vorata kina na Tevoro? (7)

1. Na vosa “tevoro” e vakaibalebaletaki vua e dua e tukuna na ka lasutaki me baleta e dua tale. Na “Setani” e kena ibalebale na meca se dauveivorati. Na icavuti e rua oqo e vakatokai kina na meca levu duadua ni Kalou. E liu, a dua tu na agilosi uasivi ni Kalou o koya mai lomalagi. Ia e muri, a tuburi koya na yalo qaciqacia, qai vinakata na sokalou e dodonu me caka ga vua na Kalou.​—Maciu 4:8-10.

2. E vakayagataka e dua na gata na agilosi oqo, o Setani, me vosa kina vei Ivi. Na nona lasu e vakavuna me talaidredre o Ivi vua na Kalou. E beca gona o Setani na nona veiliutaki se na nona sa Cecere sara na Kalou. E vaka me vakalewa o Setani na yaga ni nona veiliutaki na Kalou, kei na vinaka ena vakavuna vei ira na vakarorogo vua na Kalou. E kaya tale ga o Setani nira na sega ni yalodina tiko ga vua na Kalou na tamata. Ena ka kece oqo, sa yaco sara tiko ga kina o Setani me meca ni Kalou. Oya na vuna e vakatokai kina me o Setani na Tevoro.​—Vakatekivu 3:1-5; Jope 1:8-11; Vakatakila 12:9.

3. Dau saga o Setani me lawakitaki ira na tamata mera sokaloutaki koya. (2 Korinica 11:3, 14) Dua na sala e dau veivakacalai kina nona vakayagataka na lotu lasu. Ke dua na lotu e vakavuvulitaka na lasu me baleta na Kalou, sa cakava sara tiko ga na inaki i Setani. (Joni 8:44) De ra na nanuma dina tiko e so era lewena na lotu lasu nira sa qarava tiko na Kalou dina. Ia na kena dina ga nira qaravi Setani tiko. O koya e “kalou ni vuravura oqo.”​—2 Korinica 4:4.

4. Na vakacuru e dua tale na sala e dau rawai ira kina na tamata o Setani. De ra na kacivi na yalo mera veitaqomaki, mera vakacacani ira tale na so, mera tukuna na veika e se bera ni yaco, se mera cakamana. O Setani ga na vu ni veika ca kece oqo. Ke da via vakamarautaka na Kalou, meda cata na vakacuru.​—Vakarua 18:10-12; Cakacaka 19:18, 19.

5. E dau vakacala tale ga na tamata o Setani ena nona uqeta na yalo ni dui boletaka ga na nona matatamata kei na dui vakabekabea ga nona isoqosoqo vakapolitiki. E so era nanuma ni vinaka cake na nodra vanua se matatamata. Ia e sega ni dina oqo. (Cakacaka 10:34, 35) E so tale era vakanamata ina isoqosoqo vakapolitiki mera walia na leqa ni kawatamata. Ena nodra cakava oqo, era sa vakanadakuya tiko kina na Matanitu ni Kalou. Ni oya duadua ga ena mai walia na noda leqa.​—Taniela 2:44.

6. E dua tale na sala e dau vakacala kina na tamata o Setani na nona dau temaki ira ena gagadre cala. O Jiova e tukuna meda kua ni cakava na veika e cala ni kila nira na vakaleqai keda. (Kalatia 6:7, 8) E so era na kaya beka mo lai tomani ira ena veika ca era vakayacora. Ia nanuma tiko, ni o Setani ga e vinakata mo lai cakava na veika oya.​—1 Korinica 6:9, 10; 15:33.

7. De na vakayagataka o Setani na veivakacacani se veitusaqati mo biuti Jiova kina. De ra na cudru vakalevu e so na wekamu voleka ni o sa vulica tiko na iVolatabu. De ra na vakalialiai iko e so tale. Ia o cei e vakavuna na nomu bula? E via vakarerei iko o Setani mo muduka kina nomu vulica na veika e baleti Jiova. Kua vakadua ni soro vei Setani! (Maciu 10:34-39; 1 Pita 5:8, 9) Ke o vorata tiko ga na Tevoro, o na vakamarautaki Jiova, o na vakaraitaka tale ga ni o tokona na nona veiliutaki.​—Vosa Vakaibalebale 27:11.

[iYaloyalo ena tabana e 9]

Na lotu lasu, na vakacuru, kei na dui boletaka ga nona vanua e dau veivakacalai

[iYaloyalo ena tabana e 9]

Vorati Setani ena nomu vulica tiko ga na veika mo kilai Jiova kina