Uqeta me Vakayagataki na iVolatabu

E NODA inaki meda uqeti ira na vakarogoci keda mera raica na Vosa ni Kalou, na iVolatabu. Na itukutuku eda kacivaka e yavutaki ena iVolatabu, o koya gona, eda vinakata me kilai ni ka eda tukuna e vu mai vua na Kalou, sega nida vakavuna ga. E bibi mera nuitaka na tamata na iVolatabu.

Ena Cakacaka Vakavunau. Mo vakarautaka e veigauna kece o lako kina ena cakacaka vakavunau e dua se sivia na tikinivolatabu mo wasea vei ira era na rogoci iko. Ke o nanuma mada ga mo na vakamacalataka vakalekaleka e dua na ivoladusidusi vakaivolatabu, ena veiganiti ga mo wilika e dua na tikinivolatabu. Se mani vakacava na vinaka ni nomu ivakamacala, ena sega ga ni uasivia na kaukaua ni iVolatabu me dusimaki ira na tamata yalomalumalumu. E rawa ni o cavuqaqataka ga na tikinivolatabu ke o sotava e dua na ituvaki e sega ni rawa kina ni o wilika. E kunekunei dredre na ivolavivigi ni iVolatabu ena imatai ni senitiuri. Ia, e dau wiligusutaka vakalevu o Jisu kei iratou na yapositolo. E dodonu meda saga tale ga meda rawa ni wiligusutaka e so na tikinivolatabu, me rawa nida vakayagataka ena cakacaka vakaitalatala ena gauna eda sega ni rawa kina ni wilika.

Ke o sa mani wilika rawa na iVolatabu, vakaraitaka vei itaukeinivale me rawa ni vakamuria nomu wiliwili. Ia, ena vinaka sara ke vakayagataka sara ga o itaukeinivale na nona iVolatabu.

Ia, e vinaka mo kila ni so na dauvakadewa ni iVolatabu era sega ni vakadewataka vakadodonu na Vosa ni Kalou. Era sega ni vakadewataka taucoko na ibalebale dina ni vosa e volai taumada kina na iVolatabu. E levu na vakadewa ni iVolatabu nikua e sa sega kina na yaca ni Kalou, sa vakabuawataka na ibalebale ni vosa a volai taumada kina na iVolatabu ena kedra ituvaki na mate, kei na inaki e bulia kina na vuravura na Kalou. Me rawa ni kilai na dina ni veika oqo, de dua o na via vakatauvatana e so na tikinivolatabu bibi ena veimataqali vakadewa ni iVolatabu era tu rawa. Ia, ka ni marau ni oqo e sa cakava na ivola na Reasoning From the Scriptures ena veitikinivolatabu era dau vakayagataki vakalevu. O koya e dau via kila na ka dina ena taleitaka sara na vakamatatataki ni veika oqo.

Ena Soqoni ni iVavakoso. Meda saga kece meda dau vakayagataka noda iVolatabu ena soqoni ni ivavakoso. Oqo ena yaga sara vakalevu. Ena gole tiko ga kina na nodra vakasama na vakarorogo ena ka e veivosakitaki. Era na raica sara ga kina e matadra na ka era rogoca ni cavuta tiko mai o koya e vosa. Ena dei tale ga kina ena nodra vakasama na ka vou ni yavutaki dina mai na iVolatabu na noda vakabauta.

Nodra wilika tale ga na iVolatabu na vakarorogo ena gauna o wilika kina na nomu, ena vakatau vakalevu ena nomu veivakauqeti. Qai kena iwalewale vinaka duadua mo sureti ira sara ga vakadodonu.

Ni o vosa, e vakatau vei iko na tikinivolatabu o na vinakata mo vakabibitaka vei ira na vakarorogo mera cega. Ena vinaka mo digia ga na tikinivolatabu era na tokona sara ga na tikina o via vakabibitaka. Ke talavo na gauna, qai kuria e so tale.

Ia, e sega ni veirauti na nomu cavuta na ivola me wiliki, wase, kei na tikina, se nomu kerei ira na vakarorogo mera cega. Ke o wilika e dua na tikinivolatabu o dewa ina dua tale ni bera mada ga nira raica na tikinivolatabu o sa wilika oti na vakarorogo, lakolako sara na sega ni via cega nodra iVolatabu. E bibi mo kauaitaki ira. Qai wilika e dua na tikinivolatabu ni o raica ni lewe levu era sa cega rawa.

Vakasama sara tiko i liu. Tukuna toka e liu na tikinivolatabu ni bera sara ni o qai wilika. Oqo o na sega kina ni waraki ira vakabalavu na vakarorogo mera raica na tikinivolatabu. Ena taura beka na gauna nomu dau waraki ira na vakarorogo mera raica nodra iVolatabu ni bera ni o wilika, ia ena yaga sara vakalevu.