Veivakauqeti Qai Veivakayaloqaqataki

NA ITUKUTUKU eda lesi meda kacivaka e itukutuku vinaka. A kaya o Jisu: “Ena vunautaki dina mada eliu nai tukutuku-vinaka e na veivanua kecega.” (Mari. 13:10) E ivakaraitaki tale ga ena tikina oqo o koya ena nona dau kacivaka “nai tukutuku-vinaka ni matanitu ni Kalou.” (Luke 4:43) O iratou tale ga na yapositolo eratou a vunautaka “nai tukutuku-vinaka ni Kalou” kei na “[i]tukutuku-vinaka kei Karisito.” (1 Ces. 2:2; 2 Kor. 2:12) Na itukutuku oqo e veivakauqeti, e veivakayaloqaqataki.

Eda duavata kei na “agilose sa vuka e na maliwa kei lomalagi kei vuravura” qai kacivaka voli “nai tukutuku-vinaka e sega ni oti rawa” ena noda uqeti ira na tamata mera “rerevaka na Kalou, ka vakarokoroko vei koya.” (Vkta. 14:6, 7) Eda tukuna yani ina veivanua kece ga na ka e baleti koya na Kalou dina, na yacana, nona itovo qoroi, na veika vakasakiti e cakava, nona inaki e vakarautaka ena nona loloma, noda itavi vua, kei na ka e vinakata vei keda. E okati me itukutuku vinaka na itukutuku ni nona na vakarusai ira na tamata ca na Kalou ena vuku ni nodra beci koya, kei na nodra vakavuleqa vei ira na vo ni lewe i vuravura. Ia, e sega ni noda itavi meda vakatulewataka na nodra na bula se sega o ira eda vunau vei ira. E noda itavi ga meda vukea e levu eda rawata mera vakabauta na itukutuku mai na iVolatabu, mera qai raica vakataki ira ni oqo dina na itukutuku vinaka.—Vkai. 2:20-22; Joni 5:22.

Kua ni Vakabibitaka na iTukutuku ni Leqa se iTukutuku Ca. E tu ga na leqa se veika ca eda dau sotava ena noda bula. Eda sega ni lecava oqo. O na kauta cake beka mai e dua na leqa e tara tu na itikotiko mo tekivutaka kina nomu veivosaki. Ia, ena sega soti ni yaga ke o vakamacalataka vakabalavu. Sa ka ni veisiga na rogoci ni itukutuku ni rarawa. Ke da baci weroka tale, e rawa nira sogota nodra katuba na vakarorogo, se ra sogota na daligadra. Ni se qai tekivu ga na veivosaki, tovolea mo veivakamuai sara ina ka dina totoka e tu ena Vosa ni Kalou. (Vkta. 22:17) Ke sega mada ga ni via tomana na veivosaki na itaukeinivale, o sa bau vakaraitaka mada ga vua e so na itukutuku rogorogo vinaka me vakasamataka. Oqo ena vakarawarawataka nona vakarorogo ena dua tale na gauna.

Ke o lesi tale ga mo vunau ena buturara, kua ni vakamacalataka vakabalavu na itukutuku ca se itukutuku ni leqa baleta ni o kila e levu na itukutuku vaka oqori. E rawa ni veivakayalolailaitaki ke vakamacalataka tiko ga o koya e vunau na nodra guce na veiliutaki, na basulawa, ivalavala kaukaua, kei na vakasisila ni ivalavala ni tamata. Me qai tukuni ga na mataqali itukutuku vaka oqo ke dua na kena yaga, me ganita ga na ulutaga o vosa kina. Ia, ke o vakayagataka, me vakalekaleka ga. Na itukutuku tale ga vaka oqo ena kilai kina na veika e dau vakavuna na leqa, qai rawa ni vakayagataki oqori me vakaraitaka na vuna e yaga kina na ivakasala ena iVolatabu. Me matata nomu vakamacalataka na leqa e so, ia me kua ga ni balavu.

Sega ni kena ibalebale oqo mo sa kua sara ga ni cavuta e dua na itukutuku ca se itukutuku ni leqa ena nomu vunau. E tiko na gauna me tukuni kina na itukutuku vaka oqo. Ia, mo qarauna ga, baleta eda vinakata me veivakayaloqaqataki tiko ga na noda vosa. O koya gona, ena bibi mo vakadeitaka na ka mo tukuna, ka mo kua ni tukuna, kei na ka mo vakabibitaka. Ena vunau i Jisu mai na Ulunivanua, a vakasalataki ira nona imuri mera kua ni vakatotomuria na nodra ivakaraitaki ca na Farisi, ena nodra dau nanumi ira ga. Sa qai cavuta e vica na ivakaraitaki me vakamatatataka kina na nona itukutuku. (Maciu 6:1, 2, 5, 16) Ia, a sega ni vakamacalataka vakabalavu o Jisu na nodra ivakaraitaki ca na iliuliu ni lotu, a vakabibitaka ga na kilai ni ka dina me baleti koya na Kalou kei na kena bulataki. (Maciu 6:3, 4, 6-15, 17-34) A sega gona ni veivakayalolailaitaki na nona ivakamacala, a veivakauqeti ga.

Vakabibitaka na Ka e Yaga Qai Veivakauqeti. Ke o lesi mo vosa vei ira na lewe ni ivavakoso me baleta e so na noda ivalavala vakarisito, tovolea me veivakayaloqaqataki na nomu vosa, mo kua ni veivakalewai. Qarauna tale ga mo kua ni veivunauci vakairakasala. (Roma 2:21, 22; Iper. 13:7) Me tau nomu ivakasala ena loloma, me kua ni tau ena cudru. (2 Kor. 2:4) Ke o vakabauti ira na tacimu ena ivavakoso, o nuidei nira via vakamarautaki Jiova, ena kilai na veivakabauti oqori ena itautau ni nomu vosa, era na uqeti kina na vakarorogo mera muria na nomu ivakasala. Raica mada na ivakaraitaki ni veivakabauti i Paula e volai ena 1 Cesalonaika 4:1-12; 2 Cesalonaika 3:4, 5; kei na Filimoni 4, 8-14, 21.

So na gauna ena gadrevi mera veivakasalataki na qase ena ka e vauca e so na ivalavala tawakilikili. Ia, na yalomalumalumu ena vukei ira ena nodra veivakasalataki. (Kala. 6:1, VV) E dodonu me matata mai na itautau ni nodra vosa nira dokai ira na lewe ni ivavakoso. (1 Pita 5:2, 3) Oqo e dua na ka e vakasalataki ira kina vakatabakidua na cauravou na iVolatabu. (1 Tim. 4:12; 5:1, 2; 1 Pita 5:5) Ke mani gadrevi na veivunauci, veivakadodonutaki, kei na veituberi, e dodonu me salavata kei na ka e kaya na iVolatabu. (2 Tim. 3:16) Me kua vakadua ni vakayagataka e dua na tikinivolatabu o koya e vosa me tokona nona nanuma se nona rai. Ke gadrevi mada ga na veivakadodonutaki, se rawa tiko ga ni veivakayaloqaqataki na kena itautau ke vakabibitaki ga na ka e rawa ni cakava e dua me kua ni coko kina ena caka ca, sala me wali kina na leqa, ka me caka ni sotavi na ka dredre, ka me cakava e dua me goletani kina mai na sala ca sa muria tiko, kei na sala e itataqomaki kina vei keda na ka e dau vinakata o Jiova meda cakava.—Same 119:1, 9-16.

Ni o vakarautaka tiko nomu vunau, vakasamataka vakavinaka se o na tinia vakacava nomu vakamacalataka na veitikina bibi yadua, vaka kina na itinitini ni nomu vunau. E dau kasa vakalevu vei ira na vakarorogo na iotioti ni ka o tukuna. Ia, vakacava, ena veivakayaloqaqataki?

Nida Veivosaki. E dau ka taleitaki vei keda na tamata i Jiova na noda veisotari kei ira na tacida vakayalo ena vanua ni soqoni. Oqo e gauna meda veivakauqeti kina vakayalo. Na iVolatabu li e uqeti keda meda dau “veivakayaloqaqataki” ena gauna eda sota kina ena vanua ni soqoni. (Iper. 10:25, VV) Na veivakayaloqaqataki oqo e sega ni vu ga mai ena vunau, se noda ivakamacala ena gauna ni soqoni, e vu tale ga mai na noda veivosaki ni bera na soqoni, kei na gauna e oti kina na soqoni.

Vakalevu me dau lewe ni noda veivosaki na veika ga e baleta noda bula e veisiga, ia eda na vakayaloqaqataki vakalevu duadua ena noda veivosakitaka na veika vakayalo. E okati e ke na noda talanoataka na veika totoka eda sotava ena cakacaka vakavunau. E dau veivakayaloqaqataki tale ga na noda veikauaitaki.

Ia, e sa rui kaukaua na idre ni vuravura nikua, e vinakati kina na qaqarauni. A kaya o Paula ena nona ivola vei ira na lotu Vakarisito mai Efeso: “O koya ga oqo ni dou sa biuta tani . . . na lasu, me vosa dina na tamata yadua vua na kai nona.” (Efeso 4:25) Noda vosataka na ka dina, sega ni ka lasu, e okati kina na noda sega ni vakacerecerei ira na tamata se ka e dau vakacerecerei ena gauna oqo. E veivakasalataki tale ga o Jisu me qarauni na “veitemaki ni i yau.” (Maciu 13:22, VV) O koya gona nida veivosaki, meda kua ni kauta cake mai na ka ni “veitemaki” oqo ena noda tokona na vakasaqarai ni iyau.—1 Tim. 6:9, 10.

Ni veivakasalataki tiko na yapositolo o Paula me baleta na bibi ni veivakayaloqaqataki, a qai vakaroti keda meda kua ni vakalewa se beca e dua na tacida e vakatabui koya ena so na ka ni “sega soti ni kaukauwa na nona vakabauta,” se sega ni matata sara vua na galala ni bula ni lotu Vakarisito. O koya gona, e dodonu meda nanuma na nodra ituvaki ni bula na tacida kei na nodra ivakatagedegede ni bula vakayalo ke da vinakata me dau veivakayaloqaqataki na noda vosa. Ena sega ni vinaka sara ke da “cakava e dua na ka me tarabe se mani bale sara kina” e dua na tacida!—Roma 14:1-4, 13, 19, VV.

O ira era sotava tu e so na leqa lelevu ena nodra bula—me vaka na mate e sa sega na kena iwali—era dau marautaka vakalevu na veivosaki e veivakayaloqaqataki. O ira vaka oqo e dua na ka nodra dau sasaga mera tiko rawa kina ena soqoni. O ira na kila na kedra ituvaki era na taroga beka: “O sa qai vakacava toka?” Ena taleitaka o koya na nodra kauai. Ia, ena sega beka ni taleitaka o koya me veivosakitaki na kena ituvaki vakayago, ena vakayalolailaitaki koya wale ga. Ena vakayaloqaqataki koya cake na vosa ni vakavinavinaka kei na vosa ni veivakacaucautaki. O raica rawa beka na nona lomani Jiova tiko ga kei na nona vosota e dina ni sotava tiko na veika dredre? E vakayaloqaqataki iko beka ni o rogoca na domona ni vakamacala ena soqoni? Io, ena vakayaloqaqataki koya cake ke o vakacaucautaki koya ena veika vinaka e dau cakava ena ivavakoso, sega ena nomu veivosakitaka na mate e tauvi koya tu.—1 Ces. 5:11.

Me rawa ni veivakayaloqaqataki na noda vosa, e bibi meda dau vakasamataka na rai i Jiova ena ka e veivosakitaki tiko. E Isireli makawa, era sotava na cudru waqawaqa i Jiova o ira era vosavakacacataki ira na matataki koya, era didivaka tale ga na mana. (Tiko 12:1-16; 21:5, 6) Nida dokai ira na qase ena gauna oqo, eda taleitaka tale ga na kakana vakayalo e vakarautaka tiko mai na dauveiqaravi yalodina ka vuku, sa da vakaraitaka nida vuli mai na ka a yacovi ira na Isireli.—1 Tim. 5:17.

Dua na ka na levu ni veika yaga e rawa nida veivosakitaka vata kei ira na tacida nida veimaliwai kei ira. Ia, ke o rogoca ni via vakalelewa na nona ivosavosa e dua, tovolea sara mo veisautaka na veivosaki me rawa ni rogorogo vinaka tiko ga.

Se da vunau tiko vua e dua, vosa mai na buturara, se veivosaki kei ira na tacida vakayalo, meda vakaraitaka mada ga na yalomatua me rawa nida talaucaka mai lomada na vosa e “vinaka me ia kina na veivakatataki, me vaka sa rauta, me yaco kina na vinaka vei ira era sa rogoca.”—Efeso 4:29.