Meda Maqosa Tiko ga ena Cakacaka Vakaitalatala—Mo Vakaliuliu ni o Vunau Tawalokuci

Vuna e Bibi Kina: Levu na gauna eda sega ni dau sotavi ira na itaukeinivale nida cakacaka vakavunau e veivale. Ia eda dau sotavi ira nida vodo ena lori se basi, nida wawa toka meda raici vei vuniwai, nida vakacegu e valenicakacaka se koronivuli kei na so tale na vanua. E inaki sara ga i Jiova mera rogoca kece na tamata na itukutuku vinaka ni Matanitu ni Kalou. (1 Tim. 2:3, 4) Koya gona, eda na rawa wale ga ni vunau ke da vakaliuliu ena veivosaki.

Kena iWalewale:

Mo vakatulewa vinaka. O raica ni veikauaitaki qai sega ni osooso? Vakacava e sega ni dua na ka ena vakaleqa nomudrau veivosaki? Eso na dautukutuku era dau matadredredre nira sotavi ira qo. Kevaka era matadredredre lesu mai, era na vosa sara yani.
Masu lo vakalekaleka mo rawa ni vosa ena doudou.—Niem. 2:4; Caka. 4:29.
Vosa vakalekaleka, rawa ni o vakabula ga. A sega ni tekivutaka o Jisu nona veivosaki kei na yalewa ni Samaria ena itukutuku ni Matanitu ni Kalou. (Joni 4:7) Eso na gauna, e rawa ni tekivu na veivosaki ena veivakacaucautaki: “Isa, ratou sa gone vinaka dina na luvemu!” E dau tekivu tale ga na veivosaki ena taro: “O sarava na nius ena bogi?”
Ni sa vakacagau na veivosaki, saga vakamatau mo vakamua ina itukutuku vinaka, ia mo kua ni vakariri. Laiva me drodro na veivosaki. De dua o rawa ni vakamacalataka e dua na itukutuku ena vakavu lomatarotaro vua. Kaya mada ke drau veivosakitaka tiko na bula vakavuvale, de dua o rawa ni kaya, “Tiko qo eso na idusidusi ena yaga sara ga ena nodra susugi na gone.” Ke drau veivosakitaka tiko e dua na itukutuku ena nius, o rawa ni kaya, “Dua na itukutuku vinaka au se qai wilika ga qo, e baleta tiko e dua na veisau.” Ke se bera ni o vakasavuya na itukutuku vinaka sa tinikoso na veivosaki, mo kua ni yalolailai.
Kauta tiko ga na tikidua kei na ivola tale eso e rawa ni soli vua e tataleitaki.

Tovolea Qori ena Loma ni Vula Qo:

Saga e veimacawa mo tekivutaka mada ga e dua na veivosaki me rawa ni o vunau tawalokuci.