Wase Dua
Sokalou Vata e Levu ena Noda Gauna—Cava e Dusia?
1, 2. (a) Na ka vakatubuqoroqoro cava sa yaco tiko ena noda gauna? (b) Na bula totoka cava sa waraki ira tu mai na tamata yalomalumalumu?
E VAKATUBUQOROQORO ni raici na nodra toso vata mai edaidai na tamata e vuravura taucoko mera sokalou ena duavata. Era toso vata mai kina e vica na milioni mai na veivanua, veiyasana, kei na duivosavosa. E tubu na kedra iwiliwili e veiyabaki. Na iVolatabu e tukuni ira oqo mera ‘ivakadinadina’ i Jiova, mera ‘isoqosoqo levu’ tale ga. Era “qaravi koya [na Kalou] e na siga kei na bogi.” (Aisea 43:10-12; Vakatakila 7:9-15) Na cava era vakayacora kina oqo? Nira sa mai kila ni o Jiova ga na Kalou dina. E lomadra kina mera veisautaki ira mera bulataka na nona ivakaro. Era sa mai kila tale ga ni vuravura ca nikua sa donuya tu na kena “iotioti ni veisiga,” sa voleka tale ga na gauna me vakarusa na Kalou me qai vakaisosomitaka ena vuravura parataisi.—2 Timoci 3:1-5, 13, NW; 2 Pita 3:10-13.
2 E yalataka na Vosa ni Kalou: “Malua mada vakalailai, ena qai takali na tamata ca; . . . Ia ko ira na yalomalumalumu era na taukena na vanua; ka na daumarau tiko e na veivakacegui vakaidina.” (Same 37:10, 11) “Era na taukena na vanua ko ira na yalododonu, ka tiko kina ka sega ni mudu.” (Same 37:29) “Na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa.”—Vakatakila 21:4.
3. Na yavu cava e rawati kina na duavata ni sokalou?
3 O ira na imatai mera na tawana na vuravura vou o ira sara ga na sa vakaduavatataki tiko nikua ena sokalou dina. Sa ra mai vulica na loma ni Kalou ra qai muria tiko ena kena vinaka duadua era rawata. A vosa o Jisu ena kena rui bibi oqo ni a kaya: “Sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.” (Joni 17:3) A vola na yapositolo o Joni: “Ko vuravura sa lako tani yani, kei na kena gagadre talega; ia ko koya sa cakava na ka sa vinakata na Kalou, sa tu dei ga ka sega ni mudu.”—1 Joni 2:17.
Na Ka e Dusia
4. (a) Na nodra vakumuni e levu mera mai sokalou vata ena noda gauna e dusia na cava? (b) E vakamacalataka vakacava na iVolatabu na kumukumuni oqo?
4 Na cava sara mada e dusia na nodra vakumuni e levu ena noda gauna mera mai sokalou vata? E dusia vakamatata nida sa volekata na icavacava ni vuravura ca oqo kei na itekitekivu ni vuravura vou ni Kalou ni oti ga na icavacava oya. Eda sa vakadinadinataka sara tu ga e matada na parofisai vakaivolatabu era tukuna tu mai ni na yaco na kumukumuni vakairogorogo oqo. E kaya e dua vei ira na parofisai oya: “Ena yaco e na gauna maimuri [iotioti ni veisiga oqo], ena vakataudeitaki na ulu-ni-vanua ni vale i Jiova [na sokalou cecere e caka vua] me sivia na veiulu-ni-vanua [me sivia na veimataqali sokalou kece], . . . a ra na drodro kina na veimataqali. A ra na lako kina na veimatanitu e vuqa, ka kaya, Meda mai lako cake ki na ulu-ni-vanua i Jiova, io ki na vale ni Kalou i Jekope; ena vakavulica vei keda ko koya na nonai valavala, ia eda na muria na nona sala.”—Maika 4:1, 2; Same 37:34.
5, 6. (a) Vakamacalataka se ra tabili tiko mai vakacava vei Jiova na veimatanitu. (b) Na taro cava soti meda tarogi keda kina?
5 Sega ni veimatanitu kece era sa tabili mai mera qaravi Jiova ena nona vale vakayalo ni sokalou, ia e so ga vei ira na lewedra, era sa le vica na milioni oqo. E tarai ira vakabibi na veika era sa mai vulica me baleti Jiova, oya ni Kalou yalovinaka o koya qai yavutaki ena loloma na nona inaki. Era vaqaqa sara ena yalomalumalumu se cava na loma ni Kalou vei ira. Na nodra masu e tautauvata ga kei na ka a masuta na daunisame ni a kaya: “Ni vakavulici au me’u cakava na nomuni lewa; ni sai kemuni na noqu Kalou.”—Same 143:10.
6 O raici iko beka ni o maliwai ira tu na ilawalawa levu sa kumuni ira mai oqo o Jiova mera mai sokalou vata? Ni o ciqoma na ivakasala mai na nona Vosa, o ciqoma beka oqori me vaka sara ga e lako tiko mai vei Jiova? E vakaevei na nomu “muria na nona sala”?
Rawati Vakacava?
7. (a) Me vakaevei na rabailevu ni sokalou ena duavata? (b) Na cava e rui bibi kina meda mai sokaloutaki Jiova ena gauna sara ga oqo, ia eda na vukea vakacava e so tale mera mai tomani keda?
7 E loma i Jiova mera sokalou vua ena duavata na nona ibulibuli kece. Eda diva me totolo mada ga mai na siga mera sa na sokalou kina vua na Kalou dina o ira kece na bula! (Same 103:19-22) Ia ena vinakati mada e liu mera vakarusai o ira kece na saqata na ivakaro dodonu i Jiova. Ena levu ni nona loloma, e se veivakasalataki tiko nikua o koya e veivanua kece mera veisau rawa kina na tamata. (Aisea 55:6, 7) Edaidai gona, “vei ira kece talega na veimatanitu, kei na veimataqali, kei na duivosavosa, kei ira na tamata,” sa vakarogoi tiko kina na ivakaro bibi oqo: “Dou rerevaka na Kalou, ka vakarokoroko vei koya; ni sa yaco na nona gauna me lewa: ia dou vakarokoroko vei koya ka buli lomalagi, kei vuravura, kei na wasawasa, kei na veivurevure-ni-wai.” (Vakatakila 14:6, 7) O sa ciqoma beka na veisureti oya? Ke vaka kina, sa nomu ilesilesi dokai mo sureta e so tale mera mai veikilai kei na Kalou dina mera sokaloutaki koya.
8. Ni sa vulici oti na yavu ni ivakavuvuli vakaivolatabu, na toso cava tale me sagai vagumatua?
8 E sega ni loma i Jiova mera sokalou vua o ira na kaya tiko nira vakabauti koya ia ena dua tale na yasana era caka nodra ga. E vinakata na Kalou mera “kila na lomana” na tamata ra qai vakaitovotaki ira kina. (Kolosa 1:9, 10) O ira gona era marautaka dina na nodra sa mai kila na yavu ni ivakavuvuli vakaivolatabu era na guta mera toso mera lotu Vakarisito matua. E nodra gagadre mera kilai Jiova vakavoleka, mera vakarabailevutaka ra qai vakatitobutaka na nodra kila na nona Vosa, mera bulataka tale ga oqori ena kena levu era rawata. Era na saga mera vakaitovotaki ira ena itovo i koya na Tamada vakalomalagi, me tiko tale ga vei ira na nona rai. Na ka oqo e tosoi ira mera qara na sala e so mera cakava kina na cakacaka ni veivakabulai e cuqena tiko o koya e vuravura ena noda gauna. Sega li ni nomu gagadre oqori?—Marika 13:10; Iperiu 5:12-6:3.
9 . Sa rawati tiko vakacava ena gauna sara ga oqo na duavata dina?
9 E vakaraitaka na iVolatabu ni dodonu mera duavata o ira na qaravi Jiova. (Efeso 4:1-3) Me kune sara ga edaidai na duavata oqo, dina ga nida bula tu ena vuravura ni veisei da qai valuta tale tiko ga na noda dui malumalumu. A masuta vakabibi o Jisu mera lomavata na nona tisaipeli kece, mera duavata. Na cava e vauci kina? Taumada, me vinaka na nodra veiwekani kei Jiova kei na Luvena. Kena ikarua, mera duavata sara ga o ira. (Joni 17:20, 21) Me rawati na inaki oya, e vakayagataka o Jiova na ivavakoso vakarisito me isoqosoqo era vakavulici kina na nona tamata.
Cava Soti e Vu ni Duavata?
10. (a) Na cava eda teivaka nida vakayagataka na iVolatabu meda sauma kina na taro e tara na noda bula? (b) Vakalewa mada na yavu ni duavata vakarisito ni o sauma na taro era tiko ena parakaravu oqo.
10 Na sokalou ena duavata e vu mai na vitu na usutu bibi e sereki toka e ra oqo. Ni o sauma na taro, tei vakasamataka mada se tara vakacava na nomu veiwekani kei Jiova kei ira na tacimu lotu Vakarisito na usutu yadua. Nomu dikeva na usutu oqori kei na nomu cega na tikinivolatabu era sega ni lavetaki ena yaga sara ena nomu teivaka na vuku vakalou, na yalomatua, kei na lomavuku—na tolu na ka e yaga vei keda kece. (Vosa Vakaibalebale 5:1, 2; Filipai 1:9-11) Dikeva yadua mada na usutu oqo.
(1) Eda vakadinata ni tu vei Jiova na dodonu me lewa se cava e vinaka se cava e ca. “Mo vakararavi vei Jiova e na vu ni yalomu: ka mo kakua ni vakararavi ki na nomu yalomatua: mo vakarogotaka vua na nomu sala kecega, ia ena vakadodonutaka na nomui lakolako ko koya.”—Vosa Vakaibalebale 3:5, 6.
Nida sa via vakatulewataka e dua na ka, na cava meda qara kina na ivakasala kei na idusidusi e vakarautaka o Jiova? (Same 146:3-5; Aisea 48:17)
(2) Sa tu na Vosa ni Kalou me noda idusidusi. “Ni dou a vakabauta na vosa ni Kalou dou a rogoca maivei keitou dou sa sega ni vakabauta me vaka e vosa ni tamata, me vaka ga na kena dina, na vosa ni Kalou, oqori sa cakacaka yaco talega vei kemudou sa vakabauta.”—1 Cesalonaika 2:13.
Na cava e ririkotaki kina meda cakava na ka ga eda “nanuma” ni dodonu? (Vosa Vakaibalebale 14:12; Jeremaia 10:23, 24; 17:9)
Ke da sega ni kila se cava na ivakasala ni iVolatabu me baleta e dua na ka, na cava meda cakava? (Vosa Vakaibalebale 2:3-5; 2 Timoci 3:16, 17)
(3) E tautauvata ga na ituvatuva eda vakani tiko kina vakayalo. “A luvemu kecega ena vakavulici ira ko Jiova.” (Aisea 54:13) “Me da sa vakasamataka tale ga na sala me da dui veivakauqeti kina e na loloma kei na cakacaka vinaka. Me da sa kakua ni vakaweleweletaka na sosoqoni vata, me vaka sa dau nodra i vakarau e so, ia me da sa dui veivakayaloqaqataki ga, ka me vagumatuataki cake sara ni ko ni sa raica ni sa roro voleka tiko mai na Siga [ni rusa].”—Iperiu 10:24, 25, VV.
Ena yaga vakacava vei keda ke da vakayagataka vakavinaka na ituvatuva ni veivakani vakayalo i Jiova? (Aisea 65:13, 14)
(4) Sega ni noda Turaga e dua na tamata, o Jisu Karisito ga. “Dou kakua ni vakatokai mei Vakavuvuli: ni sa dua bauga na nomudoui Vakavuvuli; ia dou sa veiwekani [se, “veitacini,” NW] kecega. Dou kakua talega ni vakatoka e dua me tamamudou e vuravura; ni sa dua bauga na Tamamudou, ko koya mai lomalagi. Dou kakua talega ni vakatokai me turaga; ni sa dua bauga na nomudou Turaga, ko koya na Karisito.”—Maciu 23:8-10.
E dua beka na vuna vinaka meda nanuma kina nida uasivi cake vei ira tale e so? (Roma 3:23, 24; 12:3)
(5) Na Matanitu ni Kalou na matanitu duadua ga eda nuitaka ni na walia na leqa ni kawatamata. “Mo dou qai masu kina vaka oqo: Tama i keimami mai lomalagi, me vakarokorokotaki na yacamuni, me yaco mai na nomuni matanitu, me caka na lomamuni e vuravura, me vaka sa caka tiko mai lomalagi. . . . Ia dou vakasaqara taumada ga na matanitu ni Kalou kei na nona dodonu.”—Maciu 6:9, 10, 33, VV.
E taqomaka vakacava na noda duavata na noda “vakasaqara taumada ga na Matanitu ni Kalou”? (Maika 4:3; 1 Joni 3:10-12)
(6) Na yalo tabu e teivaka vei ira na sokaloutaki Jiova na itovo e so e bibi ina duavata vakarisito. “Na vua ni Yalo Tabu na loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, nai valavala malua.”—Kalatia 5:22, 23.
Na cava meda cakava meda vuataka kina na vua ni yalo tabu ni Kalou? (Cakacaka 5:32)
Ni tiko vei keda na yalo tabu ni Kalou, ena vakacava na noda veimaliwai kei ira na tacida vakarisito? (Joni 13:35; 1 Joni 4:8, 20, 21)
(7) Era dau vunautaka na itukutuku vinaka ni Matanitu ni Kalou o ira kece era sokaloutaki koya dina. “[E]na vunautaki mada na i Tukutuku Vinaka ni matanitu ki na vuravura taucoko, me i vakadinadina ki na veivanua kece ga, sa na qai yaco mai na i vakataotioti.”—Maciu 24:14, VV.
Na cava me vu ni noda via vakaitavi ena cakacaka vakavunau ena kena levu duadua eda rawata? (Maciu 22:37-39; Roma 10:10)
11. Na cava e yaco nida saga meda bulataka na ivakavuvuli vakaivolatabu?
11 E vakavolekati keda vei Jiova na noda sokaloutaki koya ena duavata, eda marautaka tale ga na veimaliwai e veivakabulabulataki kei ira eda vakabauta vata. E kaya na Same 133:1: “Raica, na kena yaga kei na kena matavinaka, nira sa tiko vakayalovata na veiwekani!” Sa bau veivakacegui dina ni rawa nida dau vakatikitiki laivi mai na vuravura kei na kena yalo kocokoco, itovo dukadukali, kei na itovo kaukaua meda lai soqoni vata kei ira era lomani Jiova dina ra qai talairawarawa ina nona lawa!
Qarauna na Veika e Vakavuna na Veisei
12. Na cava meda qarauna kina na yalo ni via lewai keda ga?
12 Meda qarauna na veika e dau vakavuna na veisei me kua kina ni luluqa na noda duavata uasivi kei ira na tacida e vuravura taucoko. E dua vei ira oqori na yalo ni via lewai keda ga, me kua ni lewai keda na Kalou se na nona lawa. E vukei keda o Jiova meda qarauna na yalo oqori ena nona vakavotui koya e vakavuna, o Setani na Tevoro. (2 Korinica 4:4; Vakatakila 12:9) A rawai Ivi kei Atama o Setani me rau kua ni rogoca na vosa ni Kalou, me rau beca na lomana ena ka erau vakatulewataka. Mai ca sara kina na kena itinitini vei rau kei keda tale ga. (Vakatekivu 3:1-6, 17-19) Sa ivakarau tu ni nodra bula e vuravura na via lewai ira ga, me kua ni lewai ira na Kalou kei na nona lawa. Sa rui bibi kina meda cavuraka tani mai lomada na yalo oya.
13. Na cava ena vakaraitaka nida sa vakavakarau dina tiko ena gauna oqo ina bula ena vuravura vou ni Kalou ena kune kina na ivalavala dodonu?
13 Me kena ivakaraitaki, vakasamataka mada na vosa ni yalayala totoka i Jiova me na vakaisosomitaka na vuravura ca oqo ena lomalagi kei na vuravura vou era na “tiko kina nai valavala dodonu.” (2 Pita 3:13) E sega li ni dodonu me uqeti keda oqori meda sa vakavakarau sara ga ena gauna oqo meda bula ena vuravura ena kune ga kina na ivalavala dodonu? Sa na kena ibalebale ga meda muria na ivakasala tau vakamatata ni iVolatabu e kaya: “Dou kakua ni lomani vuravura, se na veika sa vakavuravura. Kevaka sa lomani vuravura e dua, sa sega e na lomana na loloma vua na Tamada.” (1 Joni 2:15) O koya gona, eda na qarauni keda mai na yalo ni vuravura oqo—mai na yalo ni via lewai keda ga e kune kina, na yalo ni dui vakabibitaki koya, na kena itovo vakasisila kei na itovo kaukaua. Eda na saga e veigauna meda dau vakarorogo vei Jiova, meda talairawarawa tale ga vua mai vu ni lomada, dina ga ni na via drecala na yagoda ivalavala ca. Ena laurai ena noda ivakarau taucoko ni bula ni dau malele tu ga na noda vakasama kei na yaloda me cakava na loma ni Kalou.—Same 40:8.
14. (a) Na cava e bibi kina meda yavala ena gauna sara ga oqo meda vulica na ivalavala i Jiova da qai bulataka? (b) Na cava eda taura rawa mai na tikinivolatabu ena parakaravu era sega ni lavetaki?
14 Ena sega ni lokuyara o Jiova ni sa yaco mai na nona gauna lokuci me vakarusa na ivakarau ni veika oqo kei ira kece era vinakata na kena ivalavala. Ena sega ni vakadaroya tu mada na gauna oya se veisautaka na nona ivakatagedegede me ganiti ira na vulica ra qai cakava tiko na loma ni Kalou ena lomalomarua, qai gauna vata oqori era kubeta voli na veika vakavuravura. E sega ni gauna ni vakawelewele oqo! (Luke 13:23, 24; 17:32; 21:34-36) E veivakauqeti dina nida raica na nodra sa yavala na isoqosoqo levu mera qara vagumatua na ivakasala i Jiova e vakarautaki mai ena nona Vosa kei na nona isoqosoqo ra qai muria ena duavata na nona sala e basika ina vuravura vou! Na levu ga ni noda vuli meda kilai Jiova, na levu tale ga ni noda lomani koya kei na noda via qaravi koya.
Railesuvi
• Na cava na inaki i Jiova me baleta na sokalou?
• Nida sa vulica oti na yavu ni ivakavuvuli vakaivolatabu, na toso cava tale meda saga vagumatua?
• Na cava meda dui cakava meda na duavata tiko ga kina kei ira tale na so era sokaloutaki Jiova?
[iYaloyalo ena tabana e 4]
‘O ira na yalomalumalumu era na taukena na vanua, era na dau marau tiko ena veivakacegui vakaidina’